welcome

welcome to my bloge :)

الثلاثاء، 13 يوليو 2010

للأسف .. ممشى مشرف





بسم الله الرحمن الرحين ..

مثل ما تدرون أنا حالياً خارج الكويت و بالتحديد في بولندا .. كنت قاعد مع ربعي في غرفة من غرف اللاعبين و نسولف عن كل شي و طبعاً كل واحد يتكلم عن سالفة معينه .. و من بين السوالف يابوا سالفة الصبيان في هالوقت شلون يتحرشون في البنات و إن في ناس صج صج صج ما تستحي و ولا جنهم عايشين بالكويت .. فيت سالفة على بالي و قلتلهم إياها طبعاً عقب ما قلتها كلهم قالوا بيروحون ممشى مشرف أول ما نرجع الكويت إنشالله .. لأن السالفه إلي صارتلي كانت هناك ..

عشان تكونون بالصوره و نتكلم من البداية .. أنا في كل بداية موسم تدريبي أحب إني أبدى بروحي و مجرد أركض قبل لا أدخل في الجدول إلي مدته 10 أشهر طبعاً و يضمن هذا الجدول المعسكرات و البطولات و كل شي .. فمثل ما قلت أنا أحب أبدى بروحي لمدة 3 أسابيع بس أركض و أهيئ العضله و أدخّل فيها الدم من بعد ما ريّحت لمدة شهر تقريباً .. والمكان إلي أحب أركض فيه اهو ممشى مشرف ولو إن آخر مره إخترب من بعد ريحة المجاري للأسف ..

إلي يروح ممشى مشرف باستمرار راح يحفظ وجوه الناس إلي هناك و أنا في الحقيقه أواجه وايد ناس أعرفهم و مجرد ما أمر يمهم بس أقول "السلام" و أمشي يعني .. لأن في وقت تدريب و ماله داعي كل دقيقه أوقّف و أسلم .. بو حسين أبو رفيجي و د.عبدالمجيد البناي و اهو دكتور المنتخب كل يوم أشوفهم مشالله عليهم يسوون رياضه في الممشى .. و كذلك في بنات و حريم كبار أشوفهم يومياً و حفظت زولهم و مشيتهم من بعيد .. مو القصد إني أخزهم وله أتحرش لا والله حشى بس إن يكونون جدامك و يمشون عكسك فمجرد إنك تركض و راسك سيده راح تشوفهم ..

في آخر إسبوع من ال 3 أسابيع ما أذكر بأي يوم كان .. أنا أبدى من جهة خط فحيحيل أركض 3 كيلو و 500 و أرجع 3 و 500 طبعاً عشان أروح حق سيارتي و بالتالي أنا ركضت 7 كيلو ..

تخيّلوا وياي الموقف من البداية .. بديت أركض .. ركضت .. ركضت .. ركضت .. و الiPod بأذوني .. و أسلم على إلي أعرفهم و الوضع حيل طبيعي .. وصلت لي ال 3 كيلو و 500 و رجعت ..
قاعد أركض .. أركض .. أركض .. ما اشوف إلا جدامي بنت يمكن فيها 27 او 28 .. يايه جدام ويهي و قاعد تحرك إيدها و عينها بعيني و أنا مو قاعد أسمع شي لأني حاط ال iPod . شلت ال iPod و وقفت وله أسمعها

تقول : إنت ما تستحي على ويهك و إنت ما أذيتنا و إنت و إنت !!
أنا : (منصدم و مبتسم شوي و مادري شنو السالفه) ..
جان أقولها : عفواً إختي شفيج ؟
جان تصرّخ : شنو فيني إنت قاعد تلحقنا أنا ويا رفيجتي كل يوم و إحنا ساكتين بس عاد امصخت !!
جان أقولها : أنا الحقكم ؟ أول شي وين رفيجتج ؟ ثاني شي شلون ألحقج و إنت يايتلي من جدام أصلاً ؟
جان تقول : رفيجي كاهي وراك ..
لفيت ورى وله رفيجتها بعيده عني يمكن ب 400 متر بعييييده حييل يعني ..
جان أقولها : إنزين إنتي يايه من جدامي .. و رفيجتج وراي آخر الدنيا .. شلون قاعد أتحرش فيكم فهميني ؟؟؟
جان تقول : إنت كل يوم تمر يمنا و تمر جدامنا و تروح و ترد علينا ..
طبعاً الناس قاعده تمشي و إطالع الموقف ..
و فجأة !!!!
وله بنتين .. يوقفون و يسإلوني إنت مو اللاعب فلان الفلاني ؟

