لما الله يحاسبنا ؟

بسم الله الرحمن الرحيم ..

الحقيقه كان ودّي اكتب الموضوع في البداية في اللغة العربية بس قلت يفضّل ان اكتبه باللغه العاميّة عشان اقدر اشرح بالتفصيل تفاصيل الموضوع بما إن مهم ..
الموضوع موضوع اجتهاد و دراسه و تعليم ومنطق و استيعاب العقل بالنسبه لي ..
واعتقد الموضوع كل ماكان كلامه وايد كل ما تتعقد الأمور والمسائل .. ولكن لازم أذكر فيه الأمثله عشان تتضح المسأله أكثر ..
سؤال طرحته على نفسي قبل سنين و بحثت عن إجابته .. ما اقول إن اجابته صحيحه .. لأن بالنهاية الله أعلم .. ولكن هذا ما يدخل فيه العقل والمنطق ..
ليش الله عز وجل يحاسبنا دام الله كاتب لنا شنو بنسوي بحياتنا وكاتب لنا كل شي من أول ما ننولد إلى ان يأخذ امانتنا ؟
ومع ذلك شلون إحنا مخيّرين ؟ لأن إذا الله كاتبلنا كل شيء فإحنا مسيّرين !!
مثل ما قلت لازم اذكر أمثله ..

----------

مثال و سؤال رقم واحد :
اب طلب من ولده يبوق من رفيجه فلوس .. راح الولد باق الفلوس .. ورجع حق ابوه و قاله أنا بقت ..
ردّة فعل الأب : أنا راح أعاقبك لأنك بقت و ماراح تطلع من البيت شهر كامل لأن البوق شي غلط ..
ردّة فعل الولد : انزين انت قتلي بوق و انت تعاقبني ؟ شلون ؟
السؤال : مو الأب قال حق الولد روح بوق ؟ ليش يعاقبه ؟
الجواب: "هالشي أصلًا ما يصير لأن مافيه أي من العدل ولا المنطق"

{وَمَا اللَّهُ يُرِيدُ ظُلْمًا لِّلْعِبَادِ}

----------

خل نطبّق هذا الشي على حياتنا ..
مثال وسؤال رقم اثنين :
رجل .. شرب الخمر والعياذ بالله .. يعني سوّه معصية ..
هل هذا الرجل يحاسب يوم القيامه على المعصية ؟
بتقول إي ..
راح اقولك ليش مو الله كاتب ان يشرب الخمر ؟ لأن الله كاتب على جبينه ان راح يسوّي كل شي من أوّل ما ينولد إلى ان ياخذ أمانته
راح تقول بس الله مخيّر الإنس والجن ..
وهني راح تبدى النقطه الأهم في الموضوع ..

----------

ياللي تقرى الموضوع .. انسى الكلام اللي فوق قلته كلّه و ركّز الحين ..
اخذ جزء و تجربه من حياتك اليومية و طبّقها على المثال اللي بقوله الحين ..
راح اقول مثال من حياتي اليومية ..
كنت طالب في كلية التربية الأساسية .. كان في دكتور اسمه حسين المكيمي .. حارس نادي اليرموك و نادي القادسية قبل والمنتخب .. كان يدرسني منهج كرة قدم ..
بعد ما حضرت عنده كلاس و كلاسين ..
عرفت ان الدكتور كان يكتب على السبوره بالقلم الأزرق .. و ما يغيره ..
السؤال : لو تعطيني ورقه و تقولي اليوم الدكتور بأي قلم راح يكتب ؟
الجواب : راح يكون جوابي ازرق ..
لنفرض ان صح ييه و كتب بالأزرق .. هل هذا معناته إن أنا ساحر أو أنا أجبرته ؟
الجواب لأ .. لأن أنا هذا "مدى معرفتي بالشخص نفسه" من جذي كتبت ان اهو راح يكتب بالأزرق ..

