للأسف .. ممشى مشرف

بسم الله الرحمن الرحين ..

مثل ما تدرون أنا حالياً خارج الكويت و بالتحديد في بولندا .. كنت قاعد مع ربعي في غرفة من غرف اللاعبين و نسولف عن كل شي و طبعاً كل واحد يتكلم عن سالفة معينه .. و من بين السوالف يابوا سالفة الصبيان في هالوقت شلون يتحرشون في البنات و إن في ناس صج صج صج ما تستحي و ولا جنهم عايشين بالكويت .. فيت سالفة على بالي و قلتلهم إياها طبعاً عقب ما قلتها كلهم قالوا بيروحون ممشى مشرف أول ما نرجع الكويت إنشالله .. لأن السالفه إلي صارتلي كانت هناك ..

عشان تكونون بالصوره و نتكلم من البداية .. أنا في كل بداية موسم تدريبي أحب إني أبدى بروحي و مجرد أركض قبل لا أدخل في الجدول إلي مدته 10 أشهر طبعاً و يضمن هذا الجدول المعسكرات و البطولات و كل شي .. فمثل ما قلت أنا أحب أبدى بروحي لمدة 3 أسابيع بس أركض و أهيئ العضله و أدخّل فيها الدم من بعد ما ريّحت لمدة شهر تقريباً .. والمكان إلي أحب أركض فيه اهو ممشى مشرف ولو إن آخر مره إخترب من بعد ريحة المجاري للأسف ..

إلي يروح ممشى مشرف باستمرار راح يحفظ وجوه الناس إلي هناك و أنا في الحقيقه أواجه وايد ناس أعرفهم و مجرد ما أمر يمهم بس أقول "السلام" و أمشي يعني .. لأن في وقت تدريب و ماله داعي كل دقيقه أوقّف و أسلم .. بو حسين أبو رفيجي و د.عبدالمجيد البناي و اهو دكتور المنتخب كل يوم أشوفهم مشالله عليهم يسوون رياضه في الممشى .. و كذلك في بنات و حريم كبار أشوفهم يومياً و حفظت زولهم و مشيتهم من بعيد .. مو القصد إني أخزهم وله أتحرش لا والله حشى بس إن يكونون جدامك و يمشون عكسك فمجرد إنك تركض و راسك سيده راح تشوفهم ..

في آخر إسبوع من ال 3 أسابيع ما أذكر بأي يوم كان .. أنا أبدى من جهة خط فحيحيل أركض 3 كيلو و 500 و أرجع 3 و 500 طبعاً عشان أروح حق سيارتي و بالتالي أنا ركضت 7 كيلو ..

تخيّلوا وياي الموقف من البداية .. بديت أركض .. ركضت .. ركضت .. ركضت .. و الiPod بأذوني .. و أسلم على إلي أعرفهم و الوضع حيل طبيعي .. وصلت لي ال 3 كيلو و 500 و رجعت ..
قاعد أركض .. أركض .. أركض .. ما اشوف إلا جدامي بنت يمكن فيها 27 او 28 .. يايه جدام ويهي و قاعد تحرك إيدها و عينها بعيني و أنا مو قاعد أسمع شي لأني حاط ال iPod . شلت ال iPod و وقفت وله أسمعها

تقول : إنت ما تستحي على ويهك و إنت ما أذيتنا و إنت و إنت !!
أنا : (منصدم و مبتسم شوي و مادري شنو السالفه) ..
جان أقولها : عفواً إختي شفيج ؟
جان تصرّخ : شنو فيني إنت قاعد تلحقنا أنا ويا رفيجتي كل يوم و إحنا ساكتين بس عاد امصخت !!
جان أقولها : أنا الحقكم ؟ أول شي وين رفيجتج ؟ ثاني شي شلون ألحقج و إنت يايتلي من جدام أصلاً ؟
جان تقول : رفيجي كاهي وراك ..
لفيت ورى وله رفيجتها بعيده عني يمكن ب 400 متر بعييييده حييل يعني ..
جان أقولها : إنزين إنتي يايه من جدامي .. و رفيجتج وراي آخر الدنيا .. شلون قاعد أتحرش فيكم فهميني ؟؟؟
جان تقول : إنت كل يوم تمر يمنا و تمر جدامنا و تروح و ترد علينا ..
طبعاً الناس قاعده تمشي و إطالع الموقف ..
و فجأة !!!!
وله بنتين .. يوقفون و يسإلوني إنت مو اللاعب فلان الفلاني ؟
أنا إي نعم ..
جان يقولون حق البنية : شنو إنتوا ماعندكم شغل هديتوا الممشى كله و كلمتوا الريال و اهو ماله شغل فيكم و إحنا كل يوم نشوفه محترم نفسه إيي يركض و يمشي كافي خيره شره و إنتو مني و الدرب توقفونه و إنت تتحرش فينا ؟؟

