welcome

welcome to my bloge :)

الأحد، 8 أغسطس 2010

? شخص مجهول ؟





(أهجره ؟)


ليه مستغربه ؟ إيه تهجرينه ..


إبعدي عنك هالمشاعر والغرور ..


ترى ماهي حاجه أبي منك تتركينه ..


(والزواج ؟)


شنهو زواج ؟


إتركي كل هالأمور ..


ماتجيبلك أي سرور ..


لي كلّمك سوّي نفسك تسمعينه ..


وإنتي ولا بالبال و خلك دوم تجهلينه ..


والخيانه أبيها بعقلك حضور ..


(ويش أسوي لو درى إني بقربك ؟)


(أخاف إنه يهيج ..)


(أخاف إنه يثور !)


أبي قلبك تحرقينه ..


وتدفنينه بأعمق بحور ..


إسمعيني ..


جي وقتك تلهّينه ..


سوّي نفسك تصارحينه ..


وان حكى لابد تغالطينه ..


إبكي و حسسي قلبك طهور ..


ترى هو مسكين ..


تهزّه هذي الأمور ..


كل شي بنيتيه ابي منك تهدمينه ..


حتى زهوره أبي تسقيها خمور ..


(تقصد إني أتحايل بالظهور؟)


كل الأمور تسمحك تبعدينه ..


ولكن أنا مابي نهاية هذي السطور ..


أبي منك تأسرينه ..


وبالوحده تعانقينه ..


وعلى غفله تطعنينه ..


كذا إنتي تبعدي عن إسمك طيور ..


(وشنهو أصير من بعدها؟)


(أقدر أقطع كل الجسور؟)


وتصبحي بين الثعالب والنمور ..


وكل شر قلبك يتبدّل شرور ..


..


الحبيب : كل هالكلام صار بينك و بينها في عشرتي ؟


شخص مجهول : إي نعم ..


الحبيب : بس تعال .. ما قتلي منو معاي ؟


شخص مجهول : معاك الخيانه ..


و إذا قتلها هالكلام ذكرها فيني و قولها ..


..


و أنا اللي من أجله تجاملينه ..


و أنا إللي من أجله تجرحينه ..


أنا إلي وانتي معه تسرحينه ..


و أنا اللي لي سألك قلتيله أتحرى لك عطور ..


بإختصار .. أنا الخيانه ..


إلي دوم تعاشرينه ..

هناك 17 تعليقًا:

~أم حرّوبي~ يقول...

لا لا صج شسالفة
وااايد قاعدة اسمع طاري الخيانة
كل الخواطر اللي اقراها القصص
حتى بالراديو اغنية الخيانة لنبيل شعيل وراشد الماجد
وش قاعد يصير ؟؟

الله يبعد عنكم وعنا كل خيانة يااارب ..وماتشوفونها بحياتكم أبد ..
والله يهدي الخاينين ويطهر قلوبهم

تحيتي~

Katkoota xD يقول...

الخيانة اصبحت ظاهره منتشره هذه الايام

الكل يفعلها بمجرد ان اصدقاءهم فعلوها

ظناً ان فعلتهم هذه دليل على قوه شخصياتهم

لكن للاسف فهذا ان دل .. دل على ضعفهم و خضوعهم لفكر الاخرين

شكراً على القصيده المميزه

اشد احترامي

تحياتي

Unique Girl يقول...

وااااااااااااااااااااااااو

ما اقدر اعلق بعد كلامك فكرتك روعه أمبيه حيل عجبتني

ماشالله عليييك

جك جك جك جك جك <<يعني اصفق

Engineer A يقول...

الخيانة شعور كريه .. بغيض .. وان شاءالله ما تتعرض له أبد

كل الود

NoNa يقول...

أخيس شعور بالدنيا الخياانة
مدونتك عجبتني حييييييل
قريت كل المواضيع اللي منزلهم
سالفة الهدية عورت قلبي حييييييل
وسالفة المسج اللي بالمخيم والملجة ضيقة خلقي
ممكن سؤال ؟
انت لاعب شنو؟!
قدم - يد - سلة - طائرة الخ

وسوري عالازعاج خيوو :)

Seema* يقول...

لا يعجبني إتجاه ما أقرأ فهو برغم روعة كتابته يميل إلى السوداوية.. ترى الدنيا بخير! :)

Antonio يقول...

كلمات جميلة البتشينو واحساسها رائع ..

ومثل ما قالت الاخت سيما ترى الدنيا بخير :)

مبدع البتشينو دائما ..

مدونتك لي استمتاع لاقصى الحدود ..

:)

Al Pacino يقول...

أم حرّوربي

إختي .. الشي السيء دايمًا تلاقينه في الساحه و ينطرح في سوق العشّاق ..
أما الوفاء .. فدائمًا أشببه في البيوت السعيده .. فالبيوت السعيده ليس لها أصوات :)

شكرًا لمرورك عزيزتي

دمتي لي بألف خير

Al Pacino يقول...

Katkoota xD
الخيانه موجوده في كل زمان و مكان .. ولكن في السابق لم نكن نستطيع التحدّث عنها لعدّة أسباب .. عدم وجود الإنتشار في هذه السهوله في النت و المواقع ..

