welcome

welcome to my bloge :)

السبت، 24 يوليو 2010

الــدفــاشــه


بسم الله الرحمن الرحيم ..

طبعاً مسلسل الأيام السيئة متواصل في هذا المعسكر "الغبي" ..

صارلي جم يوم أحداث تصيرلي مادري من شنو .. من النفسيه وله من الإصابه وله من المدرب وله مادري من شنو .. صاير أتنرفز بسرعه .. دفش .. و طبعاً الدفاشه إهي الموضوع الأساسي بهالموضوع .. و كل الدفاشه صايره مع الأشياء الإلكترونية .. و فوق هذا مو بس جذي .. ضاعت مني بعض الأشياء الأساسية عندي ..

خل أقولكم شنو صار وياي هالجم يوم ..

أول أمس .. كالعاده .. قعدت الصبح رحت التمرين بصالة الحديد و تمريني يستمر تقريباً ساعه و نص داخل الصاله .. طبعاً أنا دايماً شورت و تي شيرت و اروح الصاله و بالتمرين ال iPod بأذوني يعني و أسمع أغاني " سعد الفهد .. فواز المرزوق .. عبدالمجيد عبدالله .. راشد الماجد .. راشد الفارس" يعني هذيله إلي أحب أسمعهم .. تمريت .. خلّصت .. قاعد أمشي لي الغرفه .. بطلّت الغرفه .. طبعاً ما أدري إذا كنتوا تدرون وله لأ ترى الحين في أوربا كلها درجة الحراره شوي مرتفعه فأنا دايماً أبطّل الدرايش ملوت الغرفه عشان يدخل فيها الهوى و ما تصير حاره .. و للعلم أنا غرفتي الوحيد معطيني Single :P

سكرّت الباب .. قلت بدش الحمام " و إنتوا بكرامه " فبشيل السمّاعه و ال iPod من أذوني .. شلت السماعه .. مسكت الiPod .. حذفت السماعه من بعيد يعني لي الفراش .. طاحت على الفراش .. جان أمسك ال iPod حذفته !! طار !! طاار .. جان يطلع برّه الدريشه .. أنا @@ أففف .. صج طااح برّه ؟؟ أنا بالدور الثالث !! و أبي أركض بس مابي أحس بعوار ريلي بشوف شسصار فيه !! جان أطل من الدريشه .. وله طايح الحبيب على الثيّل أشوه .. بس ترى بعيد يعني الدور الثالث بس قلت أكيد تفلش و ما أدري إن تحت غرفتي في عشب جذي معنّه موكثيف وايد .. جان أنا أضحك شوي قلت شهالدفاشه ؟؟ شدعوه يعني على بنه طالع من صالة الحديد و دقيتلك حديدتين جذي تحذف ال iPod لوووووووول .. المهم .. نزلت تحت و قاعد أقول إنشالله مو خربان لأن مالي خلق أشتري واحد غيره و أترب الأغاني و جذي .. نزلت .. مسكته .. أشغله .. وله يشتغل :D المهم خذيته جان أصعده فوق .. بس عاد دلّعته بعدين .. حطيته على المخده و لحفته :P

لا و الي ضحّكني أكثر شنو سويت .. مسكت علبة الكلنكس .. جان أحذفها من عند الحمام و "إنتوا بكرامه" و قاعد أقيس المسافه قاعد أقول شدعوه حذفته بهالدفاشه و القوه يعني لي هالدرجه ماني قادر أقدّر المسافه ؟؟

هذي الدريشه مالت غرفتي .. و يعني لو عندي شوية حظ جان طق ال iPod بالحديده إلي بالنص

طبعاً هذا الثيّل إلي طاح عليه ال iPod بس الصوره هذي مو نفس وقت الحدث بس عشان أوريكم المسافه و شلون بعيد


