welcome

welcome to my bloge :)

الجمعة، 16 يوليو 2010

أسوء يوم


بسم الله الرحمن الرحيم
تاريخ 15 - 7 - 2010
في الحقيقه هذا اليوم من أسوء الأيام إلي مرت علي في السنه .. وايد أخبار مو زينه يتلي و حصلت لي و لكن فوق كل هذا أقول الحمدلله على كل حال ..

خل أقولكم من البداية شلون كان يومي .. قعدت الصبح تريقت و رحت التمرين طبعاً تمريني كل اليوم الصبح يكون في الصاله تقوية الجزء العلوي من الجسم .. خلصت تمرين رجعت الفندق تسبحّت تغدّيت صليت و ريحّت .. كنت شابك في المسنجر و قاعد أكلم كذا شخص يعني و من بينهم ولد خالي عبدالله .. شلونك و شلون بولندا و شلون الجو .. جان فجأة يصير بيني و بينه هالحوار :

عبدالله : تعال ولد العمه دريت عن أمك ؟
أنا : ( مصدوم ، مبقق عيوني ، بديت أعرّق ، عيوني بدت تغورق معنّي ليلحين ما أدري شنو السالفه) و أقوله شفيها و اهو قاعد يكتب و أنا ماني قادر أشيل إيدي من علامة (؟) قولي شفيها ؟؟؟
عبدالله : زالقه بالمطبخ و منبط راسها و خذوها الإسعاف و خيطوا راسها 7 غرز !!
أنا : (ينّييييييييييييييييت ، و بدت عيوني إدمع ) متى هالكلام صار أنا أمس مكلّمها ؟؟
عبدالله : صارلها 3 أيام و الحين قاعده إبيت إختك الكبيره .
أنا : ( شوي برد قلبي و استوعبت إن أمس يوم كلمتها ماكانت تبي تقولي إنها طايحه و إن خيطوا راسها) جان أقوله الحمدلله عبالي توه لأن أنا أمس كلمتها و أكيد ما قالتلي عشان لا أحاتي ..

جان أمسك الموبايل على طول و أدق عليها .. طبعاً كلمتها و تحمدت لها السلامه و قتلها ثاني مره قولولي لا تخلوني أعرف من الناس ، قالتلي بعد هذا عبدالله الله يهداه ليش قالك .. أنا محرصه على الكل إن ما يقولون لك لأن أدري إذا دريت حزّتها بتهد المعسكر و تمرينك و بترد و أنا الحمدلله مافيني شي و قاعده عند إختك و تاريخ 21 يشيلون الخياط و التضميد ..

الف الحمدلله والشكر الله ستر .. و الله يحفظ أمي الغالية و جميع أمهاتكم يا رب و يطوّل بعمرهم ولا يحرمكم منهم ..

صارت اساعه 5.30 تمرين العصر ..




دخلت الملعب تمرين .. و أنا بنص التمرين وله يحوشني عوار بريلي و ما حبيت أقول حق المدرب و أنا طبعي إذا دخلت التمرين ما أطلع منه إلا و أنا مخلصه كله و العوار كل ماله و يزيد .. لين وصل حق راسي و أنا ساكت و مبين على ويهي إني متضايق .. الربع يقولولي شفيك ؟ أقولهم مافيني شي و أنا مبيّن علي إن فيني شي %100 و قاعد أعرق وايد و للعلم الشخص إذا تعور إصابه تلاقي العرق يزيد بجسمه و أكثر مكان يبهته و أنا كان قااعد يصير معاي نفس الشي .. كملت تمريني رديت الفندق على طول حطيت ثلج على مكان العوار .. بعدين ياني المدرب قالي ليش حاط ثلج ؟ قتله والله اذبحتني اليوم بالتمرين .. قالي يعني مادري لي متى هالحركه البايخه إلي فيك .. خلاص تعورت وقف لازم تكمّل التمرين ؟ أنا ساكت ..
صار اليوم رحت حق الدكتور الصبح .. وله يقولي تمزّق درجه ثالثه لازم تريّح و تعلاج بجلسات ال altra sound و جلسات الكهربا ..

