welcome

welcome to my bloge :)

الثلاثاء، 3 أغسطس 2010

تجازيني بمسج ؟

السلام عليكم ..

حبيّت طريقة طرحي في القصة القصيره .. في بوست "تكذبين بكل هدوء" .. و حسّيت إن القصه دايماً توضّح معنى الكلمات في الأبيات إلي أكتبها ..

من أقرب الأشعار إلى قلبي و إلي كتبتها اهي "في يومي الخامس" يمكن نزّلته في بدايتي ولكن ما عطيته أهميه ولا عطيته حقه .. ولكن هذا الشعر يعني لي الكثير .. دائمًا أردده بيني و بين نفسي .. في السيّاره .. إذا كنت ماشي بروحي و ساكت .. قريب جدًا مني هذا الشعر .. حبّيت إني أفسر هذه الأبيات بهذه القصة القصيرة أيضًا ..

في شهر نوفمبر 2009

مكالمه هاتفيّة

الحبيب : الو ..
الحبيبه : هلا حبيبي ..
الحبيب : ها حبيبتي وينج ؟ خلّصتي Classich ؟
الحبيبه : إي قبل شوي .. و الحين بروح الأفينوز .
الحبيب : مشالله .. كل يوم أفينوز ؟ صارلج إسبوع نايمه اهناك بعد الجامعه جنج إستانستي ؟
الحبيبه : يعني شقاعد أسوي أنا ؟ بروح مع رفيجاتي ؟
الحبيب : شنو يعني شقاعد أسوي أنا ؟ أدري مو قاعده تسوين شي .. و أدري بتروحين مع رفيجاتج يعني بتروحين مع رفيجج مثلاً ؟ بس ترى إنتي قاعد تروحين كل يوم .. و ترى في شباب هناك ما عندهم شغل كل يوم قاعدين و يشوفون الي رايح و الي راد .. فما أتوقع إن شكلج حلو كل يوم رايحه و قاعده اهناك .. و مو على بنه أنا أسكت مره و مرتين تستانسين على الوضع .. بس لين أسكت أنا أقول ميخالف تبي تستانس و تبي تغيّر من جوها و فترة إمتحانات بس قدري شوي إني مثل ما أنا أخليج قولي في واحد يخاف و يغار علي ..
الحبيبه : (بنبرة عالية شوي) و أنا شكو بالناس ؟ دام إني محترمه نفسي مالي شغل بأحد .. و بعدين ترى أنا مليت أوكي صح إنت حبيبي و كل شي بس إنت ما تآمرني وإذا بسوي الشي ترى أسويه أنا من كيفي ..
الحبيب : (يضحك) مشالله عليج .. اسلوبج روعه .. سبحان الله بليل شي و الصبح شي ثاني .. دام إنج تتكلمين بلسان مو لسانج و يعلمونج شلون تصيرين جذي ما طحتي على وحده قلبها و لسانها طيّب تعلمج شلون تتكلمين ؟ مشالله عليج و على رفيجاتج صج عرفوا شلون يغيرونج ..
الحبيبه : تكلم عدل و أنا محد يقولي سوي جذي و قولي جذي .. أنا أعرف شسوي و أعرف شقول فاهم !!
الحبيب : (يضحك) لا مو فاهم .. بس على العموم أنا أخليج مع اليهال رفيجاتج إلي معاج .. الحمدلله والشكر 23 سنه و ليلحينكم جذي ؟ عيل شخليتوا حق البنات الصغار و الي بسن المراهقه ؟
الحبيبه : أقول ترى إنت مو أخوي ولا أبوي أوكي ؟ و يالله أنا بروح .. باي ..
الحبيب : بايات :)

من بعد هذه المكالمه .. لم يتّصل أي احد بالآخر لمدة شهرين ..

إلى أن حصل ما حصل في هذا التاريخ

5 - 1 - 2010

ليلة الأربعاء .. الحبيب جالس في المخيّيم مع أصحابه .. و كان يلعب "كوت بو 6" وفي منتصف "القيد" إذا بمسج يصل إليه ..

يمسك الهاتف

يرى بأن المسج من الحبيبه

فتح المسج


رمى الورق و قال لأحد زملاءه أن يكمل مكانه اللعب ..

خرج من الخيمه ..

