welcome

welcome to my bloge :)

السبت، 31 يوليو 2010

"المشنص"


السلام عليكم ..

إصارحه مادري شفيني هالجم يوم شوي تعبان من ضغط التمرين .. فمو قاعد أشبك وايد و لأني الحمدلله تشافيت من الإصابه ولكن ليلحين باقيلي جلستين علاج بس الحمدلله الألم راح نهائي و مو قاعد أحس فيه بس أحس بضعف مكان العضله و الي لازم أسويه الحين إني أقويها .. طبعاً لا تشوفون المنظر يمي الحين قاعد أكتب البوست و قاعد يطق مطر مو طبيعي و الهوى ساعات يدخل علي رذاذ و يحوشني فحده الجو مو طبيعي ..




طبعاً ما يبيّن المطر جذي بس قاعد تمطّر ترى

صارلي جم يوم الربع ينادوني "المشنص" وايد أشياء صارتلي معاهم و صج حسّيت نفسي "مشنص" يعني محظوظ حق إلي ما يعرف ..

السالفه الأولى طبعاً يوم الأربعا إلي طاف كنت متملل و أبي أطلع بروح مجمّع اسمه "Galeria Mokotow" هذا بعيد عن مكان الفندق تقريباً ثلث ساعه بتكسي .. أول مره أروحله قالولي إنه كبير المجمع و وايد حلو .. رحنا إحنا 10 تقريباً من الفريق .. قاعد نتسوّق و جذي يعني .. طبعاً كالعاده ما أحب أمشي مجموعه ربع لأن إذا كل واحد بيوقّف مجموعه ماراح نعرف نتسوّق و الي يبي يشتري يدش المحل و يطلع بسرعه عشان لا يوقّف الربع .. فقتلهم يا جماعه الوعد عند المكان الفلاني الساعه الفلانية عشان كل واحد ياخذ راحته .. قالوا أوكي ..

أنا و عليوي و عزوز كنا مع بعض .. دشيت أول شي محل إسمه Royal Collection هذا محل كبيــــــــــر و طابقين .. تكون فيه كل الماركات يعني مثلاً "Armani, CK, Polo, Tommy" و ايد يعني بس أنا قلت هالماركات لأني شريت منهم .. بس Polo ما شريت لأن ما أحب هالماركه .. المهم .. دشيت داخل المحل و تفرقنا أنا و عزوز و عليوي .. جان أنا أشوفلي وايد أشياء إعجبتني و حلوه علي .. طبعاً خل أقولكم شغله .. أنا نوعي بالملابس مزاااااااج و ثاني شي عندي قاعده إن إذا لبست الشي و شفت نفسي من النظره الأولى إذا عجبني على طول أقول آخذه و إذا ترددت خلاص يعني مو حلو ..




خذيت أول شي هالبلوفر .. عجبتني طريقته ..



عجبني إن الكلام ما يبين من جدّام بس من الزوايا .. شرايكم ؟


بعدين لفت نظري هالقميص و هم جربته على جسمي كان وايد حلو .. هذا Tommy

هذا البدي عجبني لأن Simple يعني مافي شي و ال Logo مال Armani حلوه و ورى بعد مكتوب Armani jeans بس مقطّعه



هني من جدام



و هني من ورى ..


بعدين قلت أروح أشوف ال تي شيرتات إلي تصير نفس قصّت Polo بس ملوت Tommy رديت و قاعد أدور و أتعبث و طبعاً عفّست المكان :P و طحت على هال تي شيرت


شرايكم فيه ؟


طبعاً مثل ما قتلكم حتى لو يكون شكله حلو بس يطلع على جسمي أو على شكلي مو حلو ما آخذه .. بس إصراحه Tommy حلو لبسه من زمان و مادري ليش الله يهادهم سكّروه من الكويت :s

المهم .. رحت شفت عليوي و عزوز ماخذيلهم بعد اهمه أغراض ..

