welcome

welcome to my bloge :)

الجمعة، 9 يوليو 2010

فرّقتنا هدية


ما أجمل الهدية عندما تكون غير متوقعه في وقت غير متوقّع .

هذا الجمله دائماً تعجبني و أؤمن بها كثيراً منذ صغري ، دعونا نرى قصة جميله تحت هذه الجمله التي عسى أن تؤمنوا بها .

حبيب و حبيبه ، يعشقون بعض لحد الجنون ، يعيشون أجمل فترات الحب في حياتهم و هم في عمر ال 20 ، بس لحظه !! قبل لا أحكي هذه القصه أرجوا من كل بنت وضع نفسها في مكان الحبيبه ، وكل رجل يضع نفسه مكان الحبيب ، و أن تكون لوحدك في غرفه مظلمه قليلاً .

دعونا نقرأ القصه :

الحبيب يحدّث نفسه : ودي أشتري حق حبيبتي هدية ، ولكن هذي الهدية ودي تكون غير ، ودي لين أييب الهدية و تشوفها حبيبتي تقول (الله كل هالأشياء أنا أتمنّاها و أبيها و حبيبي يابلي إياها ) و بجذي حبيبتي راح تحبني أكثر و تعرف إني فعلاً أبي أحقق لها كل شي تبيه .

بس شنو إهي كانت تبي ؟ أنا أذكر مره قالتلي (حبيبي شام عطر فلنتينو ؟ اليوم بالجامعه شميته على رفيجتي مشالله صج حلو) ، و هم أذكر مره سألتها شنو اللابتوبات الزينه لأن بخاطري آخذ لابتوب ؟ جان تقول الحبيبه ( حبيبي أنا شايفه لابتوب توشيبا صج مو طبيعي و إذا فكرت أنا باخذ راح آخذه فليش ما تشوفه؟ ) فأنا قلت دام إنها ما شرت ليلحين لابتوب خل أييبلها إياه.

و راح الحبيب و يابلها العطر و اللاب توب.

هم الحبيب قاعد يتذكّر شنو الأشياء إلي بخاطرها لأن مثل ما قال يبي يسوي الهدية عجيبه غريبه و يبيها تكون غير عن كل الهدايا ، جان يتذكّر الحبيب !

الحبيب يحدّث نفسه: إي أنا أذكّر مره شفتها بالسوق و شايله بيدها جيس من ديبن هامز و سألتها شنو هذا قالتلي سيت مكياج و يوم سألتها جنه قالتلي ماركته HR مادري العكس بس أذكر إن كانو هالحرفين ، و إي صح حبيبتي الحين داشه نادي صحي ليش ما أييب لها جوتي رياضه (وإنتوا بكرامه)؟ خل أدوّرلها جوتي سبورت حلو جذي وردي لأن إهيا تحب الوردي.

و هم راح الحبيب ديبين هامز طبعاً و سأل عن المكياج و إنحرج جدام إلي يشتغلون لأن شكله كلش مو مال مكياج :P و بعدين راح لاكوست و شرالها الجوتي(وإنتوا بكرامه) أبيض اب وردي صج صج صج حلو .

وهم ليلحين ما طاب خاطر الحبيب عن الهدية و قعد يذكر و يعصر مخه شنو تتنمى حبيبته أو شنو كانت تقول تبي أو شنو شي عجبها حتى بدون لا تقول أبيه أو بخاطرها.

الحبيب يحدّث نفسه : امممممممم حبيبتي تحب الدببه خل أييبلها دب شوي كبير و هم تحب الأشياء الديكور إلي تنكتب عليها كل عام و إنتي حبيبتي و هالسوالف إلي يبيعونها في بوابة الهدايا.

راح الحبيب بوابة الهدايا و شاف وايد أشياء حلوه بس لفت نظره مثل صندوق مفتوح و داخله قلب حب مكتوب عليه كل عام و انت حبيبي و هم ساعه شوي كبيره و مكتوب عليها أحبك ، بعدين دوّر صندوق كبيره عشان يحط فيه كل هالهدايا فلقى صندوق أحمر كبير مكتوب عليه من كل صوب Love وايد عجبه و قال خلاص هذا راح يكون صنودق الهدية و غلّف كل الهدايا و حطّاهم داخل الصندوق ، طبعاّ كل تغليف الهدايا أحمر و وردي لأن إهيا تحب الأحمر و الوردي، و هم كان داخل الهدية حلاو أحمر نسيت أسمه بس إلي تكون دائره حمره و إذا طوّلت بحلجك مده تذوب و تصير علج (نسيت إسمها).