----------

شرايكم نشوفها من جهه ثانية و بنفس المثال ..
ولده معانا بنفس الكلاس .. عطيناه ورقه و انا ورقه ..
السؤال : اي لون راح يكتب الدكتور ؟
أنا : الأزرق
ولده : الأحمر
دخل الدكتور ..
كتب بالأحمر .. الشي ماهو غريب ان يكتب بالأزرق ولا الأحمر .. بس ولده شدرّاه ؟
راح تقولون لأن ولده و لأن اكيد يدري أن اخترب القلم الأزرق أو خلّص من جذي كتب باللون الأحمر ..
يعني نرجع حق نفس النقطه (مدى معرفة الشخص نفسه)
وصلت الفكره تقريبًا ..

----------

ولكن راح اقول الشي إللي راح يبّين الخلاصه كامله ..
مثال وأهم مثال :
أنا رجل متزوّج .. مثلًا
ابي أعطي 3 دفاتر أو أوراق ..
واحد حق زوجتي اللي ساكنه معاي بالبيت وكل يوم ..
وواحد حق امّي اللي ساكنه في بيتها و مو كل يوم معاي
وواحد حق رفيجي اللي ما اشوفه اللا بالإسبوع مرّتين ..
وبكتب سؤال : اكتب شنو اسوّي بيومي كلّه من أوّل ما أقوم من النوم إلى أن انام ..
منو تتوقّعون راح يجاوب الإجابه شبه صحيحه ؟
راح تقولون الزوجه لأنّك عايش ويّاها في بيت واحد و تعرف كل شي .. صج إن ماراح تجاوب 100% اكيد لأن في تفاصيل ماتقدر تكتبها ولكن هي الأكثر تفصيل بين الأم والصديق ..
ولكن .. لو تييب الورقه و نشوف التفاصيل صحيحه ..

السؤال .. هل هي أجبرتني اسوّي اللي كتبته ؟

هل أنا مسيّر بالورقة ؟ مع العلم الورقه كتبت قبل لا أمضي يومي ..

هل هي ساحره ؟

اكيد لأ .. مع ذلك اعرفت باللي راح اسوّيه قبل لا امضي يومي كلّه
ولكن نرجع حق نفس النقطه المهمّه بالموضوع (مدى معرفة الشخص نفسه) ..

----------

إذًا عزيزي القارئ ..

هل تعتقد بأن في احد يعرفك اكثر من الله الليي اهو خلقك ؟

أكيد لأ ..

إذًا ليش ما يقدر يكتب كل شي راح تسوّيه بحياتك دام اهو اقرب شيء للإنسان ..

{وَاعْلَمُوا أَنَّ اللَّهَ يَعْلَمُ ما فِي أَنْفُسِكُمْ فَاحْذَرُوهُ}

لذلك إنت الشي اللي تسويّه الله مو كاتبه لك عشان تسوّيه .. الله كاتبه لأن الله يعرفك أكثر من نفسك وإنت مخيّر فيه ويعرف انك راح تسوّيه ..

شكرًا للقراءة ..
نحن اجتهدنا .. والله اعلم

غرائز رجل +18

بسم الله الرحمن الرحيم
في البداية ترددت كثيرا في كتابة هذا الموضوع .. الذي يعتبر حساس من قبل الرجل .. وبالأخص الرجل الشرقي .. وبالتحديد "الكويتي" .
كيف يفكر هذا الرجل بالعلاقة "خارج اطار" الزواج ؟
وكيف تنظر المرأة لهذه العلاقة ؟

في البداية لن اتكلم عن علاقة المراهقين .. وهم صغار السن .. اذ هم بنظري مراهقين بسبب خوضهم معركة الحياة من خلال الرغبة بتجربة كل شيء جديد لأول مرة .. لا يكتسبون الا خبرة قليلة وليس قرار الصواب الأبدي.

بل سأدخل مباشرة بحياة الجنسين منذ لقائهم الاول وتعارفهم خارج نطاق الزواج.