قتلها ها يالله نروح نحاسب ؟ قالوا يالله ..

حاسب عليوي و حاسب عزوز .. واقفين ناطريني أحاسب ..

مسكت الجهاز إلي تحطه على الكود مال السعر .. البلوفر ال CK محطوط عليه 527 زلطّي حطت عليه جان يطلع بالمكينه 263.5 زلطّي .. جان أقولها مو 500 ؟ جان تقولي Discount 50%
أنا لوووووول أوكي ..
و الربع عزوز و عليوي قاعد يشوفون الحدث و منصدمون لأن اهمه ما حاشهم ال خصم ..

جان تحط على القميص اهو سعره اب 480 زلطّي .. جان يطلع 240 زلطّي جان إطالعني و تضحك تقولي Also Discount ..
جان عزوز يقول رووووووووح زييييين والله محظوظ شنو هذا !!!

قتلهم تعرف الريايــيل :P على غشمره يعني ..

جان تحط على ال Armani جان يقول عليوي جم الحين بتاخذه بدينار :P أنا بجيت ضحك .. جان إلي تشتغل تقولي شنو قال رفيجك ؟ ترجمت لها جان إهيا تموت من الضحك قالتلي لأ هذي جنه ما عليها خصم .. حطت عليها وله ما عليها صج .. الربع يقولون على بالنا بعد :P طلعت اب 340 زلطّي ..

آخر تي شيرت ال Tommy على السعر مكتوب 310 زلطّي .. حطّت عليه وله 155 يعني 50% .. جان الربع يقولون والله إنك تدري بس ما تقولنا .. قتلهم و رب الكعبه على النيه ولا أدري و أصلاً مو حاطين على ال ليبل شي والله .. جان يعصبون بس على غشمره يعني :P المهم طبعاً طول التسوّق ينادوني المشنص ..

المهم بعدين دشّينا محل اسمه Salamander مادري إذا مار عليكم وله لأ .. هذا محل و إنتوا بكرامه مال جواتي .. هم جذي يجمع وايد ماركات .. رجالي و نسائي .. عجبني و إنتوا بكرامه جوتي Tommy حده قوي إصراحه .. معنه Simple بس أشوفه حلو ..
شوفوه .. شرايكم فيه ..


عاد خذيته و عزوز و عليوي المشكله إن كانوا بياخذون الكحلي بس مافي مقاسهم و هذا كان آخر حبّه :P و فوق هذا يا جماعه إلي ماراح تصدقونه إن عليه خصم 50% كااااااااااااااك .. طبعاً الربع ماتوا ماتوا .. قتلهم يا جماعه شفيكم لا تقارنون نفسكم فيني أنا غير و يعرفون الرياييل :P لوووووووووووووووول .. المهم طلعنا بعدين .. "للعلم أنا ماركتي المفضله يعني الرياضيه NIKE و إنتوا بكرامه كل جواتيي و ملابسي الرياضيه Nike المهم دشيت محل Nike و لفت نظري هالتي شيرت و خذيته ..

طبعاً يوم لبستها بالمحط و قاعد أتمشى فيها و أوري الربع أقولهم شفتوا شلون .. مشكله إذا صرت ملك ال Discount :P و مكسّره بعد قاطها بالكبت بدون لا أصفّطها :P

خلصّنا من Nike جان أروح Asics هم هالماركه أحب و إنتوا بكرامه جواتيها فخذيت هالجوتي وايد عجبني ..




بجرب اتمشى فيه هالجم يوم إذا عجبني راح آخذ نفسه بس الخطوط ذهبي ..


بس للأسف هالمحلّين ما عليهم Discount :P

أتغشمر بس والله صج صار حظي قوي هاليوم ..

و بس بعدين تواعدنا عند المكان الي قلنا عليه و طلعنا ..



و هذا المجمّع من بره ..

رجعنا الفندق .. و خلّص اليوم ..