أما السالفه الأهم و الأغبى و الأكثر دفاشه .. أمس .. كالعاده أقوم أروح التمرين و أرد وأرجع .. و أنا كل يوم ورى الغدى أرتّب غرفتي يعني .. المهم رتبت و مسحت الغرفه و جذي و ييه وقت الفراش أعدل الشرشف يعني و أضبطه .. كان اللابتوب على الفراش .. جان أمسك اللابتوب من الشاشه .. و صبعي البهام على الشاشه .. بشيله بحطه على الطاوله .. وله أسمع الشاشه "تك تك تككككككككك" أنا اففففففف ! شنو هذا .. جان أشوف وله كاسر الشاشه .. و الصوره تبيّن شلون الكسر .. أنا قعدت بعدين أقول .. إنزين يعني حبكت تشيله من الشاشه ؟؟ و شسالفتك بس تبي تكسّر أغراضك على بنه متنرفز ؟ أمس حاذف ال iPod و طايح من الدريشه .. و اليوم كاسر الشاشه مالت اللاب توب .. الله يستر شبتسوي باجر ..



و طبعاً هذي الشاشه و هذي بصمة إبهامي و شوفوا الكسر من وين لي وين صاير .. حادث سيّاره مو لابتوب:P


أما السالفه اليديده و إلي حسيت إن قلبي ميت فيها ..

خل نرجع من بداية اليوم إلي كسرت فيه الشاشه .. قعدت من النوم .. تريقت .. ريحت شوي .. رحت التمرين .. كان تمريني تقريباً ساعه و 45 دقيقه .. خلصت تمرين .. ردّيت .. تسبحت .. صليّت .. تغدّيت .. رديت الغرفة .. رتبتها .. كسرت شاشة اللابتوب ":P يعني واجب علي أسويه" قعدت طول اليوم ماكو شغل يعني رحت شوي الكارفور يبتلي أغراض الغرفه "الماجله" .. رديت و جذي قعدت أشوف مسلسلات أنا و رفيجي عليوي .. سوالف و ضحك و جذي .. قعدت على اللاب توب لين يتلي الدوخه و نمت ..

اليوم قعدت الصبح .. آخر يوم تمرين بالإسبوع طبعاً لأن أنا دايماً أعطي نفسي راحه يوم الأحد بما إني في أوربا فدايماً لازم تكون عطلتي مع عطلتهم .. و بالكويت تكون السبت .. رحت التمرين .. و أنا داش الصاله جان أقول "أووووووووه ال iPod نسيته .. جان أقول خلاص طاب شسوي بعد مالي خلق أرجع الغرفه و أرد الصاله" تمرنت .. خلصت تمرين .. ردّيت الغرفه ..
أدوّر الiPod .. أدوره ؟ أدوره ؟ أدوره ؟ وينه يا ربي ؟ أنا يا أحطه بالجنطه مالت التمرين يا أحطه بالدرج .. ماكو يا ربي وين وين وين ؟؟ فجأة ! تذكرت ! أففففففففف ناسيه من أمس بالصالة ؟؟ و ما فقدته و تذكرت إلا توه !!!!؟؟؟؟

وله تدرون شنو ؟ أمس رحت صالة الحديد .. و أنا قاعد أتمرن و كنت لابس شورت مافيه مخبى إلا ورى الشورت فحاط الiPod ورى و كنت قاعد أسوي تمرين فكان قاعد يضايقني .. جان أشيل ال iPod أحطه بالأرض بمكان يعني عادي أمر عليه كل دقيقه .. و أنا قاعد أتمرين جان إيي مساعد المدرب و قعد يسولف وياي و أنا بالتمرين لين خلصت تمرين و قتله يالله أنا بمشي و رجع معاي الفندق .. وال iPod على الأرض !!!؟ و أنا ما فقدته و تذكرت إلا قبل شوي !! رحت الصاله و كلمت المره إلي تشتغل قتلها ما شفتوا iPod أمس كان بالمكان الفلاني ؟ قالتلي نو :) أنا أوكي "جينكويا" يعني شكراً بالبولندي ..


و بس راح علي ال iPod عاد حرام كنت أبي ارد الكويت و أعرفه على ال iPad :P أخوي توه راد من أمريكا فترة شهر اهو مع عياله جذي على ما يبدى السمستر الثاني لأن يدرس ماستر اهناك فقتله إييبلي iPad من هناك .. فيالله ما عليه الله يعوض علينا إنشالله .. بس صج صج صج هل 3 أيام حسيت نفسي بقمّة الدفاشه و بقمّة الذهاب العقلي :P

بس هم إظاهر كان امبين إن راح يصير بال iPod شي أول أمس حاذفه من الدريشه و أمس ناسيه بالصاله و ضايع .. فيالله شنسوي بعد .. بس أهم شي إني إذا رديت الكويت راح أشتريلي لابتوب يديد بدال هذا إلي الحين يشوفني بعين و عين .. و ثاني شي باخذلي iPhone بدال ال iPod شرايكم ؟ أنا عندي BB بس قلت بعد مره واحده يا آخذ ال iPhone يا ما آخذ الiPod مره ثانية ..