هناك 12 تعليقًا:

alB6h يقول...

مساء الخير
ما تشوف الشر الوالده خاطكم السو , صج قلب الام شلون فكرت فيك وخافت عليك الله يخليها لك بصحة وعافية وترد لها بالسلامة ..

ليش العنااااد ؟؟
شفت شصار تمزق ومن درجة الثالثه , انت رياضي لازم تكون حريص ومهتم بنفسك اكثر من اي شخص , يلا ما تشوف شر ان شاء الله , وان شاء الله صرت احسن!.

يعطيك العافية

Al Pacino يقول...

مساء النور هلا والله ب alB6h

الشر ماييج إنشالله ، و صج والله الأم يا أخي لو شنو تسويلها والله ما توفي .. حتى و إهي تعبانه و صايحه و هم تفكّر فيك .. المشكله عوّرت قلبي تدرين شتقولي و أنا أكلمها ؟ تقولي و أنا بالإسعاف أقول حق الريال أخاف ما أشوف ولدي :( والله عوّرت قلبي و زفّيتها يوم قالت جذي لأني صج صج صج ما أحب أسمع مثل هالكلام ..
و الله يسمع منج و الله يسلمج

و والله يا alB6h أنا من و أنا صغير ما أحب إني أوقّف التمرين .. صارلي 15 سنه على نفس الطبع ما تغيّر .. لو إنشالله على ريل وحده بس أكمّل التمرين يعني أكمله .. و إذا ما كملته أحس إني اليوم مو متمرن و أنام و أنا متضايق والله .. بس ما أقولج إلي قاعد أسويه صج لا عين الخطأ هذا بس شسوي عطيني حل :( ؟
الشر ما إييج إنشالله ،و رحت عالجت اليوم و ما حسيت بأي تحسن و هالشي طبيعي لأني في بداية الإصابه و الحين عندي جلسه الأثنين الياي لأن السبت و الأحد عندهم عطله .. و بعدين أكمل علاجي لي تاريخ 28 ..

الله يعافيج و مشكوره على مرورج المنتظر والمتوقّع ..

دمتي لنا بألف خير

alB6h يقول...

فديتهم الامهات <<< لازم ينزفون شوي ع كلامهم اللي ماله طعم , وان شاء الله ترجع لها وبتكحل عينها فيك :)

شفت وين اوصلت لدرجة العلاج قاعد يصير بطي لو ملحق من البداية يلا الحمدلله ع كل حال ..

افضل حل لا تعاند عشان مصلحتك , الحين منو ما كلها غيرك ,غير الالم اللي محد يحس فيه غيرك غير جذي قاعد ومو متمرن وضايق خلقك , مر ثانيه اذا صار فيك شي لا سمح الله تذكر شصار لك اليوم و شقاعد تحس فيه الحين من ضيقت الخلق ومن الالم, وان شاء الله تترك طبعك هذا :)

طمنا شيصير معاك بالعلاج..

Seema* يقول...

دايماً تذكر ان ما أصابك ما كان ليخطأك وما أخطأك ما كان ليصيبك.. كتبة الله والخيرة فيما اختار الله فالحمدلله على كل حال.
عتبي على ولد عمك, الله يسامحه الحين هذي طريقة يقولك فيها الخبر؟ يعني أي شخص ممكن يسمع هالخبر راح يتأثر فيقول اهوا وبكل لا مبالاه يقط الخبر وكيفكم تصرفوا؟ يعني مسوي معروف مثلًا؟ يعني لو يبونك تدري جان نطروه يقولك؟ الله يهديه!
ما تشوف شر الوالدة والحمدلله يات على جذي..مأجورة إن شاء الله وترى كل شي ولا صحة الواحد مو مال يجازف فيها.. دير بالك أخيي ما تسوى عليك ترى
ما تشوفون شر مرة ثانية
:)

Al Pacino يقول...

alB6h
إي والله صاجه ساعات يطلع كلام والله يضايقني لي درجة إن يدش براسي و تلاقينه يقعد و أفكر فيه و بس أوصل لي مرحله بعيده أتعوّذ من بليس و أقول عسى الله يطوّل بعمرج يا رب .. و الله يسلمج و مشكوره على كلامج الطيب مثلج ..

