بس قبل لا أقول أبي أعرّفكم عن نفسي شوي عشان أحطكم داخل الصوره .. و أنا متعوّد دايماً إذا بقول الشي لازم شوي أعطي تفاصيل عشان أخلي الشخص الي جدامي يعيش معاي في قلب الحدث ..
مثل ما تدرون أنا حالياً في معسكر تدريبي .. مدته 52 يوم في بولندا .. و قريتوا في المواضيع السابقه إني تعوّرت قبل جم يوم بالتدريب ..
أعوذ بالله من كلمة أنا .. أنا لاعب .. مجتهد لي أبعد الحدود في التدريب .. لي درجة إن وايد لاعبين يسمعون مني و ياخذون بنصايحي .. والأسباب إهي .. الحمدلله الحمدلله الحمدلله أنا من أفضل الأجسام بين الفريق و الكل يشهد بهذا .. كذلك أنا أسرع لاعب في الفريق و هالشي محد يختلف فيه و ولا لاعب يقدر ينكر هالشي .. و وايد مميزات تفرقني عن ربعي اللاعبين إلي معاي بالمنتخب ..
أنا كل يوم الصبح أقوم .. أتريّق .. أروح صالة الحديد و أتدرب و أقوي جسمي إلي فوق كله .. ليش ؟ لأن أنا ريلي وايد وايد وايد قوية و الحمدلله و ما يقارن نهائياً بجسمي فوق .. لأن من و أنا عمري 17 سنه و أنا تأسست على تمارين الرجل من الفخوذ و البطات و غيرها من التمارين .. و أنا تعوّدت قبل سنتين إني أقوي جسمي فوق عشان أوازن بجسمي و الموازنه هذي تبعدني عن الصابات و بالعكس جسمي إلي فوق وايد يساعدني في تطوّر سرعتي لأن الشخص إلي يبي يركض صحيح إن ريله الي تتحرك .. بس ما ننكر شغل الإيد و الأكتاف و الصدر و المعده و كل العضلات .. ترى كلها تعمل عملية متكامله ..و كذلك تزيد من قوتي بالملعب و سرعتي .. و أعتقد هالشي ينحسبلي لأن مافي ولا لاعب من الفريق يسوّي إلي أنا أسويه لأن هذا الشي من كيفي أسويه و للعلم إن التدريب هني فتره وحده بس أنا قلت دام إن ماكو شي الصبح فاتدرب الصبح تدريبي المعتاد في صالة الحديد ..
أول ما وصلنا هني .. صار في حوار بيني و بين مدرّبي ..
المدرب : أقول ! خفف خفف تمرينك ترى صاير شمتنك !
الربع ساكتين و قاعد يشوفون الموقف
أنا : شدعوه عاد شمتني .. ترى كله حديد و مو حديد كمال أجسام حديد إلي يفيدني في الملعب ..
المدرب : خير بنشوف شبتسوي باجر بالملعب
أنا : محترم نفسي و ساكت ..
دخلت الغرفه .. شوي كنت متضايق .. قعد وياي رفيجي ..
رفيجي : أقول مالك شغل فيه .. إنت تدري إن كل الربع يتمنون يصيرون بس ربع من جسمك و امكانياتك و صدّقني باجر راح تقص ويها بالتمرين ..
أنا : أنا ما أبي أقص ويها والله .. بس أنا لو أسوي الشي و ما يفيدني ليش أسويه من الأساس ؟ و ترى سالفة الحديد يثّقل و مادري شنو هذا كله المبدأ غلط بغلط !! يا أخي لو الحديد يسوّي الواحد ثقيل جان أنا مو أسرع واحد بالفريق ..
رفيجي : يبا إنت هدّي بالك و مالك شغل فيه و الكلام إلي دش هني طلعه هني ..