طبعاً نقّيت هالصوره لأن صج كان ال iPod مالي جذي ماكان فيه برامج و مادري شنو بس 36 إغنية بعد

هناك 28 تعليقًا:

الجودي يقول...

معوضين ان شاء الله ..

بس أقولك شي وما تزعل اتوقع مو من الدفاشة ضاع من نوعيه الأغاني إلي تسمعها على الصبح p;

إشلون الإصابة الحين إن شاء الله أحسن ..

و طمنى على الوالدة و دير بالك على عمرك ما بقى شي على المعسكر :)

هديــل يقول...

الله يعوضك ان شاء الله

اكيد من العصبية والحالة النفسية التي تمر فيها :)

بس صج شي يقهر لوول انا اللي صار بآي فوني واخر شي جت سليمة الحمدلله

ويوقف قلبي لو صار شي بلابتوبي لول

اي انصحك تشتري آي فون احسن من الآيبود لان تقدر تتصل منه

ومشكور ويعطيك العاافية =)

غير معرف يقول...

سلامات مايشوف شر الآيبود. عاد تمر علينا وايد أيام نكون فيها دفاشة وتصرفاتها تكون غير مبررة وغير مفهومة.. ضحكتني طبعة الابهام ع الاب توب.. الحمدلله يت سليمة وما تكسر الآي بود.. الله يرجعك بالسلامة وتفتك من هالمعسكر " الغبي "

alB6h يقول...

مساء الخير
مسكين هال ipod انحاش منك حاذفه من الدور الثالث كنت تبي تموته عشان جذي قال خل انحاش من صاحبي كلش مو مهتم فيني << جذي تسوي وتزعله :p اتغشمر

بس اتصور كل هذا عادي لان مثل ما قلت ضغوط التمارين والتدريب والغربة وضغط المدرب , يعني انت هدي نفسك وهانت ما بقي شي وترجع بالسلامة وتفتك من كل اللي قاعد يصير لك ..

اما ع الاجهزة ماعندي خبرة بهالسوالف اللي يبونه لي واللي يدش خاطري استخدمه..

يعطيك العافية

Seema* يقول...

LOOOOL
كله مرة وحدة؟
الهون أبرك ما يكون ياخوي
صدقتي الأجهزة مالها ذنب تتعاقب
هدي بالك وشوي شوي على الأشياء!

معوّض ان شاء الله
:)

نـ(المطيري)ـازكـ يقول...

مـرحبا البسينواا .. يـة ية ..
يبة شوي شوي ع الاغراش ههههههه شكلك صج شاد ع التمرين عيل لو تضغط الكيبورد ينكسر << اقول طيري هههههههه
يبة معوض .. خلاص ولا يهمك الايبود ابوق لك مال اخوي ..
واللاب توب ماعليك واصلني بالطريج صيني نوت بوك بس خلة يوصلة بس يصير بيدك مثل الموبايل << اقول بسج عاد .. صيني بعد ههههههههه

لا فديتك اغير جوك اتغشمر وياااااك ^_^

معوض ان شاء الله .. يبة اللي مثلك مستانس والحياة سعيدة عندة ..
بس حلوة اغنية عودتني كل يوم اسمع انا صوتك لوول ..

تدري يبيلك جلسات ريلاكس .. او مساج << عشان يرتاح جسمك واعصابك ..

حلو نزل اي فون 4 روعه ..

عساااك ع القوة ياالدفش هههههههه ^_^

Antonio يقول...

سلامااااااات

:)

Girls and Kuwait City يقول...

مو من صجك صاير الرجل الاخضر هاهاهاها الله يعوضك ان شاء الله :)

خدمات البحث العلمي يقول...

ههههههههههههههههه

يعني كل هالدفاشه من الحديد اللي تمرنه

ضحكتني وبقوه

~أم حرّوبي~ يقول...