أما الآن فمن السهل أن نوصل هذه الرساله ..

كلامك جدًا جميل و دائمًا يسعدني مرورك ..

و أرجو أن تعجبك قصائدي دائمًا أختي

شكرًا لمرورك

دمتي لي بألف خير

Al Pacino يقول...

Unique Girl

إنتي دايمًا تحرجيني بكلامج :$

شكرًا لج و تسلم إيدج إلي تصفّقلي :)

شكرًا لمرورج إختي

مع أطيب أمنياتي لك

دمتي لي بألف خير

Al Pacino يقول...

Engineera A

الخيانه مثل السيف .. عندما يأتيك من الأمام .. يدخل بأعماق قلبك .. ولا تشعر به إلا عندما يخرج من ظهرك ..

تعرّضت له كثيرًا

شكرًا لمرورك مهندستنا .. والله يحققلج حلمج يا رب

دمتي لي بألف خير

Al Pacino يقول...

NoNa

الخيانه في نظري لا تملك أي شعور عندما تحدث .. فقط تتذكّر كل ما هو كان يخرج منّك من وفاء

إصراحه أحرجتيني وايد و ونّستيني أكثر بوايد يوم دريت إنج قريتي كل المواضيع والله صج صج استانست :D

و زين إعجبتج فرّقتنا هديّه ..

و هم تجازيني بمسج :D والله استانست يوم قريت تعليقج ..


أما عن سؤالج يا إخت NoNa الجديده ..
إصراحه مادري شقولج .. أنا يوم فتحت هذي المدونه .. فتحتها عشان أتكلم و أفضفض و أقول سوالفي حق ناس .. لا أعرفها ولا تعرفني .. و بنفس الوقت يكونون قراب منّي حيل .. أنا عندي ربع و عندي دوانية و الحمدلله .. بس وضع المدوّنه غير .. أحب إني أحتفظ بأشياء تكون مثل ما يقولون سيكرت .. و من هالأشياء إن ما أقول أنا شنو إسمي و شنو العب عشان أقدر آخذ راحتي جدام الناس و أكون إنسان عادي حال حال أي واحد بالمدونه .. لأني إن قلت أنا شنو العب و شنو إسمي يمكن إخواني و خواتي إلي في المدونه راح تعرف أنا منو وأنا هالشي ما أبيه عشان أقدر آخذ راحتي .. سامحيني و أتمنى إن هالشي ما يزعلج مني لأني ما أقدر أقول أنا شنو العب ..

و ولو مافي أي إزعاج هالمدونه مدوّنتج و حيّاج الله بأي وقت ..

تقبّلي أشد إحترامي و تقديري لك

دمتي لي بألف خير

Al Pacino يقول...

Seema

عساها تكون بخير .. و إنشالله الأمل موجود

شكرًا لمرورج إختي

دمتي لي بألف خير عزيزتي

Al Pacino يقول...

Antonio

شكرًا لك يا أخي على كلامك الجميل

و مثل ما قلت للإخت سيما .. عساها تكون بخير :)

أشكرك مره أخرى عزيزي على مديحك

أتمنى أن تكون مستمتع في المدوّنه أخي

شكرًا لمرورك

تقبّل أشد إحترامي و أمنياتي لك

دمت لي بألف خير

alB6h يقول...

مساء الخير
مبدع دائما بكلماتك وطرحك وهذا الشي مو يديد عليك ومو غريب ..
وانا اقرى كلماتك تخيلت حديث الفنس لفنس لما يضعف ايمان الشخص او تخونه ارادته او حتي يكون جاحد مع اللي اكرمه بشعوره واحساسه .. الخيانة صفة يتصفه الناس اللي عندهم الذات وحب الذات المرتبة الاولى .. ومثل ما تردد دائما وحفظتها منك واللي ما معنه لو مافي خيانة مافي حب باختصار لو مافي شي اللي مو حلو ما راح نحس بالشي الحلو :)

يعطيك العافية ع ابداعك ودام هالابداع ع الوجود
نتظر المزيد :)

Al Pacino يقول...

alB6h
مساء النور ..
مشكوره و ماقصرتي على كلامج الطيّب و المخجل الحقيقه ..
هذا الشيء إلي أبي القارئ يحس فيه و الحمدلله إنج حسّيتيه :)

كلامج جميل أختي alB6h و أخجلتيني مره ثانية يوم قلتج إني مثل ما دايمًا أقول ;$

الله يعافيج و شكرًا لكلامج الجميل يا alB6h الجميله ..

شكرًا لمرورج ..

دمتي لي بألف خير

غير معرف يقول...

أسعدت بزيارة هذه المدونة للمرة الأولى وبالصدفة....

شدني ما كتبت عن الخيانة..فهي آفة منتشرة بشكل كبير في أغلب قصص الحب المزيفة ..فأنا لا أعتبرها خيانة للحبيب بل للأسف أعتقد أنها خيانة لذلك الحب العظيم في ذلك الزمن الجميل ..الزمن الذي مضى...

دمت بود وحب:)