أنا : تبي أقولك شي .. دش على اليو تيوب .. اكتب سباق 100 متر بألعاب القوى في بطولة العالم .. و شوف الأجسام إلي قاعد يركضون .. والله كمال أجسام مو العب قوى .. و هذيله معناته إنهم أسرع ناس بالعالم ..
و كلهم حديد بحديد .. قالوا عنهم امتنان ؟ قالوا عنهم ثقال ؟ بالعكس قالوا عنهم أبطال عالم و أسرع ناس بالعالم..
صار باجر
كان عندنا تمارين جري بالملعب .. و إحنا قاعد نسخّن و نسوي إحماء يعني .. جان يصير بيني و بين المدرب حوار ..
المدرب : طاع ريولك شمتنها ..
أنا : جان أمسك الجلد و أنا أبتسم .. قتله ترى ماكو جلد كلها عضل ..
المدرب : إي بنشوف اليوم بالركض شبتسوي و شبيسوي العضل و يبّين كل شي ..
صار وقت التدريب الأساسي ..
إسألوه اللاعبين: شنو عندنا ؟
المدرب: عندكم جري من العلامه هذي لي هالعلامه ..
اللاعبين: جم ثانية ؟
المدرب: 27 ثانية ..
اللاعبين: أوكي ..
ملاحظه : الركض كل ما تركض مسافه معينه و تكون الثواني أقل معناته إنك سريع ..
مثال "ال 100 متر .. إذا أنا ركضتها 10 ثواني .. و غيري ركضها 11 ثانية يعني أنا أسرع لأني 10 ثواني"
قال المدرب واحد واحد يطلع مابي مجموعات ..
ركضوا اللاعبين .. كلهم يركضون 27 و 28 و في 29 ثانية ..
وصل دوري .. جان أركض .. خلصت ..
أنا : جم ركضت كبتن ؟
المدرب: "بنفسية" 25 ثانية ..
اللاعبين : "بينهم و بين بعض" جنه المدرب انقص ويها ؟
صارت مره ثانية نفس التمرين و نفس المسافه ..
اللاعبين نفس الشي 27 و 28 و 29 ثانية
وصل دوري .. ركضت .. خلصت ..
أنا : جم ؟
المدرب : "في قمّة النفسية" 24 ثانية
اللاعبين : "بينهم و بين بعض و يتطنزون على المدرب بس طبعاً ما يسمعهم" لا امبيّن وايد ثقيل و متين بعد ..
غيّر المسافه .. و طلبها منا نركضها اب 19 ثانية ..
اللاعبين كلهم 19 و 20 ..
وصل دوري .. ركضت .. خلصت ..
أنا : جم ؟
المدرب : "طبعاً حده منصدم" 17 ثانية ..
صارت الجموعه الثانية و اللاعبين بدى عليهم التعب ..
و نفس الشي و نفس الأرقام ..
و أنا رديت ركضت و نفس الشي 17 ثانية ..
وصلنا حق آخر جزء من التمرين ..
4 مرّات من العلامه لي العلامه بأقصى سرعه عندنا ..
المدرب : سمعوني .. أبيكم الحين تركضون مع بعض مجموعات .. و أنا بحسبلكم الراحه بين ركضه و ركضه 3 دقايق .. و راح أحسبلكم جم ثانية تركضون ..
طلعوا مجموعتين قبلنا .. إلي ركضها ب 14 و 13 ثانية ..
وصلت مجموعتنا .. ركضنا .. أنا بديت أفرق عن مجموعتي ..لين وصلت العلامه المجموعه كلها وراي ..
جان أسأل المدرب ..
أنا : جم ؟
المدرب : إنت 11 .. المجموعه 14 ..
و نفس الشي صار في الركضه الثانيه و الثالث ..
بس الشي إلي صار و فاجئ المدرب !!
إن كل الاعبين ما كمّلوا آخر ركضه الرابعه و أنا الوحيد إلي ركضتها بالفريق كله ..
قتله جم ؟
المدرب : 11 ثانية ..
طبعاً استوعبتوا إلي صار ..