أنا إي نعم ..
جان يقولون حق البنية : شنو إنتوا ماعندكم شغل هديتوا الممشى كله و كلمتوا الريال و اهو ماله شغل فيكم و إحنا كل يوم نشوفه محترم نفسه إيي يركض و يمشي كافي خيره شره و إنتو مني و الدرب توقفونه و إنت تتحرش فينا ؟؟


أنا ما حبيت يصير أكثر من جذي .. جان أقول الحمدلله والشكر .. لأن انا دايماً إذا شفت الشخص إلي جدامي سفيه ما أحب أرد عليه و مثل ما يقال "أخاف لا الناس ما تفرّق منهو فينا السفيه" و قلت حق البنت إلي وقفت معاي مشكوره و ما قصرتي .. و كملت مشي لأني صج وقتها تضايقت و مالي خلق اركض ..
سؤالي ؟؟!!
يا جماعه أنا لي الحين السؤال إلي ماني عارف جوابه .. شلون انا قاعد أتحرش فيهم و البنت إلي كلمتني يايه من جدام يعني عكسي يعني بالعقل ما يصير أشوفها إلا لحظه إلي تمر جدامي بس ؟؟
ثاني شي .. أنا أكيد مريت على رفيجتها لأن رفيجتها قاعد تمشي مشي عادي و بنفس إتجاهي .. بس والله والنعمه إني ما أدري إني مريت على رفيجتها لأنها أصلاً معطتني ظهرها ؟؟
ثالث شي أنا إلي استنتجته إن البنت الي قاعد تمشي نفس مساري يوم مريت عليها دقت على رفجتها و قالتلها عني إني مريت يمها أو شي فرفيجتها يتلي مفتلته من جدام عرفتوا شلون صارت السالفه ؟ كانو متفقين إن يمشون عكس بعض عشان يتلاقون ..

و بس عقب ما صارت السافه صج صج صج تضايقت و صكّت فيني الدنيا لأن الموقف كان محرج جدام الناس .. و إنتوا تدرون إذا صار مثل هالموقف أكيد الناس بتقول إن الريال اهو الغلطان و أكيد اهو صج متحرش !!
قعدت أمشي و مطفّي ال iPod لين مر يمي بو حسين أبو رفيجي و قالي ها غريبه قاعد تمشي ؟ جان أمشي معاه و قتله السالفه و الموقف إلي صار .. اهو انصدم و قالي خل يولون أفا عليك هذيل بنات شافوك مالك شغل بأحد و مو معطيهم ويه و يدرون إنك لاعب فقالوا خل نتحرش فيه .. و بس رجعت البيت و أذكر يومها كله متضايق لي ثاني يوم ..

اليوم الثاني طبعاً الي انقهرت فيه أكثر و أكثر .. أول شي قررت ما أروح الممشى .. بعدين قلت يا معوّد أخرب جدولي عشان هالأشكال .. رحت .. بديت أركض .. و أول ما بديت تقريباً بعد 200 متر وله ألقاهم قاعد يمشون بنفس مساري جدامي و معطيني ظهرهم .. يوم مريت جان التفت عليهم و أخز إلي كلمتني لين ما نزّلت راسها و إبتسمت !! انا قاعد أقول بقلبي أفففففففف إبتسمت !! صج إنها ما تستحي على ويّها !!! يعني أشكره إلي أمس مسويته بس فلم ؟؟ لي هالدرجه ماكو تربيه ؟ والله طول ما أنا أركض و أنا منصدم من إلي صار أمس و اليوم ..