الحبيب يحدّث نفسه : إنزين انا الحين يبتلها كل شي إهيا تحبّه و باجر لازم لازم لازم لازم أعطيها الهدية ، خلاص باجر تدري شلون ؟ أنا قايل بييبلها تليفون N71 (طبعاً هالكلام من زمان كان بوقته) لأنها حرام أول ما شرته أخوها خذاه منها فخل أييبه عشان هم إهيا يكون عندها بعد واحد .

رد الحبيب بليل ، و كالعاده اتصل على حبيبته و يسولف ويايها و حاول يعرف و يجيس نبضها إذا باجر تبي تسوّي شي وله بتروح مكان أو أي شي ، بس ما حس بولا شي مثل ماكان متوقّع و صار في حديث، و من ضمن هذا الحديث كان :
الحبيب : حبيبتي باجر شعندج العصر ؟
الحبيبه : مادري والله حبيبي بس ماكو أكيد بروح بيت يدي كالعاده في عطلة الإسبوع يعني .
الحبيب : يعني ما تبي تسوين شي تطلعين ؟
الحبيبه : لا والله حبيبي ما أتوقّع ماكو شي كلّش .
الحبيب : إنزين عيل حبيبتي قبل لا تروحين بيت يدج أبي أشوفج شوي بس بقولج شغله .
الحبيبه : شفيك حبيبي لا تخرّعني قولي الحين ليش ما تقول ؟
الحبيب : لا والله حبيبي شي عادي والله بس ما راح أقوله و لا تخافين بالعكس الشي وايد حلو .
الحبيبه : قول يالله عاد شدعوه دام إنه حلو و عادي ليش ما تقوله ؟
الحبيب : إنزين حتى لو مابي أقوله بس إذا بشوفج ما تبي تشوفيني ؟
الحبيبه : امبلا حبيبي شلون مابي أشوفك ؟ خلاص باجر قبل لا أروح بيت يدي العصر أشوفك.

صار باجر
الحبيب قعد من النوم الظهر و دق على رفيجه و قاله تيي معاي بروح شرق بشتري تليفون حق حبيبتي ؟ قاله خلاص خل نقوم نصلي و جذي و تعال مرني ، قاله أوكي .

الحبيب وصل حق رفيجه و راحوا شرق و شروا التليفون إلي يبيه حق حبيبته و الهدية كانت محطوطه بالسياره وره و حاط باقات عشان لا تبين الهدية لأن فشله أحد يشوفها و جذي ، لأن مثل ما تدرون الهدية صندوقها كبير ، شروا التليفون و بطل الحبيب صندوق الهدية و كان التليفون الوحيد إلي مو مغلّف و قال ميخالف راح تعذرني إذا قتلها ليش مو مغلفه .

صار في حوار بين الحبيب و رفيجه :

رفيجه : شنو شاري لها إنت ؟
الحبيب : يبتلها كل شي تبيه و بخاطرها ، عطر ، لاب توب ، تليفون ، جوتي(وإنتوا بكرامه) ، مكياج ، دب ، صندوق مكتوب عليه جذي أشياء .

فجأة نزّل الحبيب راسه على موبايله إلي كان حاطه بحضنه !! وله يشوف إن كان داق على حبيبته و ناسي و حبيبته قاعده تسمع المكالمه !! و صار حق المكالمه 22 ثانية !!
جان يصير في بينهم حديث غريب !! :

الحبيب : الو ؟
الحبيبه : لا والله ؟
الحبيب : شفيج ؟ سمعتي شنو قلت ؟
الحبيبه : (بأعلى صوت عندها) إنت واحد ما تستحي على ويهك و إنت حرام فيك أنا إنت خاين و إنت (الكثر من السبات إلتي أعجز عن كتابتها) و يالله اذلف و ما أبي اشوفك بحياتي و خلها تفيدك !!