جلس على الكرسي

مسك الهاتف و قرأ المسج أكثر من 50 مره و لم يستوعب ما يقرأ .. بهذه السهوله ؟ بعد 6 سنوات من التعب و الشقاء "تجازيني بمسج" ؟ من أجل ماذا ؟ "لبس ؟ طلعات ؟ الإهتمام بشؤون الناس و إهمال كل ما يعنيني ؟"

"شلون ؟ شلون خذتت هالقرار أبي أفهم شلون ؟؟ متى صار ؟ وين ؟ شلون أبي أفهم شلووون ؟ ماني مصدق إلي قاعد يصير والله ماني مصدّق" .. حتى ما لمحتلي !!؟ ما قالتلي ترى في ناس يولي ؟؟ شلووووون شلوووووووووون ؟؟

"يرن الهاتف".. أمي ؟ (جنها حاسه إن فيني شي)

الحبيب : الو ..
الأم : هلا يما شلونك ؟
الحبيب : "خانقته العبره" الحمدلله ..
الأم : وينك يما نايم ؟
الحبيب : بالبر .. لا مونايم ..
الأم : عيل ليش تكلمني جذي .. صخّه مافي أحد يمك ..
الحبيب : يما .. الحبيبه تزوّجة اليوم !!
الأم : شنوووووووووووووو ؟؟ إنت منصجك ؟؟ شلون و شدراك و شنو صار ؟
الحبيب : "لا يستطيع التكلم من البكاء"
الأم : يا بعد عمري والله .. شلون يا يما شلون صار جذي ؟ لا حول ولا قوّة إلا بالله العلي العظيم .. والله ما تستحي على ويّها .. إنزين إسكت عاد و قولي شسصار بالضبط ؟
الحبيب : بس وصلني مسج منها قبل شوي كاتبه "أنا ترى ملجت اليوم" ..
الأم : استغفر الله العلي العظيم .. هذا و إنت قايلها أمي و خواتي بيونلج شهر 2 .. 6 سنين معاك ما اعرفت تنطرك شهر ؟ صج ما تستحي على ويّها ..

دام السكوت بين الأم و الحبيب لدقيقه و الأم تهمس بصوت خفيف " استغفر الله العلي العظيم .. من وين يتلنا هالمصيبه .. لا حول ولا قوة إلا بالله العلي العظيم"

الأم : يا يما يا حبيبي .. هدّي بالك و هذي مو آخر الدنيا .. إنت الف وحده تتمناك والله .. شهاده .. حسب و نسب .. أخلاق .. جمال .. ريّال قد المسؤولية .. تتحمل كل البلاوي .. و لاعب والكل يعرفك والحمدلله .. معاك الحق تزعل مو لأنها راحت لا والله .. لأنك تعبت معاها والله و أنا أدري يما .. لا تضايق عمرك ولي يسلمك و إلي يبيعك بيعه يا يما .. أدري ماراح تقدر تنسى اليوم و ما أبي اقولك إنسى مابي أقص عليك ولا تقص على نفسك .. بس أنا أدري إنت ريّال كبير و تعرف شتسوي و تعرف شلون تفكّر .. تحمّل يا يما و الله يعينك و الله يسامحها و يسامح إلي كان السبب ..
الحبيب : الله كريم .. روحي نامي إنتي يما و أنا شوي و بنام و خير إنشالله ..
الأم : على راحتك يا يما .. بس عفية لا تنام و إنت متضايق و تغيض نفسك مو زين يا يما ولي يسلمك .. و إذا ودك تكلمني دق علي أي وقت أنا قاعده إنزين ؟ و أنا راح أدق عليك إذا قاعد رد علي إنزين يما ؟
الحبيب : إنشالله يما .. يالله تصبحين على خير ..
الأم : و إنت من اهله يما .. الله يحفظك ..

ست 6 سنوات تبدو سهله في القول أحيانًا .. مسك الهاتف .. دخل على الآله الحاسبه .. 365 × 6 = 2190

2190 يوم .. 2190 يوم أعطيتها كل ما أملك فيه ..

دعني أرى كم ساعه قضيتها و أنا في حُبّها .. 2190 × 24 = 52560

52 الف 560 ساعه ..

امممممم .. 60 × 52560 = 3,153,600

3,153,600 دقيقه .. إذًا أريد أن أعرف .. كم مره نبض قلبي و قال أحبك ؟؟

60 × 3153600 = 189,216,000

189 مليون و 216 الف نبضه .. وفي كل نبضه يقول قلبي .. أحبك !!