على كثر الي صار بس هم طلعت من التمرين و أنا متضايق .. تدرون ليش ؟
1- المدرب نفّس علي لأن عباله أنا مسوي جذي عناد عليه ..
2- انحرج جدام اللاعبين لأن الشي إلي صار قبلها بيوم طلّعه ان اهو غبي
مرت الأيام و طبعاً من التمارين و جذي يبين إن أنا المفضّل عنده مو طيب منه غصباً عليه طبعاً ..
صارت العلاقه بيني و بينه شوي مكهربه معني والله كل ما يقول شي أقوله إنشالله و حاضر بس شي واحد كان يقولي و ما كنت أسويه ..
المدرب : ما أبيك تدرب الصبح حديد ..
أنا : كبتن إنت شايف إن مأثّر على مستواي ؟ شايف إني ثقيل مثل ما تقول ؟ أنا أعرف جسمي و بالعكس أنا متحسّن وايد عن قبل و الكل يشهد .
المدرب : خلاص كيفك "يحرّك إيده و يضحك ضحكت إستهزاء"
أنا : ساكت و ما أبي أتناجر لأن بالنسبه لي السالفه ما تسوى و حرام أضيع كل شي عشان هالسالفه ..
ساعات أشوف المدرب بره بالمطعم أو بالفندق أو أي مكان يعني .. إييون الشباب يكلمونه عادي و جنه مافيه شي .. بس أنا أييله ينفس علي و يكلمني باستهزاء و يعني جنه يقولي خلّصني بسرعه شتبي ..
بدى يبين علي كل شي و متضايق و دايماً أقعد بالغرفه مالي خلق أطلع ولا أروح مكان .. صار جدولي ثابت " أقوم ، أتريق ، أتمرن ، أتغدى ، أتمرن ، أتعشى ، أنام"
الحدث إلي طلّعني عن طوري ..
بعد الإصابه .. الكل يدري فيها .. طبعاً الإصابه بالتحديد في فخذي .. كل يوم أقوم أتريق .. أروح صالة الحديد أتمرن تماريني اليومية .. أخلص بعدين أروح أعالج بالعياده و أروح أتغدّى ..
أمس كنت قاعد بالملعب أشوف التمرين .. و في لاعب بعد متعوّر عوار عادي يعني كدمه .. فالمشرفين و المساعدين قاعدين يمي بالمدرّج جان يصير حوار :
المشرف : والله مكانك امبيّين بالملعب ..
انا : ما عليك زود يا بو سالم ..
المساعد : قاعد تعالج ؟
أنا : إي
المساعد : وين بالعياده إلي هناك .. عشان نبي عزوز يروح وياك ..
أنا : إي
المساعد : قاعد تدّرب الصبح ؟
أنا : إي كالعاده ..
المدرب : بعد تدرّب و إنت متعوّر .. "بقمّة الإستهزاء"
أنا : إي قاعد أتمرن فوق بس و إنت تدري إن إصابتي بفخذي يعني مالها أي علاقه بالتمرين فوق.
المدرب : خلك خلك رد من إصابتك و أنا اوريك شلون أذوّب هالحديد إلي تاخذه .. "تهديد"
انا : قمت من المدرجات و رديت الغرفه .. و حدي مقموت من اسلوبه اشلون يكلمني ؟ جني ياهل عنده .. ماجني ريال عمري 24 سنه .. و مدرّس ..
قعدت بالغرفه .. ما طلعت .. وقلت حق الربع إييبولي عشاي الغرفه ..
الحدث المهم
اليوم بالمطعم .. قاعدين نتغدّى .. جان يدش المدرب و بيده كامرته .. جان يقول شباب صوره صوره .. كلنا جدمنا و قاعد نضحك حق الصوره .. جان يأشر بيده عليّ .. و يقولهم وخروا المجسم وخروا ما نبيه بالصوره و اهو يستهزئ .. جان أنا أرجّع كرسيي ورى و صوّر خلص جان أجدم مره ثانية ..