18+
سأتكلم بكل حرية عن واقع يحدث ويستمر في الحدوث امامي على مر السنين .. واعتذر مقدما اذ كانت هناك كلمات حساسه للبعض اذ قام بقرائتها من منظور مختلف.
نبدأ عند لقاء الجنسين في أول مرة وعن نظرت الرجل للمرأه عند محاولة الاقتراب منها .
لكن ماهو الدافع ؟ سؤال تطرحه المرأة بقلبها ولها حرية الاجابة.
اما الرجل بداية نظرته لها "جنسية" وهذه لا يختلف عليها رجلين اثنين وهي من "غرائزة التي فطر عليها"

هنا تبدأ القصة :
(ولكن أرجوا منك أيها القارء أن تكون في قمّة التركيز و إن شعرت بأنك غير قادر فمن الأفضل أن تغلق هذه المدوّنه و تعود إليها في وقت لاحق)

بداية التحدي للرجل هو النجاح في أي مجال .. ووضع مبرر لأي خسارة ليجعل ضميرة يرتاح (تذكّروا هذه العبارة).
المرأة : اقتَرب مني وأظهر اعجابه اعجبني واعجبته (بالنظر فقط) .
الرجل: جميلة وجذابة (بالنظر فقط) .

الرجل: الى أي بعد سوف أصل معها ؟ ماذا سأأخذ منها ؟
المرأة: سأظهر له شخصيتي المميزة ليحبني .. لكن لن أظهر حبي بصراحة له حتى يتقدم ويطلب يدي .
(هذا هو روتين بداية اي علاقه)

وهنا تبدأ نقطة مهمة والتي خلق عليها الرجل .. اذ أن الرجل اذا أحب فأنه "يعمل ويفعل" لاظهار حبه لكن لا يتكلم .. الفعل هو تعبيره عن الحب .
(الفعل هو تعبيره عن الحب .. هذا ما يفعله الرجل للمرأة إذا أحبها)

الرجل : يفكر في البداية ويقول : اذا احبتني سوف اقرر بعد ذلك ماذا سوف أفعل . (هي تريد الحب ليتقدم لها ، هو يريد الحب لكن لا يقرر ماذا بعد ذلك).
(معادلة غريبة بعض الشيء اليس كذلك ؟)
لنفسر هذه الجملة:
الرجل : لكي تحبني .. سوف أكون مثاليا لأكسب ثقتها (هذا ليس بخطأ لكنه لم يقرر ماذا بعد ذلك ) سؤال مؤجله اجابته عند كل رجل .

المرأة : الآن هو كسب ثقتي وأنا احببته .
(حان الوقت ليتقدم لي).
لكن بعد اظهار هذا الحب له بكمية كبيره جدا من قبل المرأة .. يبدأ الرجل بأسلوب لا تفهمه المرأة .
(دعونا نرى كيف ذلك)

الرجل: لقد كسبت ثقتها واحسست انها تحبني (هل بامكاني الحصول على المزيد ، نعم اريد المزيد .. غرائز رجل).
الرجل: هاتف .. اريد لقاء .. ربّما المزيد .
المرأة: تعلم انه خطأ لكن قد كسب ثقتها وهي تتمنى ذلك اللقاء.
(لقد بدأ بالحصول على المزيد).

وهنا يبدأ منحنى جديد :
عند اللقاء .. قد تحدث اشياء تنظر المرأة لها احيانا بعفوية .. لكن الرجل يبدأ يقيم هذه اللحظات بدقة متناهية.
ويتسائل هل من مزيد؟
الرجل: يسعى دائما للمزيد ليرضي غريزته التي فطر عليها .
لكن هل نقدر أن نوقف هذه الغريزة التي تدمر العلاقة ؟
هذا السؤال تكون اجابته وتكتشف بعد انتهاء كل علاقة.

انتهت العلاقة لاي سبب من الاسباب.
كيف سيبرر الرجل فشلة وخسارته؟
لماذا اهتم لفراقها:
1- هي من قالت أحبك (تريد الاستقرار).
( وأنا لم أقرر أن احبها .. واذ قلتها فانني اطمح للمزيد .. ووجدته).