و بالرجعه بعد 3 كيلو و 500 هم واجهتهم و كانوا ثنتينهم منزلين راسهم .. عاد كملت لين خلصت و رجعت السياره و رديت البيت ..

هناك 14 تعليقًا:

Seema* يقول...

يخاطبني السفيه بكل قبحٍ فاكره أن أكون له مجيبا
يزيد سفاهةٍ فأزيد حلما كعودٍ زاده الأحراق طيبا
الصمت خير إجابة! :)
ضحكتني, اللي واثق من نفسه ما يسوي سواتها.

ونعيش وتنسى!

alB6h يقول...

ترد بالسلامة ان شاء الله .. وموفق
اممممم حركة البنت وايد جرئية وقوية , ومو حلوه بحقها اللي سوته , لان اول شي غير انها يايه عكسك غير جذي انت قاعد تركض متي يمديك تخزها , واذا كنت تخزها شلون عرفت اذا مو اهي قاعده تخزك !؟

الظاهر شافتك ومثل ما تفضلت لاعب فحبت تسوي اي حركة تلفت انتباهك .. لا يضيق خلقك ع هالسوالف بالعكس عطهم ظهرك وكمل بكل ثقه لانك ما سويت شي غلط ..

ويعطيك العافية

Hope يقول...

والله بنات هالوقت ينخاف منهم o_O
الصراحه ما تستحي على ويهها .. بعد مخططه حق السالفه!!
ما عليك منهم ولا تعطيهم ويه ، اركض ولا لك شغل فيهم ولا جنهم موجودين.. ولا تضيق خلقك ما يستاهلون

Al Pacino يقول...

Seema

بلا شك حضرتني هذه الأبيات بيني و بين نفسي بعد هذه الحادثه ..

والحمدلله إني فعلت الصواب

و صاجه والله أنا قلت نفس الشي لا واثقه من نفسها من تسوي إلي سوته

و الله كريم

شكراً على مرورك الجميل

Al Pacino يقول...

alB6h

الله يسلمج إنشالله .. أجمعين

الشيء الطبيعي والشياء المندرج في جميع أنحاء العالم و في هذه الدنيا إن الرجل هو الي دايماً يبادر إذا إنعجب بمرأة و هو إلي يقوم بالخطوه الأولى .. فحتى لو كانت إهيا قاعد تخزني بس المنظور العام الرجل هو المخطئ و في نظر الناس البنت مستحيل تتحرش بالرجل ..

الله يسامحها إنشالله و أنا مو متضايق و ما أتضايق على هالأشكال بس وقتها تضايقت لأن حسيت نظرت الناس لي كانت مو حلوه .. بس الله نقذني في بنات الحلال إلي وقفوا معاي

شكراً على مرورك الجميل والأكثر من رائع ..

دمتي بألف خير

Al Pacino يقول...

Hope ..

صحيح ولكن مو كل البنات بالعكس في وايد بنات زينين و أكثر من الشينين .. بس لأنهم زينين فإحنا من نشوفهم و دايماً الشي الشين يلفت النظر و نشوفه .. ولكن الزينين موجودين ..

و مثل ما قلت حق الإخت alB6h أنا مومتضايق الحين بس وقتها تضايقت و الحين عادي تجربه و مريت فيها :)

شكراً على مشاركتج و مرورج الجميل و الأكثر من رائع ..

دمتي بألف خير

Antonio يقول...

البتشينو ...

الله يعينك على هالمواقف الصعبة الصراحة

ومثل ما قالوا الخوات ملك شغل بحد وريح بالك

والله يا البتشينو سالفه غريبه

والواحد يعيش ويشوف العجب

دمت بالف خير
والله يردك بالسلامة ان شاء الله

غير معرف يقول...

صج قليلات أدب، مو عارفين شلون يتحرشون، ف اخترعوا هالجذبة.. الله يستر عليهم بس!.. يمكن لو انحطيت بنفس موقفك، راح أغير الممشى، شنو مافيه غير ممشى مشرف؟ أما عن ممشى مشرف الصراحة أنا ما احبه يقمت وكله زحمة وكلش ما آخذ راحتي، وأغلب الي يروحون هناك مو حق الرياضة.. وموفق يارب وترجع بالسلامة ان شالله..