لا إنشالله مع الوقت راح تكون زينه و إنشالله من بعد هاليوم أي شي أحس فيه راح أوقف و أقول حق المدرب إني متعوّر و أبطل هالطبع الخايس <<< كلام :P

مشكوره على متابعتج الجميله و That's so Kind of you

دمتي لي بألف خير

Al Pacino يقول...

Seema

كلامج درر و يخجلني و أشعر بك في قمّو النضوج أحياناً .. و الحمدلله على كل ما يحدث ..

كلامج صح الكل يقولي ولد خالك غلطان بإبلاغك .. والكلكله يا Seema تدرين شنو ؟ إن فوق ما قالي الخبر كان يعاتبني و يقولي إنت شلون هاد البيت و أمك جذي يحسسني جذي أنا أدري عن الخبر عرفتي و أنا مالي خلق و حدّي كنت متنرفز و ما رديت عليه بس وقتها لو شايفه جداّمي و يقول الكلام جان بأقرب شي حذفته فيه :P

الشر ما إييج إناشلله و يبعد عنج الشر إنشالله .. و إنشالله راح أدير بالي و مثل ماقلت إنشالله ما أعيدها و إنشالله تكون خيره هالإصابه لشي يمكن راح يكون أسوء منه لو أنا مو متعوّر أمس .. فالحمدلله على كل حال ..

الشر ما إييج مره ثانية

مشكوره على مرورج الجميل و كلامج الي يخجل في الحقيقه ..

تقبّلي ودي و إحترامي الشديد

نـ(المطيري)ـازكـ يقول...

صبحك الله بالخير .. هذي اول مشاركة لي عندكـ ..

دايم اشوف ردودك في مدونة اخيي قلم ومساحة ..

الف لا باس عليك و على الوالدة ..

والله يخليها لك ويطول بعمرها ..

فديت راسها .. كل الامهات جذي .. اذا صار لهم شي

لا سمح الله مايقولون عشان مايخلون حد يحاتيهم

بس بقولك شي .. يعني من ضمن اللي قريتة عرفت

انك بمعسكر رياضة وتمرين كرة قدم .. الخ

ويوم شفت البروفايل مالك لقيت الصناعه تعليم ..!

ما ادري مجرد فضول ممكن توضح .. والا راح

افتر بكل البوستات بس عشان اعرف شسالفة << فضول هههههههه

قواك الله ^_^

Al Pacino يقول...

فدك المطيري

صبّحج الله بالنور .. و نوّرت مدوّنتي و إنشالله تكونين على طول موجوده ..

و في الحقيقه انا أعلق على جميع المدونات تقريباً و لكن الأخ قلم و مساحه عيني عليه بارده مواضيعه وايد حلوه و كذلك كثير من الإخوان والأخوات أمثال البطه و غيرهم ما يقصرون في المواضيع ..

مشكوره و ما قصرتي و الحمدلله على كل حال قبل شوي مكلمها و طمنتني بعد مافيها شي و الله يخليج و يسلمج و يخليج حق أهلج و يخليهم لج إنشالله .. و يسلم راسج و كلامج صحيح الأم دايماً تحاتي عيالها إن ما يسمعون عنها أي أخبار مو زينه و اهمه مسافرين و ما يكونون يمها ..