اهني عرفت إن صج مو بالعني و مادري شفيه علي .. ما خلصت لقمتي هديت الأكل و مشيت أول ما قعد .. و الحين قاعد و ماسك اللابتوب و أفضفض لكم لأني و قمساً بالله متضايق و أول مره يصير فيني جذي والله ..
يا جماعه .. تكفون قولولي .. أنا سويت شي غلط ؟ في شي سويته مو حق مصلحتي و حق مستواي ؟
شنو الحل ؟ والله نفسيتي صايره صفر .. و مالي خلق أقعد مع ولا أحد .. و أخاف أطلع عن طوري و أتهاوش وياه .. و إذا تهاوشت وياه عادي أتوقّف من المنتخب بس أنا والله محترم نفسي و ساكت عشان مصلحتي و عشان مصلحت الفريق ..
هناك 20 تعليقًا:
مساء الخير
اممممم تعوذ من ابليس واذكر الله
لا تضايق وتتكدر وتخرب نفسيتك .. يمكن المدرب حاط فكره غلط
عن التمارين اللي انت تسويها او يمكن يخاف عليك لا تنعكس عليك
اللي قاعد تتمرنه .. مع ان اداءك ما شاء الله وايد زين بس الله يهدي
مدربك يمكن عشان الضغوط اللي يمر فيه الفريق بالتدريب قاعد
يسبب له هالشي .. او يمكن انت مو قاعد تسمع كلامه وتهد التمارين
اللي تسويها الصبح فحاط عليك .. بقولك شغل ما بقى شي على العسكر
ويخلص فلا تخرب اللي قاعد عشانه ما يخالف تحمله واذا حسيت
نفسك قاعد ياذيك بكلامه وطريقته حاول تتحاشه .. او اذا عندك القوة
واجه وقول عسى ماشر احسك تعاملني غير عن افراد فريقي في
شي انا مسويه اللي يخلك تحط علي ؟!
بكل احاول انا اشوفك واثق من نفسك واداء ما شاء الله وايد حلو
على كلامك فلا تخلي شي يحبطك او يعكس عليك ومثل ما قالك
رفيجك اسمع مني وطلع مني .. خلك اكبر منه حتي بتعامله معاك
وكل ما صار شي ابتسم بويه احرق دمه :)
لا تتكدر وتتضايق وسع بالك .. وتذكر اداءك وشلون كسرت عينه
ما يخالف تحمل كل شي عشان الكرة يهون , وتذكر باقي اسبوعين
وترجع الديرة .. كمل طريجك ولا توقف عشان كلمه او انسان
ما يستحق تخرب اللي بدية فيه..
والله يبعد عنك الضيق والكدر
إذا نزل بك مكروه فانظر فان كان لك حيلة فلا تعجز، وإن لم يكن فيه حيلة فلا تجزع. -علي ابن أبي طالب
ترى اللي ما يبينا ما نبيه
واللي يبيعنا نبيعه برخص التراب
من صجك متكدر؟ People don't hate you, they just hate themselves in your presence! ; )
مو غلطتك انك انسان مجتهد, بالعكس المفروض تكون سعيد!
يا أخي مو لازم يحبك, أصلًا أهو الخسران!
Being a better person doesn'nt mean letting go of your rights and letting people hurt you.
He is obviously jealous of you!
You really shouldn't care, he want to tease you and make you feel bad and you're helping him to do that. Instead you should simply "Tathrib rayah bil.7ai6" smile everytime you see him., ignore whatever he says behind your back, never show him that you are upset, laugh more, do not argue with him, and take it easy.
You'll see him die! :p
السلام عليكم ..
استغفر الله شفيه هذا حاط عليك
انت يعني ما تغير مستواك هو شكو بجسمك مدام ما تغير مستواااك :/
بصراحة يقهر .. !!