2- رأيتها واعجبت بي .. وبكل تأكيد أعجبت بغيري .. وأنا لا أريد أن يعجبها سواي .. ( لماذا اهتم؟).

3- قابلتها لمستها (حصلت على ما لم يحصل عليه غيري).

4- طورت هذا الامر وتحدث معها بأمور حساسه (معاشره هاتفية) ، ارضيت بها غريزتي الاساسية . (حصلت على المزيد).

هذه نبذه ولو كانت قاسية لكنها واقعية عن تبريرات فشل علاقته التي هو من سطرها بنفسه ولم تفهما المرأة للاسف.
(واقع في مجتمعنا مع الاسف)
وتتسائل المرأة هل أنا رخيصة بنظر الرجل لهذا الحد؟
لا ، لكن عاطفتك هي من كانت تسيطر عليك .
وهو كانت غرائزة هي التي تحركه دائما .
الآن اشبع غرائزة المختلفة وأنتي قد اصبحت عاطفتك معلقة.
(انها معادلة ).

لكن ما هي كيفية النجاة ؟
قفل جميع المنافذ على الرجل يجعله يفكر بالصواب ، ويجعله يمشي في طريق واحد اليكي وهو طريق الزواج وهو ماحث عليه ديننا الحنيف.
لأن الرجل عند رغبته بالزواج فهو يعلن حاجته الغرائزية او الجنسية والتي لكي يكملها يحتاج الى التفاهم مع المرأة التي سيقترن بها وهي لاتحدث الا في حالة الخطبة الشرعية .
وللاسف نقوم نحن بالعكس عند منح الحب والتفاهم قبل اعلان رغبته الحقيقية في الزواج ( هو يسعى للمزيد دائما باختلاف الطرق).
وتأكدي اذا منعتي الرجل من اشباع هذه الغرائز ولم يتقدم لك ، فان لديه ما يشبع غرائزة بعلاقات متعددة .
(اعتذر لهذه الكلمة .. لكنها حقيقه .. ولا تنسي من دوّن هذه الكلمات هو رجل)

وهذا وللاسف واقع منتشر في عالم الذكور عامة وفي شبابنا خاصة وهذه وللاسف قصص تمثل شريحة كبيرة التقيت بها قبل كتابة هذا الموضوع .. وواقع ملموس في عالم الرجال وماهذه القصص الا نبذه بسيطه قد نقلتها من واقع وللاسف اتفق عليها شريحة كبيرة من شبابنا .
(لكل قاعدة شواذ ، لكن الشيطان دائما يزين للانسان عمله السيء)

دائما يردد كبار السن لنا:
بنات الناس مو لعبة
وسمعه البنت شرف

كنت صريح لابعد الحدود بنقل هذا الواقع وللاسف ما خفي أعظم .. وترددت كثيرا في كتابته .. لكن كان رأي أحد أصدقائي المقربين بوجوب نشر هذا الموضوع رغم حساسيته لبعض الرجال وعلاقاتهم المختلفة .. وهذه ليست الا شريحة ودائما يوجد من الخير الكثير ومن الشر الكثير .. وكما نعلم الشر يعم والخير يخص
اتمنى أن تعم الفائدة للجميع

حفظكم الله من كل شر
وأن يستر علينا بستره الى يوم الحساب
دمتم بالف خير

من شجرة واحدة تصنع مليون عود كبريت
ويمكن لعود كبريت واحد أن يحرق مليون شجرة
لذلك لاتدع أمر سلبي واحد يؤثر على ملايين الايجابيات في حياتك

I'm Arabic Man !!

السلام عليكم

في المعسكر .. ماكو شي .. خلاص الروتين صار واحد .. من زمان طبعًا .. حتى التمرين بدى يبّين علينا التعب .. أكثر من 50 يوم و أنا أتمرن صبح و عصر أكيد بصير في Load على الجسم و على الأجهزه الحيويه بالجسم .. مو هذا موضوعي .. خلصت المسلسلات إلي عندي و بديت أسأل الأهل عن مسلسلات حلوه موجود في الموقع العالمي Youtube فقالتلي أحد أقربائي ..