أول شي مشكوره على فضولج و بالعكس هالشي وايد ونسني إنج افتريتي على مواضيعي و حبيبتي تعرفين عني أكثر و أنا شاكرلج مره ثاني .. بس عشان أوضحلج الصناعه معناها الشغل إلي تشتغله .. فأنا معلم تربية بدنية و بنفس الوقت لاعب .. عرفتي شلون ؟ و ماله داعي تفترين بالبوستات خلاص كا قتلج الحين وضحت ؟؟

و الله يقويج و مشكوره على مرورج الأول و لا تقاطعين عاد

دمتي لي بألف خير

مع أطيب أمنياتي و دعواتي

تقبّلي اشد إحترامي

الجودي يقول...

سلامات سلامات ..

خطاها السو الوالده و إن شاء الله أجر و عافية ..

و إنت ربي قدر و لطف إلي اعرفه إن لما الواحد يعمل علاج طبيعي و يشعر بالالم يوقفون العلاج لغاية ما يروح الألم يعني ممكن يوقف العلاج أيام الله يصلحك إنت تحس بعوار و تستمر في التدريب أكيد مو زين ..

زيارة أولى لمدونتك استكشافيه إن شاء الله المره اليايه تكونون بخير إنت و الوالده ..

ولعله خير وما تشوف شر وانتبه لنفسك ...

ترد سالم غانم إن شاء الله :)

Al Pacino يقول...

الجودي الرائعه تزور دوّنتي ..

هذا شرف عظيم بالنسبه لي و أقدّر هذه المبادرة يا إختي الجوتي

لا أنا ما أشعر بالألم وقت العلاج .. ولكن أنا الحين موقّف التدرين و إنشالله خلال الأيام القادمه تتحسن إصابتي و ماراح أقدر أدخل الملعب إلا تاريخ 29 إنشالله .. الحمدلله على كل حال

والوالده الله يطوّل بعمرها إنشالله بخير و الحمدلله كل يوم قاعد أكلمها و الله يعافيج إنشالله ..

شكراً لزيارتج الأولى يا الجودي و أنا فعلاً في قمة السعاده عند قرائتي تعليقك في مدوّنتي ..

الشر ما إييج إنشالله

الله يسلمج و مشكوره يا الرائعه الجودي

دمتي لي سالمة

تقبّلي ودي و تقديري و أشد إحترامي

غير معرف يقول...

ألف سلامة عليها الوالدة، عاد طيحة المطبخ حيل جايدة وتعور جد جد ماتشوف شر يارب.. وأنا الصراحة مع الوالدة المفروض ولد خالتك ما يقولك، أحس قالك ياها بصورة مفاجأة وأنت منصدم وناطر شنو بيقول. بس الظاهر على نياته وعباله انت تدري من زمان..
وسلامتك يارب، ألف سلامة عليك وعلى الاقل تريح جم يوم على ماتصير أحسن ولا إنك تقعد فترة طويلة ما تقدر تتمرن وتلعب.. ان شالله تكون آخر الطيحات يارب وماتشوف شر..

Al Pacino يقول...

قلم و مسّاحه

الله يسلمك إنشالله و بعدك عن كل شر .. إي الله يهداه عبدالله خرعني والله و طلّعني من طوري الله يسامحه .. و صح مثل ما قلت كنت منصدم وو ناطر شنو بيقول .. و طل بعينه على نيّاته إلا شاق الأرض و قاعد :P

الله يسلمك و يخليك ما تقصّر .. إي إنشالله بريّح مثل ما قلت و بعالج إنشالله 10 أيام و بعدها إنشالله بدخل الملعب بإذن الله .. إنشالله و الله يسمع منك يا رب .. عاد إدعيلي بصلاتك الله يوفقّني و يبعد عني الإصابه ..

و الشر ما إييك

مشكوره على مرورك يا قلم و مسّاحه و ما تقصّر و هذا مو غريب عليك إصراحه ..

تقبّل ودي و إحترامي و أطيب أمنياتي لك بالتوفيق و النجاح