خلك منه وسو اللي يريحك :)
هلا آلباتشينو.. سامحني إذا الرد بيكون شوي قاسي بس لازم أقول الي بقلبي على نقاط:
1- إذا فعلاً هذي تصرفات مدربك، ف أقول إنه أبدًا ما يصلح يكون مدرب، ومالت على الي أمّنه عليكم وخلاه يسافر وياكم ويصير مدربكم. المدرب ما يغار من المتدرب، هذا بدال ما يشجعك ويقوي من عزيمتك!
2- المدرب مبين عليه مليون بالـ 100% يغار منك، شنو السبب إنت تعرفه وإذا ما تعرفه، المدرب أكيد يعرف، يغار منك، لانك المميز بين أقرانك بالفريق وميت قهر لانه حاط بباله إنك بتصير شي بالمستقبل، وهالشي قاتله وباط جبده ( وأنا متأكد من جذي صدقًا )
3- ماني عارف ليش متضايق ومنبطة جبدك؟ علشان مدرب لا راح ولا رد؟ شنو يعني بيتحكم فيك مثلاً؟ كيفك انت ان شالله لو مليون ساعة تتدرب، هالمدرب مو أبوك ولا عمك ولا خالك..
4- تبي تحره وتموته قهر؟ خلك على ما أنت عليه وتدرب وسو الي بخاطرك كله. أنت لا بايق حلال أبوه ولا ذابح أمه. وبالطقاق الصورة، المفروض يتشرف إنك بتطلع فيها أصلاً
5- حاليًا قاعد يسوي وياك هالمدرب الفاضل " حرب نفسية " تدري شنو آثارها عليك؟ إنك تعد الأيام والليالي حتى ترجع الكويت، وغير جذي تنزعل وعزيمتك تكون بالحضيض، وغير هذا وهذا حاليًا إنت مصاب ف الحرب النفسية يخلي فرصتك شفائك تطول بمعدل أطول شوي. إذا انت راضي إنه يستخدم معاك هالحرب النفسية كان بها إما إذا لأ ف من الحين لا يهمك شي وسو الي تبيه. وعلى فكرة ترا اهو يدري إنك متضايق ونفسيتك مو شي ومستانس على جذي وكل ما يشوفك متضايق من داخل يتشقق ويزيد من جرعة المغثة عليك..
6- إن سمعت منه بالمستقبل كلام يغث منه طاف وأحلى حقران، لأنك أكيد سامع بالمثل الي يقول الحقران يقطع المصران وكل ما تحقره يموت يموت قهر. نفذ تعليماته ك مدرب ونقطة انتهى، أما بيتحكم فيك بأشياء ثانية ف اهو ماله دخل وأنت مو مجبور تنفذ الي يقوله بالحرف الواحد. ولا تاخذ وتعطي وياه إذا كان ما يشتهيك، أنت سويت الي عليك وحاولت تكون سمح وتتقرب بكل الطرق واهو مايبي وبراسه الشر! كيفه بالطقاق لا تزعل نفسك عليه
7- بدال ما تضايق نفسك، ليش ماتسوي شي يريحك من داخل ومن برا؟ روح حق المدرب، وأكيد تعرف غرفته، بس شرط يكون ما معاه أحد وقوله بكلمك شوي، أقعد معاه وقوله كل الي حاز بنفسك.. وشوف شنو يرد عليك، إذا رد عليك باستهزاء نفس كل مرة لازم تعرف إنه مايبي لك الخير. وإذا شفت يقولك أنا المدرب ولازم تسمع كلامي وتسوي اللي ابيه هم حط ببالك إنه ما يبي لك الخير. قول ليش؟ لأنه هم يبي يتحكم فيك.. هالقعدة الي بتقعد وياه راح توضحلك كل شي..