بنت الخاله : تحب تشوف مسلسل ياباني ..
أنا : أقول يالله عاد يالله .. شدعوه لي هالدرجه ماكو شغل ..
بنت الخاله : شوف .. أنا كنت أقول نفسك إن ويع و ماكو شغل و شهالسخافه .. بس بعدها والله العظيم إن تحسّفت قد شعر راسي على الكلام إلي قلته ..
أنا : شدعوه .. عاد إنتوا البنات كله تبالغون .. أوكي قولي حلو بس مو لي هالدرجه ..
بنت الخاله : والله العظيم يا ولد خالتي إن شي مو طبيعي .. ترى اهو شويّه 11 حلقه .. و قصّة حقيقية ..
أنا : امممممم عن شنو ؟
بنت الخاله : عن وحده يابانية .. إسمها آيا .. كانت تعيش حياتها عادية .. و بعدين بدت تحس في بعينها و بجسمها شي مو طبيعي .. إنها ما تقدر تقدّر المسافات يعني إذا بتسمك شي ما تدري اهو قريب وله بعديد .. و بالبداية ماكانت تقول حق أحد إن فيها هالشي .. مع الأيام قام يبّين عليها بشكل كبير .. المرض إلي فيها اهو مرض "تقلّص في المخيخ" و هذا التقلّص يموّت الخلايا في المخ و يفككها .. و السبب غير معلوم .. بس ماراح أحرق عليك المسلسل إنت شوفه بروحك ..
أنا : إنزين حلوه آيا :p ؟
بنت الخاله : لووووووووووول والله إنك مينون الحين هدّيت القصه كلها و سألتني إذا حلوه وله لأ .. صج إنك فاضي ..
أنا : لا أتغشمر معاج .. شوفي أنا بشوف الحلقه الأولى .. و عقب الحلقه تدرين إن ما عجبتني ؟ والله أزوجج ياباني غصبن عليج :P
بنت الخاله : لووووووووووول .. صدّقني إنك راح تحب آيا .. تدري شنو عوّرت قلبي :( والله شي مو طبيعي المسلسل ..
أنا : إنزين شسمه أكتب آيا بس ؟
بنت خالتي : لأ لأ .. إسمه "لتر واحد من الدموع"
أنا : امممم .. عجبني إسمه ..


يا جماعه .. المسلسل شي خياااااااااااااال .. و صج آيا يابانية بس و رب الكعبه حلوه !! لي درجة إن المنتخب كله قاعد يطالعه الحين .. و المنتخب كله أول شي كان يضحك علي .. و كل واحد إيي يقط علي قطه و يطلع .. يقولي صج صرت مينون آخر المعسكر .. و الحين كل ما أدش على واحد الغرفه الاقيه حاط المسلسل و مندمج ..

إييييي و أبيكم تلاحظون نفسكم .. راح تحفظون كلمتين .. "أريجاتّو" و "أوهايوووووو" حبيت هالكلمتين .. و على فكره ترى المسلسل مترجم ..

و هذي آيا حبيبتي :(

==========================

اليوم باقيلي إسبوع بالضبط للعوده إلى أرض الوطن إن شاء الله .. يعني باقيلي 6 أيام و السابع أطير بالضبط .. فكنت قاعد جان أقول دام إني ما عندي شغل .. و تو الناس على التمرين .. ليش ما أسوي جناطي و أحط كل الملابس إلي ماراح ألبسهم بالجناط ؟ جان أقوم و أطلع جنطتي من الكبت .. و أطلع جنطتي الثانية مالت و إنتو بكرامه الجواتي .. و أطلع كل ملابسي .. و أفرش شرشف بالأرض .. و أصفّط قطعه قطعه .. عاد أنا بالتصفيط ترى والله وايد زين لا يغركم صبي و مادري شنو ترى كل شي أعرف :P

و هذيل الجنطتين ..

