welcome

welcome to my bloge :)

الاثنين، 15 أغسطس، 2011

لما الله يحاسبنا ؟




بسم الله الرحمن الرحيم ..

الحقيقه كان ودّي اكتب الموضوع في البداية في اللغة العربية بس قلت يفضّل ان اكتبه باللغه العاميّة عشان اقدر اشرح بالتفصيل تفاصيل الموضوع بما إن مهم ..
الموضوع موضوع اجتهاد و دراسه و تعليم ومنطق و استيعاب العقل بالنسبه لي ..
واعتقد الموضوع كل ماكان كلامه وايد كل ما تتعقد الأمور والمسائل .. ولكن لازم أذكر فيه الأمثله عشان تتضح المسأله أكثر ..
سؤال طرحته على نفسي قبل سنين و بحثت عن إجابته .. ما اقول إن اجابته صحيحه .. لأن بالنهاية الله أعلم .. ولكن هذا ما يدخل فيه العقل والمنطق ..
ليش الله عز وجل يحاسبنا دام الله كاتب لنا شنو بنسوي بحياتنا وكاتب لنا كل شي من أول ما ننولد إلى ان يأخذ امانتنا ؟
ومع ذلك شلون إحنا مخيّرين ؟ لأن إذا الله كاتبلنا كل شيء فإحنا مسيّرين !!

مثل ما قلت لازم اذكر أمثله ..


----------


مثال و سؤال رقم واحد :
اب طلب من ولده يبوق من رفيجه فلوس .. راح الولد باق الفلوس .. ورجع حق ابوه و قاله أنا بقت ..
ردّة فعل الأب : أنا راح أعاقبك لأنك بقت و ماراح تطلع من البيت شهر كامل لأن البوق شي غلط ..
ردّة فعل الولد : انزين انت قتلي بوق و انت تعاقبني ؟ شلون ؟
السؤال : مو الأب قال حق الولد روح بوق ؟ ليش يعاقبه ؟
الجواب: "هالشي أصلًا ما يصير لأن مافيه أي من العدل ولا المنطق"


{وَمَا اللَّهُ يُرِيدُ ظُلْمًا لِّلْعِبَادِ}


----------


خل نطبّق هذا الشي على حياتنا ..
مثال وسؤال رقم اثنين :
رجل .. شرب الخمر والعياذ بالله .. يعني سوّه معصية ..
هل هذا الرجل يحاسب يوم القيامه على المعصية ؟
بتقول إي ..
راح اقولك ليش مو الله كاتب ان يشرب الخمر ؟ لأن الله كاتب على جبينه ان راح يسوّي كل شي من أوّل ما ينولد إلى ان ياخذ أمانته
راح تقول بس الله مخيّر الإنس والجن ..
وهني راح تبدى النقطه الأهم في الموضوع ..


----------


ياللي تقرى الموضوع .. انسى الكلام اللي فوق قلته كلّه و ركّز الحين ..
اخذ جزء و تجربه من حياتك اليومية و طبّقها على المثال اللي بقوله الحين ..
راح اقول مثال من حياتي اليومية ..
كنت طالب في كلية التربية الأساسية .. كان في دكتور اسمه حسين المكيمي .. حارس نادي اليرموك و نادي القادسية قبل والمنتخب .. كان يدرسني منهج كرة قدم ..
بعد ما حضرت عنده كلاس و كلاسين ..
عرفت ان الدكتور كان يكتب على السبوره بالقلم الأزرق .. و ما يغيره ..
السؤال : لو تعطيني ورقه و تقولي اليوم الدكتور بأي قلم راح يكتب ؟
الجواب : راح يكون جوابي ازرق ..
لنفرض ان صح ييه و كتب بالأزرق .. هل هذا معناته إن أنا ساحر أو أنا أجبرته ؟
الجواب لأ .. لأن أنا هذا "مدى معرفتي بالشخص نفسه" من جذي كتبت ان اهو راح يكتب بالأزرق ..

----------


شرايكم نشوفها من جهه ثانية و بنفس المثال ..
ولده معانا بنفس الكلاس .. عطيناه ورقه و انا ورقه ..
السؤال : اي لون راح يكتب الدكتور ؟
أنا : الأزرق
ولده : الأحمر
دخل الدكتور ..
كتب بالأحمر .. الشي ماهو غريب ان يكتب بالأزرق ولا الأحمر .. بس ولده شدرّاه ؟
راح تقولون لأن ولده و لأن اكيد يدري أن اخترب القلم الأزرق أو خلّص من جذي كتب باللون الأحمر ..
يعني نرجع حق نفس النقطه (مدى معرفة الشخص نفسه)
وصلت الفكره تقريبًا ..