صار باجر .. قعدت من النوم .. تريّقت و بروح الصاله حق التمرين .. و أنا قاعد أمشي من الفندق لي الصاله وله واحد إييني و يضحك .. أنا قلت شفيه هذا ؟ :S
جان يقولي : You are Kuwait player?
قتله : Yes :)
قالي : I Have your iPod
قتله : Are you Sure ????
قالي : Yes I'm Sure, I see your photo in the iPod and I ask about you and thay told me this is Kuwaiti player ..
قتله : Thank you very much
قالي : What's your room number
قتله : 314
قالي : Ok i will Come at 3 and I will give you
قتله : Thank you very much and that's so kind of you و مشيت ..

يحليه والله ونّسني و عطاني إنطباع حلو عن الشعب البولندا إنهم أمينين و بالعكس اهم زينين والله و متعاونين يعني .. و ما قصّر يابلي إياه و عادت المياه إلى مجاريها :P

و هذا ال iPod يعود من جديد .. و راح أعرفه على ولد عمّه ال iPad :P

, و أخيراً و ليس آخراً الشاشه مالت اللابتوب شوي تحسّنت و راحت بصمتي بس باقي خط أسود مال الكسر و طبعاً هذا مستحيل يروح لأن كسر بس أحسن من قبل صح ؟ :P


شرايكم بالشاشه السحريه :P ؟
و شرايكم فيني مو أمّي داعيتلي ؟

هناك 25 تعليقًا:

نـ(المطيري)ـازكـ يقول...
أزال المؤلف هذا التعليق.
نـ(المطيري)ـازكـ يقول...

وعليكم السلام والرحمة ..

عساك ع القوة .. والمطر يعنش شوي واضح بالصورة ..
والجو مبين علية رووووووعه

هم انا اذا كنت بتسوق ما احب احد يروح وياي الا اذا وحدة من البنات حييييييل ذوقها مثل ذوقي
وغالبا اذا طلعت مع احد بيروح الوقت ع السوالف والضحك ..
حتى مرات اضطر ما اخذ الوالدة .. الله يخليها لي ..
لان لو رحت مع احد .. مثلا الوالدة بتشتري لها او لاخوي لصغير فتقعد ساعه بالمحل ويروح الوقت وانا
بعدي ما شريت شي والعكس ..
وغالبا اتسوق الصبح ع احساس مايكون في حد
ملبــــــــوس العااااااافية يالمشنص ..
البلوفر الاولي واايد طريقتة غريبة ..
طبعا انت اللي تحلي القطعه ..
اللي عجبتني وااااايد تي شيرت تومي .. و الشوز
وتي شيرت نيكي ..
مال الحلا مايضيع .. ما شاء الله عليهم شعب باين علية محبوب
لا لا انت جد كنت بوقتها محظوظ حتى الاب توب تعدل ههههههه
يالله ان شاء الله دووووووووم محظوظ ومشنص مو يوم
يعني خلاص ماتبي النوت بوك والاي بود ههههههه
قواك الله بس لو سمحت مرة ثانية ترجم لابد تراعي شخص مثل حالتي ههههههه

^_^

<< حذفت التعليق وعدلتة لاني حسيت انة ماخذ الصفحة كلها هههههههههههه

هديــل يقول...

ما شاء الله لا اله الا الله
مشنص من قلب :q

شوف بقولك رايي < احد طلب رايج خخ

البلوفر ناااااايس عجبني وطريقته غريبة بروحي احب الابيض والاسود غراامي
القميص حلوة الوانه بس انا افضل التي شيرت والبلوفرات ع القمصان
الثالثة عادية سيمبل
والتي شيرت الرابع حلووو
جوتي Tommy عجبني اكثر من الثاني حييل نايس اذا فيه منه الوان اشتريهم ترى حلو

احلى احلى مبروووووووك عودة الآيبود ما شاء الله صج أمانة وهذا شي حلو فيهم ..