حلو إنك من أنصار المشي طلعت نفسي، وأحسن شي إنك مو ماخذ المشي بس لأن عندك تدريب ولعب.. وهذا أحسن شي.. لأني ساكن بالقرين ف فيها أكثر من ممشى كل مرة أغير وأروح ممشى معين..

لا تحر أعصابك ولا تتضايقك، أنت شنو ذنبك إذا في ناس قليلين أدب وما يخلون الواحد بحاله! والله يبعد عنك البلاء والناس الصايعة يارب

عبير أكوام يقول...

بابتسامة مررت
كن بخير
والحياة مواقف وكل موقف يكون بالنسبة لنا ذكرى في مذكرتنا إما نبكي لتذكر ألمه أو نبتسم لسخافته أو سخافتنا...
رائع
في أمان الله

Al Pacino يقول...

هلا والله عزيزي Antonio

الله كريم و تساهيل إنشالله مثل ما يقولون

و عادي فترة و عدت و مثل ما قلت نعيش و نشوف العجب .. ولكن في وجهة نظري هذا مرض .. :P

شكراً على مرورك الجميل

دمت لي بألف خير

Al Pacino يقول...

قلم و مساحه

أول شي شكراً على مرورك لمدونتي وأتمنى أن ركون مرور دائم ..
ثاني شي إنت قلتها قليلات أدب .. و قتلك أول شي ياني تفكير إني ما أروح الممشى بعد خير شر للأن حسيت صار شكلي مو حلو جدام الناس .. بس بعدين قلت يا معود ما يوشوفن شر بروح و أنا الحمدلله واثق من نفسي و مو مسوي أي شي غلط .. و ممشى مشرف يمكن لأني أنا متعوّد عليه من زمان فأشوفه حلو و زين حق مشي وبالنسبه لي أعتقد إن اهو أفضل ممشى بالكويت .. و مع ذالك أحترم رايك و وجهة نظرك و أرجوا ام تسمحلي و تقبل رايي و وجهة نظري ..

شكراً على مرورك الجميل

دمت لي بألف خير

Al Pacino يقول...

عبير أكوام

شكراً لمرورك مدوّنتي و في الحقيقه خير الكلام ما قل و دل و كلام كان جداً مختصر و لكن يحمل معانه كبيره و كثيره ..

و كل من يرى الناس بعين طبعه مثل ما يقولون و مثل ما قلتي إني رائع فأعتقد إنك إنتي كذلك رائعة

تقبّلي ودي و إحترامي الشديد

نـ(المطيري)ـازكـ يقول...

اهاااا حلو حلو عرفت انك لاعب ..

ممشى مشرف مرات اروح له انا ووحدة من رفيجاتي ..

بس ما ادري احس كل واحد ماله شغل بالثاني ..

شوف هالبنات يمكن عرفوا انك لاعب ومن هالسوالف

قاموا يتحرشون فيك .. واشكرة السالفة واااضحة ..

وصلنا لهدرجة ان البنت قامت تتحرش بالريال ..

قواك الله ^_^

Al Pacino يقول...

فدك المطيري

اهاااااا يعني طحتي علي :P

إي والله ممشى مشرف وايد حلو حق الرياضه بالنسبه لي و عساج على القوة إنتي و رفيجتج ..

صج كلامج والله الممشى كل واحد بعالمه و ماله شغل بالثاني ..

غي مثل ما قلتي و تفضّلوا الي علقوا من قبل و هم ابو رفيجي وقتها قالي عشان هالسبب .. بس الله يسامحهم ..

هذا كان موضوعنا هني يوم صارت السالفه قاعد نقول إن مو بس الصبيان إلي يتحرشون في بنات يتحرشون ولكن بنسبة قليله مو كثر الشباب أكيد ..

الله يقوّيج و مشكوره على مرورج الجميل و العفوي في نفس الوقت

دمتي لي بألف خير