و هذي جنطة الملابس ..

و هذي جنطة الجواتي و إنتو بكرامه .. طبعًا مليون جوتي عادي :P 3 حق التمرين .. و غير ملوت الطلعات و غير ملوت الركض و شاري من هني 4 جواتي .. بس زين أنا راح أرجع على التركية .. و التركية تعطي 30 كيلو الوزن .. فيكفّي .. الكبيره فيها 25 كيلو يمكن .. و الصغيره ما توصل 5 و إذا وصلت يطوفون لأني أنا طالع من الكويت 33 كيلو و ما قالولي شي .. أدري بتقولون إنزين الحين زادوا أغراضك أكيد بيزيد وزن الجنطه بس لأ أنا وايد أشياء يبتها معاي من الكويت و راح اخليها هني وايد وايد بعد مو شويه .. يمكن فوق ال 8 كيلو ..

==========================

عشان أثبت لكم إني ينّيت .. هني كنت رايح المطعم بتعشى و كانت معاي المترجمه قاعد أسولف وياها .. إسمها إيفا .. بنية بولندية عمرها 23 سنه .. جان أشوف هذي فوقي

لووووووووووول أدري الصوره غبية بس إن طيّاره جان أصورها شوفوا النقطه البيضه هذي ليتاتها .. جان تقولي إيفا Are you baby ? أنا لووووووووووووووووول أكلمها كويتي يا إيفا 53 Days بس لي متى .. إهي تقول بليز I'm not kuwaitia talk to me polski :P ..

قبل لا أدخل المطعم في شباب بولنديين قاعدين بره مريت أنا و إيفا جان يتكلمون بالبولندي و يضحكون .. جان إيفا توقف و تعصب و تكلمهم بولندي و اهمه قاعد يردون عليها و أنا مستغرب شسالفه !!؟
جان أقول حق إيفا

What's wrong ؟

جان تقولي

Nothing they say something bad about you!

جان أنا أوقف و أقوله بكل هدوووووووء

I don’t know what you said .. but I think you understand the English language .. I'm Arabic man .. And if the Arabic man wanna kill some one .. he will kill him .. and kill he's family .. also he's baby .. I mean he's love .. so beware next time ..maybe I will kill you soon ..

طبعًا يا جماعه لا تشوفون شسصار فيه و شسصار بإيفا عقب ما قلت له جذي .. أول ما دخلت المطعم جان تقولي صج راح تذبحه .. قتلها إنتي مينونه ؟ شذبح فيه بس لازم نخرع هالأشكال .. جان تقولي تدري إني صدقتك :P كنت تتكلم و إنت واثق من نفسك و عيونك تخرّع ..

طبعًا إنتوا ما تدرون ليش صار كل هذا .. أنا شوي مربي لحيتي و صايره طويله .. و مثل ما توقعت الشي إلي قالوه طلع صح .. فعقب ما قعدت مع إيفا و سألتها شنو قال جان تقولي قالوا شوف الإرهابي قاعد يمشي و ويّاه وحده حلوه .. فأنا لين قتله إني عربي و إني راح أذبحك و أذبح أهلك تعّمدت إني أقول جذي عشان أضبط الدور مع اللحيه .. للأسف في ناس متخلفه مثل هالأشكل لازم تخوّفهم .. شوي وله دشوا المطعم و قاعد يطالعوني جان ينادون إيفا .. جان تيني إيفا تقولي إعتذروا مني و هم يقولولك إحنا آسفين أنا لوووووووووووووول ..

للأسف .. ممشى مشرف

بسم الله الرحمن الرحين ..