سكرت الخط في ويه الحبيب ! الحبيب منصدم ! ويسأل رفيجه بكل برود؟

الحبيب : سمعتها و إهيا تصرّخ ؟
رفيجه : إي شفيها خرعتني والله ؟
الحبيب : ما أدري والله بس اصدمتني أنا شسويت ؟
رفيجه : أخاف على بالها إن إنت يايب الهدية حق وحده ثانية و إنك خاينها

ضل الحبيب ساكت و إتصل على إخت الحبيبه عشان يعرف ليش سوّت كل هذا .

الحبيب : مريم وين حبيبتي ؟
مريم : لو سمحت مالك شغل بإختي و خلاص إنساها و من الحين إنت بطريج و إهيا بطريج .
الحبيب : إنزين ليش انا شسويت و شنو اسمعت إهيا ؟
مريم : اهيا اسمعت كل شي و اسمعت و إنت تقول إنك شاري مادري شنو أغراض حق وحده اسمها زهره !!
الحبيب : زهره ؟ أي زهره ؟ و رب الكعبه إني ما يبت هالإسم ولا يبت أي شي من إلي تقولينه غير الأغراض !!
مريم : إنزين شنو المناسبه إلي تييبلها كل هالأغراض ؟
الحبيب : والله العظيم لو أشوفها و أعطيها الأغراض راح تعرف شنو المناسبه !
مريم : ما راح تشوفها و الحين أنا أبي أعرف شنو المناسبه ؟
الحبيب : لو سمحتي مريم أنا الحين بييكم و تعالوا المكان إلي أشوف حبيبتي فيه و ييبيها معاج و راح أعطيكم الهدية و راح أقولكم شنو المناسبه .. و إذا ماكان معاي الحق صدقوني أنا راح أطلع من حياتها و ماراح تشوفني بعد طول عمرها .
مريم : أوكي أنا بعد ربع ساعه آخذها و نكون هناك

ساكت الحبيب طول الطريج و دايس عشان يروح بسرعه و يحس في حالة خوف و في نفس الوقت اهو متأكد إن وياه الحق 100000% .

وصل الحبيب المكان، و وصلت مريم و الحبيبه قاعده يمها بالسياره، نزل الحبيب و بطل الباب إلي وره، شال الهدية و و راح حق سيارتهم و اهم منصدمين من حجم الهدية ، حط الهدية بالارض و بطل الباب إلي وره، شال الهدية و حطها وره .

جان يروح عند دريشة مريم إلي تسوق و شاف حبيبته، و حبيبته ويّها أحمر و عيونها تعبانه من البجي ، جان يدور الحوار بينهم :

الحبيب :(ببتسامه خفيفه) مشكوره أول شي على حسن الضن .
الحبيبه :(بصراخ) خلاص حطيت الهدية إذلف و لا أشوفك بعد .
الحبيب :(أيضاً يبتسم) إنشالله ، من عيوني راح اذلف ، بس قبل لا اذلف أبي اقولج شغله .
الحبيبه :(بقمّة الصراخ) شتبي شتبي خلاص روح لا تينني !!
الحبيب :(بكل هدوء) أنا دايماً بالمناسبات أحب أكون أول واحد يهنيج و يبارك لج لأن إنتي حبيبتي و مالي غيرج.
الحبيبه :(تعفس ويّها و تكلمه باستهزاء) و بالله أي مناسبه إلي يايب فيها هالهدية إلي كبر ويهك ؟
الحبيب :(ببتسامه خفيفه) ممكن ما تقاطعيني و تسمعيني لي آخر شي ؟
الحبيبه : (ساكته)
الحبيب : و هم أنا دايماً إذا الناس باركوا لي على مناسبه معينه حقي أعتبر هالمناسبه لي و لج، لأن أنا إنتي ، و إنتي أنا .. و بهاليوم إذا إنتي ما هنيتيني و باركتيلي فأنا حبيت أذكرج بهالهدية البسيطه و بهنيج و ببارك لج و بقول لج كل عام و إنتي بألف خير حبيبتي دامج نسيتي تقوليلي كل عام و أنا بخير .. لأن اليوم تاريخ 20-4 و اهو يوم عيد ميلادي.