يا ربي .. كل هذه السنين .. الأيام .. الساعات .. الدقائق والثواني ضاعت من عمري لأجلها .. سحقًا لهذا الزمن .. و بكل برود يصل إلى هاتفي هذا المسج ؟

أخذ قلمه و أوراقه و كتب

في يومي الخامس


في يومي الخامس من السنه الجديده


نزل دمعي حاملن معه كل حزن


وبديت أذكر معه كل لحظه بالدقيقه


وأشعر إن حبي معه خيال و وهم


جتني تقول ملجت و حطيت إيدي بإيده


اذبحتني سهامك جتني ضرباتها بالجفن


الله يلعن ذيك السهام مادريت إنها سديده


كنت أشيلك طول الأيام كنت أنومك فالحضن


ولكن اسمعيني وافهميني ولا تحسبي إنك فريده


ترى مثلك ياحبيبي كثار منهم بالزمن


شلت قلبي من محله و عطيتك فوقه وريده


بعتي قلبي يابنت الناس يابنت الأصايل والقيم


مابي أقول إنك قوية لكن بقول إنك حديده


قصدي إنك ميت إحساس و إن مشاعرك كفن


يعني قصدي إنها ميته و إن كلامي شفيده


مو مهم هذا الكلام خليني أتكلم بالأهم


أنا حبك يابنت الناس والله ما أريده


ما أبي حب كله هموم و حسره و ألم


ماني خابر ان البنات دلعهن صار عنيده


أنا خابر كلام الرجال دايم حلقه بالإذن


مابي ألفّك بالكلام و بمشي معك سيده


إنتي ثقلن بالأبحار يغرّق أحلى السفن


ولكن زوجك أمانه كوني لو مره عضيده


كوني يمه في الشدايد كوني يمه في الهمم


ولحظه قبل ما أرحل في شيٍ بزيده


أبي منك تصونينه ولا خلا ولا عدم


و إن ما سمعتي كلامي تراني بعيده و أعيده


و إن ما فهمتي كلامي تراني برسمه لك رسم

هناك 22 تعليقًا:

bokeh of magic * يقول...

تبي الصراحه هذا الحبيب الله يحبه اللي وخر عنه هالبنت من دربه ..
و مثل ما دارت ظهرها حق حبيبها بتدور ظهرها لغيره
و الله انه القصيده شي مو طبيعي
حبيتها حيل اهيا مو بس وصفت احساسك حتى بينت انت شنو و هالبنت شنو ..
بسم الله الرحمن الرحيم «الخبيثات للخبيثين و الخبيثون للخبيثات و الطيبات للطيبين و الطيبون للطيبات»

تسلم ايدك يااخوي

Katkoota xD يقول...

ماشالله عليك

عيني عليك بارده

توصل الكلام بسهولة

انا اقرا الكلام و احس بقلبي غصه

احس نفسي بمكان الحبيب يا كرهه من شعور

شعور الندم و الحسره على اللي فات

عدم القدره على كره من تحب على رغم من خيانته

الخيانه صعبه و الاصعب ان الانسان اللي تحبه و تصونه يبيعك بهالسهوله

قلمك رسم الطبيعة و بكلماتك لونتهاا

تحياتي

Seema* يقول...

اللي تغير مو الزمن, اللي تغير هو نفوس البشر
قبل لا طرت بالدنيا مشكلة تعاون الكل لها
والحين لأبسط خلاف نفترق
شصار؟ محد راضي يقتنع, محد راضي يفهم ان التضحية لازمة, محد مستعد يتغير لا على خاطر الثاني ولا على شان نفسه..

كلمات مؤثرة!

هديــل يقول...

الله عليك

صج عشت معاهم وتأثرت ..

الله يعينه ويعين قلبه :(

تسلم الايادي

Girls and Kuwait City يقول...

ماكو نصيب و الله مو كاتب ... صدقني خيره :)

alB6h يقول...

مساء الخير
اول شي انا همن حبيت طريقتك .. يمكن هالطريقة اطلع اللي في قلبك وتهون ع نفسك ونشاركك ولو جزء من اللي داخلك ..
كتاباتك لها نغمة عجيبه ما انسها بسرعة وانا اقري اقول انا قاريه قاريه الابيات وين وين ؟؟!
جان ارجع حق مواضيك اللي منزلهم واشوف انك كنت كاتب هالخواطر الحزينة واني قرايتها وقلت رايي واللي حسيته<< استانست اني مو ناسيه كتاباتك:)

المهم الحين حبيت اللي كتبته اكثر بعد القصة .. الحب بهالدنيا مثل الجو وخاصة "جو الكويت" مره غيم مره مطر وفجأة غبار!! .. بس صدقني الانسان لما يحب ما يشوف الانسان اللي جدامه عدل .. او يمكن الناس عندها الحب من الاشياء اللي ممكن يستهينون فيها اللي عكس الناس نبضهم للحب شي حساس جدا !!