8- أفضل حل إنك لحد الحين قاعد تكلمه باحترام ومو قاعد ترادده، وظلك جذي لا ترد عليه، لانه يبي الفرصة حتى يمسك عليك شي واحد، ف كون أنت ذكي ولا تسوي اللي يبيه لاني عارف اهو شنو يبي.. " طنش قد ما تقدر " بس ضروري تكلمه حتى تعرف ليش يسوي فيك جذي.. ولما بتروح تكلمه لا تقول حق أي أحد من ربعك خلها مثل مهمة سرية علشان أنت تعرف حقيقة هالمدرب..
- حدي انقهرت عليك علشان جذي اكره كل انواع الرياضات والسبب المدربين ماحب أحد يتحكم فيني ويكلمني باستهزاء ويصرخ علي لأني ما راح أركز وفوق هذا بالغربة، كنت قطعت تذكرة ورجعت الكويت واشتكيت عليه عند اللجنة المنظمة والي خلته يصير مدرب >> لا تسوي جذي هذا بالنسبة لي أنا :)
تذكر الفيلم الي حطيته في بوستي من جم يوم؟
" teaching mrs tingle " وانه من انتاج 1999
نفس سالفتك، بس مضمون سالفتك بالضبط بس الأحداث غير ف هذيك طالبة شاطرة وأشطر وحدة بالمدرسة والمدرسة الي تدرسها تغثها وتستهزئ فيها وحتى لما قدمت مشروع تخرجها الخرافي والي كان أفضل مشروع حطت لها تقدير مقبول..
الله يبعد عنك الضيقة وترجع بالسلامة
السلام عليكم ورحمة الله وبركاته
إشلونك الحين إن شاء الله أحسن نفسيا و جسديا :)
ماشاء الله تبارك الرحمن ولا حولة ولا قوة إلا بالله اللهم بارك له فيما رزقته هذا أولا :)
أنا بقولك ملاحظاتي و إنت قلبها براسك وشوف يمكن تطلع بشي :-
1- أصعب ما على المدرب لما واحد يكسر كلامه ..
قالك لا تدرب الصبح لا تدرب مافي مشكله على الأقل هالفتره هو فهمها إنك اتعاند و هذا إلي خلاه يشد معاك .
2- التدريب أثبت العكس و هذا ما خلاه يعيد حساباته أنا ما اعرف شنو مؤهله العلمي و الخبرة إلي يمتلكه أو حتى اللعبه إلي قاعد يدربك عليها .. احتمال من خبرته إن فعلا مو المفروض يكون في كم عضل في الجزء الفوقي من الجسم .. الصورة إلي إنت عارضها العضل في الذراع و الزند يعني مو منطقة الصدر .. احتمال إنت جسمك عريض يعني عضمك عريض و العضم يدخل في حسبة الوزن و هذا إلي المدرب يفكر فيه ...
3- عند الإصابة تتوقف غالبية التمرينات اللهم إلا الخفيفه جدا علشان الجسم يركز على منطقه الإصابة و يشفى بشكل أسرع .. و احتمال هذا المدرب حاطه في باله ...
4- مواقف عده صارت بينك وبينه ازعجتك و ازعجته ما فكرت تروح اتكلمه على انفراد أو حتى يكون أحد معاك من مشرفين الفريق و يكون على إلمام بالموضوع تتناقشون و تحطون النقط على الحروف تعرف اهو شنو إلي مضايقه منك و شنو إلي يرضيه ...
إنت مو في موقعه أقدر أقولك خله عنك و تركه و هو بيندم نو إنتوا فريق واحد و تبون تنجزون شي و حاصل بينكم صدام و الفجوة كل يوم قاعده تكبر إنت مسكت روحك مره و مرتين و ثلاث لا اتوصل نفسك لي مرحلة الإنفجار ... برأي اختار واحد من إداريين الفريق و تكلم معاه بالموضوع و روح إنت وياه و تكلم مع المدرب بخصوص اسلوب تعامله و شوف شنو بخاطره ...