أنا ما حبيت يصير أكثر من جذي .. جان أقول الحمدلله والشكر .. لأن انا دايماً إذا شفت الشخص إلي جدامي سفيه ما أحب أرد عليه و مثل ما يقال "أخاف لا الناس ما تفرّق منهو فينا السفيه" و قلت حق البنت إلي وقفت معاي مشكوره و ما قصرتي .. و كملت مشي لأني صج وقتها تضايقت و مالي خلق اركض ..
سؤالي ؟؟!!
يا جماعه أنا لي الحين السؤال إلي ماني عارف جوابه .. شلون انا قاعد أتحرش فيهم و البنت إلي كلمتني يايه من جدام يعني عكسي يعني بالعقل ما يصير أشوفها إلا لحظه إلي تمر جدامي بس ؟؟
ثاني شي .. أنا أكيد مريت على رفيجتها لأن رفيجتها قاعد تمشي مشي عادي و بنفس إتجاهي .. بس والله والنعمه إني ما أدري إني مريت على رفيجتها لأنها أصلاً معطتني ظهرها ؟؟
ثالث شي أنا إلي استنتجته إن البنت الي قاعد تمشي نفس مساري يوم مريت عليها دقت على رفجتها و قالتلها عني إني مريت يمها أو شي فرفيجتها يتلي مفتلته من جدام عرفتوا شلون صارت السالفه ؟ كانو متفقين إن يمشون عكس بعض عشان يتلاقون ..

و بس عقب ما صارت السافه صج صج صج تضايقت و صكّت فيني الدنيا لأن الموقف كان محرج جدام الناس .. و إنتوا تدرون إذا صار مثل هالموقف أكيد الناس بتقول إن الريال اهو الغلطان و أكيد اهو صج متحرش !!
قعدت أمشي و مطفّي ال iPod لين مر يمي بو حسين أبو رفيجي و قالي ها غريبه قاعد تمشي ؟ جان أمشي معاه و قتله السالفه و الموقف إلي صار .. اهو انصدم و قالي خل يولون أفا عليك هذيل بنات شافوك مالك شغل بأحد و مو معطيهم ويه و يدرون إنك لاعب فقالوا خل نتحرش فيه .. و بس رجعت البيت و أذكر يومها كله متضايق لي ثاني يوم ..

اليوم الثاني طبعاً الي انقهرت فيه أكثر و أكثر .. أول شي قررت ما أروح الممشى .. بعدين قلت يا معوّد أخرب جدولي عشان هالأشكال .. رحت .. بديت أركض .. و أول ما بديت تقريباً بعد 200 متر وله ألقاهم قاعد يمشون بنفس مساري جدامي و معطيني ظهرهم .. يوم مريت جان التفت عليهم و أخز إلي كلمتني لين ما نزّلت راسها و إبتسمت !! انا قاعد أقول بقلبي أفففففففف إبتسمت !! صج إنها ما تستحي على ويّها !!! يعني أشكره إلي أمس مسويته بس فلم ؟؟ لي هالدرجه ماكو تربيه ؟ والله طول ما أنا أركض و أنا منصدم من إلي صار أمس و اليوم ..

و بالرجعه بعد 3 كيلو و 500 هم واجهتهم و كانوا ثنتينهم منزلين راسهم .. عاد كملت لين خلصت و رجعت السياره و رديت البيت ..