مثل ما تدرون أنا حالياً خارج الكويت و بالتحديد في بولندا .. كنت قاعد مع ربعي في غرفة من غرف اللاعبين و نسولف عن كل شي و طبعاً كل واحد يتكلم عن سالفة معينه .. و من بين السوالف يابوا سالفة الصبيان في هالوقت شلون يتحرشون في البنات و إن في ناس صج صج صج ما تستحي و ولا جنهم عايشين بالكويت .. فيت سالفة على بالي و قلتلهم إياها طبعاً عقب ما قلتها كلهم قالوا بيروحون ممشى مشرف أول ما نرجع الكويت إنشالله .. لأن السالفه إلي صارتلي كانت هناك ..

عشان تكونون بالصوره و نتكلم من البداية .. أنا في كل بداية موسم تدريبي أحب إني أبدى بروحي و مجرد أركض قبل لا أدخل في الجدول إلي مدته 10 أشهر طبعاً و يضمن هذا الجدول المعسكرات و البطولات و كل شي .. فمثل ما قلت أنا أحب أبدى بروحي لمدة 3 أسابيع بس أركض و أهيئ العضله و أدخّل فيها الدم من بعد ما ريّحت لمدة شهر تقريباً .. والمكان إلي أحب أركض فيه اهو ممشى مشرف ولو إن آخر مره إخترب من بعد ريحة المجاري للأسف ..

إلي يروح ممشى مشرف باستمرار راح يحفظ وجوه الناس إلي هناك و أنا في الحقيقه أواجه وايد ناس أعرفهم و مجرد ما أمر يمهم بس أقول "السلام" و أمشي يعني .. لأن في وقت تدريب و ماله داعي كل دقيقه أوقّف و أسلم .. بو حسين أبو رفيجي و د.عبدالمجيد البناي و اهو دكتور المنتخب كل يوم أشوفهم مشالله عليهم يسوون رياضه في الممشى .. و كذلك في بنات و حريم كبار أشوفهم يومياً و حفظت زولهم و مشيتهم من بعيد .. مو القصد إني أخزهم وله أتحرش لا والله حشى بس إن يكونون جدامك و يمشون عكسك فمجرد إنك تركض و راسك سيده راح تشوفهم ..

في آخر إسبوع من ال 3 أسابيع ما أذكر بأي يوم كان .. أنا أبدى من جهة خط فحيحيل أركض 3 كيلو و 500 و أرجع 3 و 500 طبعاً عشان أروح حق سيارتي و بالتالي أنا ركضت 7 كيلو ..

تخيّلوا وياي الموقف من البداية .. بديت أركض .. ركضت .. ركضت .. ركضت .. و الiPod بأذوني .. و أسلم على إلي أعرفهم و الوضع حيل طبيعي .. وصلت لي ال 3 كيلو و 500 و رجعت ..
قاعد أركض .. أركض .. أركض .. ما اشوف إلا جدامي بنت يمكن فيها 27 او 28 .. يايه جدام ويهي و قاعد تحرك إيدها و عينها بعيني و أنا مو قاعد أسمع شي لأني حاط ال iPod . شلت ال iPod و وقفت وله أسمعها

تقول : إنت ما تستحي على ويهك و إنت ما أذيتنا و إنت و إنت !!
أنا : (منصدم و مبتسم شوي و مادري شنو السالفه) ..
جان أقولها : عفواً إختي شفيج ؟
جان تصرّخ : شنو فيني إنت قاعد تلحقنا أنا ويا رفيجتي كل يوم و إحنا ساكتين بس عاد امصخت !!
جان أقولها : أنا الحقكم ؟ أول شي وين رفيجتج ؟ ثاني شي شلون ألحقج و إنت يايتلي من جدام أصلاً ؟
جان تقول : رفيجي كاهي وراك ..
لفيت ورى وله رفيجتها بعيده عني يمكن ب 400 متر بعييييده حييل يعني ..
جان أقولها : إنزين إنتي يايه من جدامي .. و رفيجتج وراي آخر الدنيا .. شلون قاعد أتحرش فيكم فهميني ؟؟؟
جان تقول : إنت كل يوم تمر يمنا و تمر جدامنا و تروح و ترد علينا ..
طبعاً الناس قاعده تمشي و إطالع الموقف ..
و فجأة !!!!
وله بنتين .. يوقفون و يسإلوني إنت مو اللاعب فلان الفلاني ؟
أنا إي نعم ..
جان يقولون حق البنية : شنو إنتوا ماعندكم شغل هديتوا الممشى كله و كلمتوا الريال و اهو ماله شغل فيكم و إحنا كل يوم نشوفه محترم نفسه إيي يركض و يمشي كافي خيره شره و إنتو مني و الدرب توقفونه و إنت تتحرش فينا ؟؟