واللابتوب يتعوض
اشتري ماك اذا رجعت عشان تكتمل الشلة =)

بالعافية الاغراض :>

غير معرف يقول...

عليك بألف عافية الأغراض وتتهنى فيهم يارب. أول شي شكل المجمع وايد حلو من برا وغريب. وعجبني البلوفر الي انحط بأول الصور وايد حلو شكله وذرب. حتى البدي الأسود وايد حلو شكله. سالفة الديسكاونت الغير متوقعة وايد تصيرلي. والحمدلله على سلامة اللاب توب ان شالله على ماترجع الكويت الا الأثر زال.. ترجع بألف سلامة وعليك بألف عافية الي شريته.. وأهم شي إنك مقتنع فيه وحابه

alB6h يقول...

وعليكم السلام
اول شي واااايد احب هالكلمة "شانص" << ذكرتني بابوي وايد يقولها :D
اول شي ما شاء الله ع شانصك وايد حلو وان شاء الله دائما تكون مشنص .. وعليك بالعافية حبيت كل اللي شريتهم بس بس " ال ق م ي ص " << عادية بس دامه لايق عليك فان شاء الله تلبسه بالعافية .. اما ع الصورة الثانية اقول شالسالفة ليش مصورة جذي ع بالي بتورينا حركاتك بالتصوير تالي قريت اللي كاتبه تحت .. حبيت حركة الكتبة وشلون ع الجوانب تبين ..

اما الجواتي "الله يكرمك" اثنينهم حلوين وحبيت الاول اكثر لونه حلو وان شاء الله يكونون مريحين بالبس ..

والحمدلله ع سلامة الايبود .. اما الشاشة الظاهر محترقة فعشان جذي اختفى الاثر لو كسر جان ما راح .. وان شاء الله يختفى ما بقى :)

يعطيك العافية

الجودي يقول...

عليك بالعافيه ...

ما شاء الله تبارك الرحمن مشترواتك اتونس شوقتني بروح السوق

:)

خدمات البحث العلمي يقول...

هههههههههههه

شهالحظ ماشاءالله تف تف عليك

Katkoota xD يقول...

ونااسه المطر و جذي

و بالعافية عليك الهدوم

الموقف حييل حلو صج محظوظ و حلوه الطلعة مع الربع

تقبل مروري

تحياتي

Unique Girl يقول...

لوووووووووووووووووووووول والله قاعد اقرى واضضضضضضضحك لووووووول


واما على الملابس انا لاتوديني معاك والله اعقدك ما احب اشوف الشي جذيه لازم اشوفه على القياس ولا ما اشتريه :p

وعلييييك بألف ألف ألأف عافيه أنا الي عاجبني الجواااتي عجييبين وانتو بكرامه والتيشيرت

وتيشيرت نكيي


عليك بألأف ألأف ألأف ألأف عاافيه

وأما عن الأيبود والله لو احنى جان باقو من زماااان

والله انت امك ويدتك والعالم كله داعيلك


مشكوور على البوست الحلو

Girls and Kuwait City يقول...

ما شاء الله لا اله الا الله
ما شاء الله لا اله الا الله
لا ايطقونك عيييين
يالله عليك بالعافيه :)

koko يقول...

عللليييك بالعاااافيه ومشترى الهنا
القميص عجبني
والحمدلله رجع ايبودك سالم غانم p;

Al Pacino يقول...

فدك المطيري

الله يقوّيج إنشالله .. و أشوه إن يبين المطر بالصوره و إي والله الجو مو طبيعي بره ..

إي والله صاجه السوق يبيله مزاج و يا تروح بروحك يا تروح مع واحد من ربعك و يكون نفس ذوقك .. بس هم أنا أفضّل و أقول إن بروحك وايد أحسن لأن ساعات هم رفيجك يغار إذا شاف عليك شي حلو و يقولك مو حلو و إنت تدري إنه حلو .. أنا تحصل وياي وايد ..