أمااااااااا سالفة اللابتوب عجييييييييييييبة ههههه مبين عليك صج تتمرن ههههههههه..والله كسروا خاطري أغراضك أكيد يقولون ياالله متى نردالكويت بسنا معسكر انته تتمرن ونحن ناكلها هههه
أنا أرجح ان الاي بود نفد بجلده قال خل اشرد قبل لا يحوشني مثل ماصار باللابتوب خخخخخ
الله يعوضك خير :)

Maram يقول...

أغراضك من قلب كسروا خاطري

حرام مالهم ذنب ههههه الله يعوضك

Al Pacino يقول...

الجودي

عادي الحمدلله على كل شي و الله يعوضّنا إنشالله ..

شدعوه بعد في أحسن من هالمغنيــن ؟ ترى مو أغاني إزعاج و جذي يعني مثلاً "يكذبون ، أحبك ليه ، عودّتني ، في أمور ، ما بيّن بعينك ، صدقيني ، يهمّك في إيه" يعني بعد في وايد بس هذيله إلي على بالي

و الإصابه الحمدلله اليوم أول يوم دشيت الملعب و ركضت 10 دقايق ..

و الوالده الحمدلله شالت الخياط و الحمدلله مافيها شي و بتسافر إنشالله تاريخ 1-8 لبنان بتقعد اسبوع و ترجع تغيّر جو ..

مشكوره على مرورج يا الرائعه الجودي

Al Pacino يقول...

هديــل

الله كريم و و الله يعوّضني إنشالله

و والله ما أدري من النرفزه وله القوية زايده أكثر من اللازم :P

و إي شكلي بروح اشتريلي iPhone أول ما ارد إنشالله لأن صج صج فاقد ال iPod ..

و العفو و الله يعافيج و مشكوره على ورورج ..

Al Pacino يقول...

قلم و مسّاحه

شكلك ما قريت الموضوع عدل :P لأن الiPod ضاع و لو مكسور أحسن :P

و ما أدري شمكن من النرفزه الزايده يصير جذي بس ساعات هم من التعب تسوي أشياء إنت مالك غلق تتحكم حتى بنفسك :P

إنشالله الله يرجعنا بالسلامه و نفتك من المعسكر الغبي :P

شكراً لمرورك ..

Al Pacino يقول...

البطه
مساء النور ..
يا معوده أي مسكين الناس تحط فيه مليون إغنية و مليون لعبه ومليون برنامج و أنا مو حاط إلا 36 إغنية بس يحمد ربه .. و زعل بو يعل :P

إنشالله راح أهدي نفسي و صج ما بقى شي و أرجع الكويت إنشالله كلها إسبوعين و راجع الديره ..

والله ما أدري خنشوف ارد الكويت إنشالله و أخططلي على لالتوب يدي بدال هذا ..

الله يعافيج و يخليج يا البطه

شكراً على مرورج الجميل

Al Pacino يقول...

Seema

إي والله كله مره وحده .. لوووووو :P

إنشالله بهدّي بالي و توبه بعد أشيل ال لاب توب من ويها :P يعني من الشاشه و إنشالله أرجع الكويت و آخذلي لاب توب يديد

الله يعوضّنا إنشالله

مشكوره على مرورج و ما قصّرتي ..

Al Pacino يقول...

فدك المطري

مرحبتين ..

لوووووووول لا لا لا إطيرين نبيج يا معوده لا تروحين مكان :P و شسوي يا معوده بعد القوة الزايده تسوّي مشاكل .. :P

غي زين إذا بتبوقينه ميخالف بس إذا بتشتريلي لا مابي :P والله عفية واحد ما يقول حق الواحد بوق بس بحترام:P

والله أحرجتيني صيني عاد ؟ الحمدلله إن مو ياباني :P كثّر الله خيرج و مشكوره وايد :P

فديت عمرج و ما قصّرتي ولو تغشمّري من هني لي الصبح :P

و الله يعوضنا إنشالله و الحمدلله على كل شي و عادي يعني لا تضايقت ولا شي ولا ياني شعور دقيقه من الحزن عليهم :P و إي والله أنا على طول أول ما أشبك أحط سعد الفهد على اليو تيوب و أسمع إغنية إغنية ..