أنا ما حبيت يصير أكثر من جذي .. جان أقول الحمدلله والشكر .. لأن انا دايماً إذا شفت الشخص إلي جدامي سفيه ما أحب أرد عليه و مثل ما يقال "أخاف لا الناس ما تفرّق منهو فينا السفيه" و قلت حق البنت إلي وقفت معاي مشكوره و ما قصرتي .. و كملت مشي لأني صج وقتها تضايقت و مالي خلق اركض ..
سؤالي ؟؟!!
يا جماعه أنا لي الحين السؤال إلي ماني عارف جوابه .. شلون انا قاعد أتحرش فيهم و البنت إلي كلمتني يايه من جدام يعني عكسي يعني بالعقل ما يصير أشوفها إلا لحظه إلي تمر جدامي بس ؟؟
ثاني شي .. أنا أكيد مريت على رفيجتها لأن رفيجتها قاعد تمشي مشي عادي و بنفس إتجاهي .. بس والله والنعمه إني ما أدري إني مريت على رفيجتها لأنها أصلاً معطتني ظهرها ؟؟
ثالث شي أنا إلي استنتجته إن البنت الي قاعد تمشي نفس مساري يوم مريت عليها دقت على رفجتها و قالتلها عني إني مريت يمها أو شي فرفيجتها يتلي مفتلته من جدام عرفتوا شلون صارت السالفه ؟ كانو متفقين إن يمشون عكس بعض عشان يتلاقون ..

و بس عقب ما صارت السافه صج صج صج تضايقت و صكّت فيني الدنيا لأن الموقف كان محرج جدام الناس .. و إنتوا تدرون إذا صار مثل هالموقف أكيد الناس بتقول إن الريال اهو الغلطان و أكيد اهو صج متحرش !!
قعدت أمشي و مطفّي ال iPod لين مر يمي بو حسين أبو رفيجي و قالي ها غريبه قاعد تمشي ؟ جان أمشي معاه و قتله السالفه و الموقف إلي صار .. اهو انصدم و قالي خل يولون أفا عليك هذيل بنات شافوك مالك شغل بأحد و مو معطيهم ويه و يدرون إنك لاعب فقالوا خل نتحرش فيه .. و بس رجعت البيت و أذكر يومها كله متضايق لي ثاني يوم ..

اليوم الثاني طبعاً الي انقهرت فيه أكثر و أكثر .. أول شي قررت ما أروح الممشى .. بعدين قلت يا معوّد أخرب جدولي عشان هالأشكال .. رحت .. بديت أركض .. و أول ما بديت تقريباً بعد 200 متر وله ألقاهم قاعد يمشون بنفس مساري جدامي و معطيني ظهرهم .. يوم مريت جان التفت عليهم و أخز إلي كلمتني لين ما نزّلت راسها و إبتسمت !! انا قاعد أقول بقلبي أفففففففف إبتسمت !! صج إنها ما تستحي على ويّها !!! يعني أشكره إلي أمس مسويته بس فلم ؟؟ لي هالدرجه ماكو تربيه ؟ والله طول ما أنا أركض و أنا منصدم من إلي صار أمس و اليوم ..

و بالرجعه بعد 3 كيلو و 500 هم واجهتهم و كانوا ثنتينهم منزلين راسهم .. عاد كملت لين خلصت و رجعت السياره و رديت البيت ..