الصدمه بيّنت في ويه مريم، و مريم حطت إيدها على راسها و نزّلت ويهّا، و ويه الحبيبه مصدوم بشكل محّد يتصوره .. و بعد ما أنهى الحبيب حديثه مشى لي السياره و كان خده شلال من الدموع الي نزلت من عيونه إلي كانت بيت حق حبيبته، و بعد ما ركب السياره التفت على رفيجه و رفيجه كان سامع الحوار إلي بين الحبيب و الحبيبه و قاله .

رفيجه : شلون نست تقولك كل عام و إنت بخير؟ والله العظيم أنا إلي مالي شغل بالسالفه حسيت بالذنب، لا تضيّق خلقك و صدّقني إنت ما قصّرت معاها نهائياً و عمرها مراح تلقى واحد نفسك والله العظيم !!
الحبيب : (ساكت ويبجي من القهر)

و بعد ما حرّك الحبيب التفت على سيارة حبيبته و شافها و كانت منهاره من البجي و تأشرله إن بكلمك ، و لكن الحبيب ما قدر يوقّف السياره و بدى يتذكّر كل كلمه انهان فيها جدام اختها مريم ، و مشى إلى أن وصل بيت رفيجه، مشى رفيجه ، و الحبيب رجع البيت و نام من البكاء و التعب.

ملاحظات :

1- أحداث هذه القصه حقيقية حدثت في عام 2006.
2- الذي جعل الحبيب التأكد من نسيان الحبيبه يوم عيد ميلاده و عمل كل هذا إنها دائماً تغّير هواتفها فتنسى أن تضع موعد أو منبّه التذكير لأعياد الميلاد .
3- الصوره التي وضعت هي صورة هدية الحبيب الحقيقية .




هناك 12 تعليقًا:

alB6h يقول...

القصة حزينة وتعور القلب .. وشي يحطم لما تحط في بالك ان اللي بتسويه راح يبني السعادة بس يصير العكس !!
بس انا ما الوم الحبيبة ولا الوم الحبيب .. ما الوم الحبيبة لان زمانا حيل مفقود منه الوفاء والاخلاص وعادي اللي يحب اليوم باجر يخون وعادي باللحظه الشيطان يلعب بمخ الانسان ..!
وما الوم الحبيب لانه على نياته وحاب الحبيبة , ولازم ع الحبيبة تكون عندها الثقة اكبر من اي شي! , لازم كانت تكبر عقلها وتستوعب صح قبل لا تتصرف ..!

بس ما تشوف معاي ان الحب اكبر واااايد من ان فراقهم بهالسهولة .. الانسان مو معصوم عن الخطا .. وبالحب يمسح الانسان الاخطاء والجروح !!

بالاخير الحياة تجارب توعي الانسان وتقومه وتعلمه يمكن تكون قاسيه يمكن نفقد اشياء غاليه بس بالمقابل وفي الكفه الثانية اكتسبنا وكبرنا..

اعذرني ع الاطالة بس لو ما راح اوقف الحين راح اكثر من الكلام..

يعطيك العافية

Antonio يقول...

البتيشنو ...
خوش قصة بس حزينه وايد
ومحد ينلام فيها ، بس من ناحية البنية ما كان له داعي الانفعال والاتهام لان الثقة المفروض اتكون اكبر من جذيه ..
ومن ناحية الولد كان بسوي الخير والمفاجأه بس الله ما كتب انها تنتهي ابهالشكل ..

موضوع جميل جدا وقصة ولا أروع
الله يوفقك الجميع لما يحبه ويرضاه

تقبل
ودي الكبير

Unique Girl يقول...

لااااااااااااا من صجهم تفرقو عشان هالشي

والله كسر خاااطري حرام حراااااااااااام

ماااابي انزين الي يعرفهم يجمعهم والله ماراح تلقى احسن منه يارب والله انقهرت

مشكور على القصه العجيبه

Al Pacino يقول...

alB6h

شكراً على مرورج الي دايماً يفحرني الحقيقه
أنا أعتب عليك بأنك لا تلوم ولا أحد من الطرفين و من وجهة نظري المتواضعه إنك مخطأة في هذا الشيء .. أنا ألوم الحبيبه لأن كان لها حبيب وفي و مخلص لأبعد حدود عندما نرى كيف كان يفكّر في إرضاءها .. ولو بنرجع للناس فهناك الخائن و هناك الوفي في كل مكان ..

أما الحبيب فأنا أختلف معك بكلمه .. ليس كل من حب من قلبه "إنقال عنه هذا على نياته" ولكن فعلاً كان يحب من قلبه ..