هذا درس و درس قوووي يعور حيييل بس يعلم .. وتذكر ان الدنيا دورة اللي خانك في يوم بيي اليوم اللي يخونونه ..

يعطيك العافية

Antonio يقول...

البتشينو ..

روايتك للاحداث ولا أروع ...

وهالشخص مثل ما قالت والدته بيلقى الاحسن ..

وهذا حال الدانيا ..

الطيبون للطيبات
والخبيثين للخبيثات

مبدع يا البتشينو ...

تقبل احترامي الكبير ...

Al Pacino يقول...

Being One
الحمدلله على كل حال و إنشالله تكون خيره حق الأثنين ..

و مثل ما قلتي و مثل ما ينقال بو طبيع ما ايوز من طبعه ..
و أشكرج على رايج بالقصيده و على وصفج للحبيب و الحبيبه .. و على فكره في شي في مدونتج جذبني لها واااااااايد بس ماراح أقول إنشالله مع الأيام تعرفين :)

صدق الله العظيم .. خير آيه إخترتي

الله يسلمج و يخليج عزيزتي

شكرًا لمرورج .. أفرحني كثيرًا

تقبّلي أشد إحترامي لك

دمتي لي بألف خير

Al Pacino يقول...

Katkoota xD
تسلملي عيونج يالغالية

و إنشالله على طول أكون جذي و أوصل الكلام بسرعه لكم

سلامت قلبج عسى إنشالله بعدونج عزيزتي ..

هذا الحب و هذي سواليفه شسوي بعد مسكين :)

إلي يحب عمره ما يكره .. و دام إن الحبيبه اكرهته أو خانته أو أي شي سوت من هالأشياء .. فأكيد إن عمرها ما حبته :)

الله كريم إنشالله

شكرًا لمديحك الذي يخجلني دائمًا ..

تقبّلي ودي و تقديري و أشد إحترامي لك ..

دمتي لي بألف خير

Al Pacino يقول...

Seema

والله كلاكج هو عين الصواب .. نعم البشر هم الي تغّيروا مو الزمن .. الزمن ماشي و ناس تيي و تروح ..

هناك الكثير من الناس أختي تعشق من كل قلبها .. ولا تريد من العشيق شيء .. سوى التقدير .. الإحترام .. قليل من التضحيه .. ولكن في هذا الوقت كما قلتي .. أبسط خلاف نفترق ..

أتمنى أن تكون مؤثّره ..

والله ليسعدني مرورك الدائم لمدونتي

و هناك الكثير من الأسباب ..

تقبّلي ودي و تقدري و أشد إحترامي لك

دمتي لي بألف خير أختي

Al Pacino يقول...

هديــل

الله عليج إنتي والله .. شكراً لمرورج أختي

أتمنى أن تكون كلمات ذلك .. تجعل القارئ يتأثر فيها و يعيش أحداثها ..

الله كريم إنشالله

الله يسلمج و يخليج لمدونتي إنشالله

تقبّلي ودي و إحترامي الشديد

دمتي لي بألف خير

Al Pacino يقول...

Girls And Kuwait City

كلمات قصيره .. تحمل معنى كبير ..

إنشالله تكون خيره للأثنين

شكراً لمرورك و إهتمامك بمدونتي أختي

تقبّلي أمنياتي لك

أشد إحترامي ..

دمتي لي بألف خير

Al Pacino يقول...

alB6h
مساء النور هلا والله عزيزتي

مو بس جذي .. أحس هالطريقه لين تقرى الأبيات تذكر المواقف إلي بالقصه و تركب كل بيت في موقف معيّن .. ولكن السجع إلي بالقصيده دائمًا يعطي نكهه للقصه ..

ونستيني والله بكلامج .. الحمدلله إن كلامتي ترّسخ في الذهن و في الأذن .. مشكوره وايد و والله مرورج دائمًا يونسني ..

فعلا أختي تشبيهك في الحب صحيح و واضح و أنا دايمًا أقول إن هالمشاكل ساعات إهي إلي تحلّي العلاقه إذا كان في عل و رضى .. ولكن إلي كان يشوفه الحبيب من الحبيبه هو مث ما يقولون "تفلسف زايد".. وفعلا الحبيب دائمًا ينظر إيجابيات الحبيب الآخر و يبعد كل السلبيات و من الخطأ إنك ما تقوم بتصليح هذه السلبيات لأنها مع الوقت راح تكبر و تزيد .. و لكن الحب مثل ما يقال .. أعمى ..