مثلي أحب أتسوّق الصبح بالكويت ..

الله يعيافيج و يسلمج :P


ما يغلون عليج والله .. و لا تحرجيني عاد بكلامج هذا ترى أقط نفسي من الدريشه نفس الiPod :P


إي والله ما قصر يابلي إياه لي غرفتي الله يعطيه العافية .. اسمه Martin :P

إي شفتي شلون بس عشان اضحكج .. الشاشه زاد فيها خط كبير بعد بس خط بدون لا يبين إن في حرق بس إنه إضاهر من الحراره زاد الكسر ..

إنشالله الله يسمع منج و لا بس مشكوره كثّر الله خيرج مابي النوت بوك الصيني :P

إنشالله من عيوني راح أترجم ولا تزعلين ..

و ثاني مره لا تحذفين التعليق إنشالله تاخذين المدزنه كلها تستاهلينها يا فدك ..

شكراً لمرورج إختي :)

Al Pacino يقول...

هديل

إي شفتي شلون مشنص :P


أفا عليج قولي رايج ..

إي والله البلوفر أنا عجبني أكثر واحد و حتى باللبس وايد حلو و نفسي أنا احب الأبيض و الأسود .. ومشكوره على ذوقج الحلو ..

في منه كحلي بس عادي مو ذاك الزود .. لأن العلامه مالت تومي شكلها مقموت بالكحلي بس بلي ماخذه أنا وايد بارزه عرفتي ؟

الله يبارك فيج إي والله الحين الواحد يتمرن الصبح و اهو مرتاح و يسمع Music شوي :P

خل يولي اللابتوب زاد فيه كسر بعد كبير .. بس أشوه الشاشه مافيها سواد بس آثار كسر ..

الله يعافيج

مشكوره على مرورج

Al Pacino يقول...

قلم و مسّاحه ..

الله يعافيك و يسلمك ..مشكور على ذوقك و ما يغلى عليك إذا تامر فيه .. أنا وايد لفت نظري يوم كان على البترينه و حركة الكتبه من جذي خذيته ...مشكور على رايك بالبدي الأسود ..عساها دوم تصيرك سالفة الديسكاونت أنا إصراحه أول مره يصير معاي جذي. الله يسلمك و الحمدلله راح السواد الحين الواحد يقدر يشوف مسلسلات على راحته :P و مشكور و ما تقصّر ..

Al Pacino يقول...

alB6h

عساج تكونين من المشنصين بعد إنتي و أبوج الله يخليه لج يا رب ..

الله يسمع منج يا رب و أكون مشنص..

شوفي القميص أنا يوم شفته معلق قلت عادي بس قلت شوراي خل ألبسه .. بس يوم لبسته إصراحه صج صج شكله حلو يمكن اهو الأحلى بينهم بعد ..

لا لا أنا ما أعرف أصور :P بس قلت خل أوريكم شلون الكتبه تبيّن ..

مشكوره على رايج في الجواتي و إنتي بكرامه و إنشالله يكونون مريحين ..

الله يسلمج على الipod .. و الشاشه يا يمعوده اليوم بطلّت اللابتوتب الصبح وله زايد الكسر .. صار على كبير الشاشه بس مافي سواد بس كسر .. بيني و بينج بالطقاق برد الكويت و بقطّه ..


الله يعافيج و مشكوره على مرورج المميز ..

Al Pacino يقول...

الجودي

الله يعافيج و يخليج

مشكوره و ما قصّرتي على ذوقج و روحي السوق .. بس بيني و بينج سوق الكويت يلوّع الجبد .. اهني سوقهم صج صج حلو ..

:)

شكراً لمرورج يا الرائعه الجودي

Al Pacino يقول...

المبدعه

إنشالله عاد مو قاعده "تبصقين علي" من صجج :P

شكراً لمرورج

Al Pacino يقول...