باجر عندي جلسة مساج حق ريلي بس طبعاً مدلكنا من كثر ما يدلكنا حيل يمسك العضله و نبجي من العوار :P يعني مافي رحمه ..

إنشالله راح أشتري iPhone قررت ..

الله يقوّيج إنشالله يالمغشمرجيه :P

شكراً على مرورج الجميل

Al Pacino يقول...

Antonio

الله يسلمك :)

شكراً على مرورك

Al Pacino يقول...

Girls And Kuwait City

لووووووووووول إي شسوي بعد ديروا بالك ترى يايكم الكويت الرجل الأخضر تاريخ 11-8

الله يعوضّ علي إنشالله و الله كريم

شكراً لمرورج ..

Al Pacino يقول...

مبدعه

إي والله شنسوي بعد الحديد خلاني ما أحس بقوّتي و بنفس أصلاً :p لوووووول أتغشمر معاج ..

عسى دوم تضحكين بقوّة

شكراً لمرورك

Al Pacino يقول...

أم حرّوبي

لووووووول الحين بعد كل ما يدش واحد من ربعي يقولي هاااااااا شنو هذا متهاوش ويّاه طق ؟ لوووول ما يشوفون شر الأغراض يحمدون ربهم يايبهم بولندا لو قاعدين بالكويت جان ذايبين الحين ..

ما يشوف الiPod الحين عند واحد تارسه كله أغاني بولندية و مو فاهم ولا شي ال iPod :P

الله يعوّض علينا

Al Pacino يقول...

أغراضك من قلب كسروا خاطري

حرام مالهم ذنب ههههه الله يعوضك

maram

اللابتوب أنا كسر خاطري إصراحه .. بس ال iPod ما يشوف شر إنحاش .. بس ما رده راح يتحسّف لأن خلاني و مشى :P مو جني أنا إلي خليته و مشيت :P

الله يعوّض علينا إنشالله

شكراً لمرورك ..

وفاء السحيم يقول...

الله يعوض عليك
ومرحبا فيك انا مشترك جديد
انا رايي اترك التمارين شكلها قويه مرررررررررررررررة
هههههه

Al Pacino يقول...

فوفو

حيّاج الله في المدوّنه و إنشالله تكونين من الدايمين يا رب ..
لوووووووووووول .. خلاص ولا يهمج أول ما ارجع الكويت أقدّم كتاب إعتزالي .. والأسباب إني صرت مستهتر و أكسر أي شي جدامي :P

حياج الله اخت فوفو

ђάỳỜờỜƒ يقول...

عارف الدفاشه مفيده بعض الاحيان يعني مثلا تخوف زوجتك لما تضايقك ولا يعني مثلا عيالك< برا
بس عاد تكسر اغراضك مهب زينه ابد

تصدق ذكرتني بمره خطبني واحد واليوم الي جاء عندنا بالبيت كسرت البيت كله
نشف حلقي بس اشرب مويه والكاس الي اشرب فيه الله يرحمه ينسكر
واخرتها رحت اغسل كسرت حقت الصابون جبت حيلي كله
يلعن يومه لعب بحسبتي هالرجال
صار فييني ارتجاج ماعاد امسك شي

koko يقول...

الله يرحمه الايبووود
جنه مصيره يصير فيه شي p;
الله يعووووضك

Al Pacino يقول...

ђάỳỜờỜƒ

لووووووووووووووول لا شدعوه عاد ما أستعمل الدفاشه مع الأهل .. الأغراض فدوه تروح و تيي بس على قولتج زوجتي إذا تزوجت طبعًا أو عيالي أذبحهم مره وحده أحسن :P لووووووول اضحك معاج

بيييييييه بييييييييييه ليش كل هذا عاد .. الله يعينج والله بس شكلج إنتي العن مني بالدفاشه :P و الله يرحم الكاس :P

شكرًا لمرورج أختي

تقبّلي أطيب أمنياتي لك

دمتي لي بألف خير

Al Pacino يقول...

Koko

خلاص مافي الله يرحمه رجع الiPod بصحه و سلامه .. غصبن عليه يرجع مو طيب منه :P

الله يسلمج مشكوره على مرورج إختي

دمتي لي بألف خير