أكيد و إنشالله الحبيب بيتعلم من هالمواقف و هالعلاقه ..

الله يعافيج و يسلمج أختي

تقبّلي دعواتي لك

شكرًا لمرورك الدائم أختي

دمتي لي بالف خير

Al Pacino يقول...

Antonio

الغائب الحاضر
الغائب في المدونه و الحاضر في قلوبنا

شكرًا لك أخي على كلامك الطيب ..

و أنا أتفق معك بما قالته والدت الحبيب

شكرًا لمرورك أخي

تقبّل ودي و تقديري و أشد إحترامي لك

دمت لي بألف خير

نـ(المطيري)ـازكـ يقول...

سؤال يطرح نفسة ..

و مجرد فضـول لا اكثر ..

هالقصص حقيقية !! من عاشق ما لقى الا الجفى !!

Al Pacino يقول...

أختي فدك المطيري ..

نعم .. قصة حقيقية .. ولو بالعكس مافي أي فضول ..

شكرًا لمرورك عزيزتي ..

تقبّلي أطيب أمنياتي لك

دمتي لي بألف خير

امراةٌ حُبلى بالعشقِ ، يقول...

أخيه ..
ما في أعز من دمعة رجل ..
-
بدأت أحب حبركْ ..
ستجدني هنا دائماً ..

Unique Girl يقول...

هالبوست اول مره اشوفه !!

غريبه

المهم خلني اقول

شعوووور لايحسد عليه

الله يعين من كان بهالمحل

يمكن اهي ماتستاهله وين هالأيام تلقى واحد يخاف عليها

لأن الدنيا صارت تخوف

واهي مو مهتمه ولا تقعد وتتنرفز بعد

ولما دزت المسج كنت متوقعه شنو بداخله وهذا يأكد على عدم شعورها وعدم ملكها لقلب يحس او ينبض

شلون تسوي هالحركه انا بعرف !!

الله يسلمك مني الحبيب حس بألم لأن ماتوقع هالشي

شوف شنو كان موقف الحبيبه لو تحط حالك من حالها

راح تقول والله لحر قلبه وأخليه يتحسف على كل دقيقه ضيعها

محد قاله يعصب ويكلمني بهالطريقه بتزوج عشان اثبت له ان الف واحد يتمناني


هذا التفكير يمكن اهو الي جرها حق الي سوته

انا ابصم لك بال10 انها راح تبجي دم اذا قرت الي كتبته

لأنها اتخذت قرارها بدون تفكير وسبب لها بلاوي


انا طولت عليك سوووري يمكن تكون القصه من وحي الخيال بس انا عبرت عنها سواء خيال او حقيقه

تقبل ودي واحترامي

دام قلمك ..

Al Pacino يقول...

امراةٌ حُبلى بالعشقِ

أحب كلمة أخّييه :)

صدقتي أختي .. دمعة الرجل عزيزه ..

و بدأت أعشق مرورك :)

أتمنى أن تكوني دائمًا هنا

شكرًا لمرورك عزيزتي

Al Pacino يقول...

Unique Girl

و أنا بعد قلت غريبه شلون ما مرت علي Unique

كان عندي صديق .. هو لحد الآن صديقي قال لي كلمه و فالحقيقه دائمًا آخذ بها .. قالي ترى البنت ما تدري شنو تبي .. و لين أشوف البنت ساعات أقول فعلًا البنت ما تدرين شنو تبي ..

إنها لا تملك قلب .. أنا أجزم بذلك :)

مثل هذه الناس يا أختي لا يأثر بهم قلم و حبر و كلمات صادقه :)

ولو إخذي راحتج كثر ما تقدرين أنا استمتع بتعليقاتج وايد .. و هذي القصّة من الواقع .. الواقع القريب أيضًا :)

شكرًا لك أختي و شكرًا لمرورك ..

تقبّلي ودي و تقديري و أشد إحترامي لك

دمتي لي بألف خير

koko يقول...

اتعب وانا اقووول روووووعه
:( :( :(
مو قادره حتى اعبر الي بداخلي
بس اقولك تسلم ايـدك المبدعه :)

Al Pacino يقول...

KoKo

الله يسلمج و يخلّيج و إنشالله ما تتعبين
ليش الساد فيس ؟ :(
الله يسلمج و يخليج .. كلامج يخجلني عزيزتي

تقبّلي أشد إحترامي لك

دمتي لي بألف خير