شكراً على مرورج الجميل و تقبّلي ودي و احترامي الشديد ..

Al Pacino يقول...

Antonio

أنا أحب أكلمج بالعامية شوي .. والله يا أنتونيو من أشوفك بالمدونه استانس .. فقدناك وايد و من طوّل الغيبات جاب الغنايم .. و أدري فيك ما تجيب إلي أجود الغنايم .. شكراً على مرورك الجميل .. و ننتظر منك المزيد

و بخصوص الموضوع أنا ما عندي شي أزيده على تعليقك و أشكرك كثيراً مره ثانية على المشاركه الحلوه

دمت بألف خير

Al Pacino يقول...

Unique Girl

شكراً على مرورج الجميل و عسى أن يستمر هذا المرور دائماً ..

و البنت خلاص راحت و تزوجت و شافت حياتها الحين مثل ما علمت من معلومات يعني و تحريت عنهم .. و لكن من خلال هذه القصه أتمنى إن تنبه أي أحد عدم الإستجال في اتخاذ القرار و هم يجب على الحبيب و الحبيبه تذكر هذا اليوم و تحرّيه بكل حراره لأن هالشي كبير بالنسبه للأثنين ولو ذكرته بكلمة "كل عام و إنت بخير"

شكراً على مرورج الجميل
تقبلي ودي الكبير

Seema* يقول...

To be honest, I wouldn't call it love. It's not even close.
يمكن وهم, يمكن هفوة, احساس مؤقت بس مو حب! لأن الحب أكثر من وردة حمرا ودب وكلام. إذا هدية فرقتهم! تهقى كان ممكن ينجح زواجهم مثلاً؟ أو حتى تستمر علاقتهم لفترة طويلة؟ ما أعتقد.
:)

Al Pacino يقول...

كلام جميل يا Seema .. وجهة نظر جميلة و يجب أن نحترمها جميعاً .. و مع ذلك يجب أن نعرف ان الحب شيئ و الزاج شيء .. والحب بعد الزواج شيء آخر ..
هذا في وجهة نظري المتواضعه و أرجوا قبولها ..

كذلك في وجهة نظري أعتقد أن لكل مرحلة من مراحل العمر له متطلبات معيّنه من الحب فالحب في مرحلة المراهقة يتطلب من الحبيبين أن يكون الحبيب جميل جداً كذلك الميلان للحب الجنسي أكثر بكثر من القلب "فلتعذروني على هذه الكلمه ولكن هذه وجهو نظري" ..
أما عندما يدخل في العشرينات نجد أن الشخص يريد أن يكون حبيبه له فقد و يريد أن يرضيه بكل شيء حتى لا يرى غيره من الناس و تزيد الغيره فيه ..

أما في منتصف العشرينات فنجد بعدما يمر العاشق في مرحلة التعب و الشقاء في الحب فلا يريد أن تكون حبيبته أو حبيبه جميل .. ونجد أن الغيره تقل أحياناً في منظور الكبر والنضج العقلي ولكن تبقى موجوده فيه .. ولكن المطلب الأساسي في هذه المرحله هو أن يكون المعشوق "شخص يقدّر الحب و و يقدّر الشخص الذي أمامه و يحترم مشاعره" لأن عندما تكتمل هذه الأشياء و تكون الراحه موجوده بين العشيقين نجد ان كل من الآخر يرى الثاني أجمل شخص على وجه الأرض ..

أرجوا قبول وجهة نظري المتواضعه والتي كان مضمونها هو "لكل مرحلة من العمر متطلّبات للحب"

شكراً لهذا المرور الجميل و الأكث رمن رائع ..

دمتم بألف خير

نـ(المطيري)ـازكـ يقول...

اكتفي باني اقول عورت قلبي

koko يقول...

شنو هذا عوار قلب والله :(

Al Pacino يقول...

فدك المطيري ..

الله كريم إنشالله :)

تقبّلي ودي و إحترامي الشديد

دمتي بألف خير

Al Pacino يقول...

koko

سلامتج قلبج إنشالله ..

شكراً لمرورك على مدوّنتي ..

أرجو أن تكوني من الدائمين ..

تقبّلي ودي و إحترامي الشديد

دمتي بألف خير