Katkoota xD

إي والله صج وناسه المطر ..

الله يعافيج و يسلمج ..

والله أول مره تصير معاي و أتمنى كل مره تصير معاي :P و أكيد طلعة الربع حلوه ..


شكراً لمرورج

تحيّاتي لك ..

Al Pacino يقول...

Unique Girl

عسى دوووووووووووم هالضحكه يا رب :P


إي أكيد أنا يا أقيسه علي يا ما أشتريه .. ذكرتيني في محلات هني مافيهم غرفة تبديل .. شلون يعني أشتري بالنظر :S؟؟


و الله يعافيج و يسلمج و يخليج .. مشكوره على رايج و ذوقج الراقي

و شسوي بعد التي شيرت ترى مسوين لي إياه :P


و الله يعافيج و يسلمج مره ثانية ..

شفتي شلون .. ما رده يرجعلي وين بيروح يعني ..

وإنشالله أمهاتنا كلنا داعيتلنا ..

مشكوره على مرورج الحلو ..

Al Pacino يقول...

Girls And Kuwait City

مشكوره على مرورج أول شي ..

ثاني شي إنشالله محد يطقني عين بروحي مو مترقّع ..

و مشكوره و الله يعافيج و يسلمج ..

تحيّاتي لك ..

Al Pacino يقول...

koko

الله يعافيج و يهنّيج يا رب

الحمدلله إن القميص عجبج و شكله ذوقج نفس ذوقي لأن أكثر شي عاجبني القميص ..
إي الحمدلله رجع ال iPod سالم و غانم و جاسم بعد :P

شكراً لمرورك الخفيف يا koko

bokeh of magic * يقول...

انا من زمان اتابع مدونتك و انا مسافره و حيل حبيتها بس ماكنت اقددر اعلق المشكله مني انا
المهم بس حبيت اقولك اني معجبه باشعارك و خواطرك حتى سوالفك تونس , ,
في سالفه من ما قريتها ليما الحين معلقه قي بالي و اهيا فرقتنا هدية حيل ماثره فيني
دايما اتسائل بنفسي ليش كل انسان يحب انسان ما يستحقه و لما يكون طرف بالعلاقة بقمة الانسانيه و الطيبه الطرف الثاني يكون العكس تماما
بس الحمدالله انه الله بين الحقيقه من اول شي ,,
بالتوفيق :)

Al Pacino يقول...

Being One

ابصراحه ما تدرين شنو تعليقج ونّسني وايد و حسّيت بشعور مو طبيعي يوم قلتي إنج متابعتها و متابعه كل سوالفي .. والله العظيم ونّستيني ..

و أتمنى إنج تكونين معجبه بكل شي أنزله في المدونه و إنشالله تكونين من الدائمين و أنا أيضاً أكون من الدائمين في مدوّنتج ..

و الحمدلله إني قدرت أوصّل رساله حق كل إلي قرى موضوع فرتنا هدية .. وفعلاً مثل ما قلتي .. كل إنسان يحب إنسان ما يستحقه و لما تكون إنت في قمّة عطاءك في الحب و تنتظر ردّة الفعل تراها العكس تماماً ..

مشكوره وايد على مرورج و والله ونّستيني و جددتي من نفسيتي اليوم لأن توني خالص تمرين و شوي متضايق ..

فمشكوره مره ثانية

تقبّلي ودي و تقديري و أشد إحترامي لك

دمتي لي بألف خير أختي ..

وفاء السحيم يقول...

حظك يكسر الحصى كذا نقول في الرياض


......

Al Pacino يقول...

فوفو

فديت أهل الرياض و أهل السعودية كلهم .. إخوانا و أنا ترى في شهر 4 و 5 كنت في الدمام كنت في معكسر تدريبي و كنت أتدرب في نادي الخليج في سيهات ..

تشرفت بمرورج أختي فوفو

دمتي لي بألف خير