----------


ولكن راح اقول الشي إللي راح يبّين الخلاصه كامله ..
مثال وأهم مثال :
أنا رجل متزوّج .. مثلًا
ابي أعطي 3 دفاتر أو أوراق ..
واحد حق زوجتي اللي ساكنه معاي بالبيت وكل يوم ..
وواحد حق امّي اللي ساكنه في بيتها و مو كل يوم معاي
وواحد حق رفيجي اللي ما اشوفه اللا بالإسبوع مرّتين ..
وبكتب سؤال : اكتب شنو اسوّي بيومي كلّه من أوّل ما أقوم من النوم إلى أن انام ..
منو تتوقّعون راح يجاوب الإجابه شبه صحيحه ؟
راح تقولون الزوجه لأنّك عايش ويّاها في بيت واحد و تعرف كل شي .. صج إن ماراح تجاوب 100% اكيد لأن في تفاصيل ماتقدر تكتبها ولكن هي الأكثر تفصيل بين الأم والصديق ..
ولكن .. لو تييب الورقه و نشوف التفاصيل صحيحه ..


السؤال .. هل هي أجبرتني اسوّي اللي كتبته ؟


هل أنا مسيّر بالورقة ؟ مع العلم الورقه كتبت قبل لا أمضي يومي ..


هل هي ساحره ؟


اكيد لأ .. مع ذلك اعرفت باللي راح اسوّيه قبل لا امضي يومي كلّه
ولكن نرجع حق نفس النقطه المهمّه بالموضوع (مدى معرفة الشخص نفسه) ..


----------


إذًا عزيزي القارئ ..


هل تعتقد بأن في احد يعرفك اكثر من الله الليي اهو خلقك ؟


أكيد لأ ..


إذًا ليش ما يقدر يكتب كل شي راح تسوّيه بحياتك دام اهو اقرب شيء للإنسان ..


{وَاعْلَمُوا أَنَّ اللَّهَ يَعْلَمُ ما فِي أَنْفُسِكُمْ فَاحْذَرُوهُ}



لذلك إنت الشي اللي تسويّه الله مو كاتبه لك عشان تسوّيه .. الله كاتبه لأن الله يعرفك أكثر من نفسك وإنت مخيّر فيه ويعرف انك راح تسوّيه ..


شكرًا للقراءة ..
نحن اجتهدنا .. والله اعلم

هناك 11 تعليقًا:

منصور الفرج يقول...

حقيقه موضوع طرى على بال أكثر الناس
و الخلاصه مثل ماقلت ان الأمر فيه خيط رفيع جداً بينهم هو أننا مسًيرين من قبل الله مخيًرين بالأرض .. بمعنى أن الانسان مسير و مخير بنفس الوقت .. كثير من الناس يخلط بين قدرته الشخصيه و قدرة الله علينا ...

بوركت أوقاتك اخوي

Seema* يقول...

تمامًا كما قرأت في كتاب "حوار مع صديقي الملحد" http://img11.imageshack.us/img11/547/7ewar.jpg

تحليل منطقي وفكر سليم
يوجيت خيرًا! :")

Unique Girl يقول...

علمتني وايد اشياء البوتشينو ..

في ميزان حسناتك ان شاء الله ..

ومشكووور على اجابه السؤال :))

موفق دوم وكل يوم

Walking_towards_you يقول...
أزال المؤلف هذا التعليق.
Walking_towards_you يقول...

دائماً هناك خط رفيع (أو لنقول أحمر) عند التطرق لمواضيع كهذه
يبدو أنك وفقت في المحافظة على عدم تجاوز هذا الخط

سعيد بمتابعتك,,, استمر

أخوك/ أمشي نحوك [الرياض]
.
.

t7l6m.com يقول...

شكرا لهذا البوست المفيد والممتع والجدير بالقراءة
بكل أمانة عجبني البوست وإحترمت تفكيركم وعقلانيتكم
عسى الله يرحمكم به ويرحمنا جميعا برحمته الواسعه

صفحات مُلطخّة بحروفي يقول...

يعطيك العافية على هذا البحث الطيّب ..
صراحةً استفدت وايد ..

-

وينك عن تويتر ؟ ليش مسحت الأكاونت ؟
ترا فاقدينك =(

aL-NooR . يقول...

افتقدناك

Katkoota xD يقول...

وينك من زماان

نسأل عنك اخوي ؟

KatkootaxD & Unique_Saroon

captain khalid يقول...

وينك من زمان ؟؟

اشتقنا لك ^^

نترياك بأسرع وقت ممكن ..

أتمنى أن تكون بخير ^^

تحياتي لك خالد المازم ^^

رنـــاي يقول...

جزاك الله خير ,,, و حبيت أضيف شي بعد
قال رسول الله صلى الله عليه و سلم :" لا يرد القضاء إلا الدعاء ." :)
و شكرا لطرحك هذا الموضوع المهم !!