حط في اعتبارك بالأول و الأخير أكيد هو أكبر و احتمال سوء تفاهم أو حركه بدون قصد أو ممكن أحد زلق وايرات بينكم إشلون تنقال لووول ما عرفت المهم الحل بالكلام المباشر أو بحضور أحد ولا يكون واحد من اللا عبين علشان إذا طلع المدرب غلطان ما ينحرج جدام اللاعب و نكون جذي زدنا الطين بله ...
المهم توصل لمرحلة تصفيه القلوب ...
و الحين كرر على قلبك لا تحزن لك الجنه قد ما تقدر و سبح و اذكر الله و صلي لك ركعتين و قعد استغفر الإستغفار وايد زين ...
و إذا قررت اتكلمه قبل لا تدخل عليه قول (( دخلت عليكم بلا إله إلا الله و ألجمت فمكم بلا حولة ولا قوة إلا بالله .. اللهم أكفينيهم بما شئت )) و إن شاء الله موضوعك محلول :)
و بس إن شاء الله أكون أفدتك
وما تشوف شر Al Pacino ولا تحتر ولا شي في ناس اسلوبهم جذي بس قلبهم أبيض ما ألومك لي تضايقت بس لا تعطي الموضوع أكبر من حجمه علشان ما تخسر وايد
إيه وقبل لا أنسى إشلون الوالده إن شاء الله أحسن الحين ؟ إذا ماني غلطانه اليوم موعد الغرز طمنى عليها
:)
Al PaCINO
اولا صباح الخير و انشالله اليوم المزاج عال العال
انا انسانه صريحه و بقولك اياها بختصار:
الحياه صعبه و لازم اتكون قوي علشان تواجهها ... انا ماراح اتكلم عن المدرب لان بالنسبه لي عقله صغير و ما يستاهل يكون بمكانه .. و مشكله اذا ما فهم ان نجاحك من نجاحه ... هو حاول ينزل من مستواك و يقولك لا تتدرب .. لما شاف انك احسن واحد قام يلعب ابنفسيتك لان عارف ان النفسيه ممكن تدمرك... شوف اذا تبي تسمع نصيحتي استمر ابتمارينك و صك اذونك و صير احسن و تجنبه علشان ما يحطك ابمواقفه ال بايخه ... لا تصير حسّاس ترى ما ينفع خلك قوي و مو اي كلمه اتاثر فيك علشان الناس ما تاخذها نقطه ضعف ... و ان شالله تكون الافضل على طووول :)
السلام عليكم جميعاً .. اول شي مشكورين وايد على الردود إلي إصراحه لحد الحين ما قريتها .. لأن أمس طول اليوم نايم و مالي خلق شي .. توني قاعد قبل ساعه تقريباً اساعه 9.30 .. و الحين اساعه 10.23 و إنشالله بعد 7 دقايق راح أروح الصالة أتمرن تمريني المعتاد .. و بعدها راح أروح أعالج و بعد العلاج إنشالله أرجع و أرد على واحد واحد إنشالله .. مشكورين و ما قصّرتوا على هالإهتمام .. عساني ما أنحرم منكم :)
مساك الله بالخير اخيي .. كيف امسيت .. ان شاء الله لا باس
طول بالك وصل ع النبي .. احساس مجرد احساس هالشي
يسمونة غيرة غيرة غيرة ..
وما ادري يمكن يكون ع بالة انت قاعد تنشف جسمك وتضبطة
بس عشان الشكل الظاهري .. مايدري ان اللي قاعد تسوية
لانك مهتم بالتدريب وتحب تقدم الافضل ..
الف لا باس عليك ..
مساء النور يا alB6h
المسأله مو حاط فكره في باله إن أنا التمارين إلي قاعد أتمرنها غلط .. بس السالفه إن مو أول ما وصلت بولندا و اهو مادري شفيه علي و جنك متنان و جنك و جنك .. أوكي يمكن وزني زايد بس لو تقولين شحم و أشياء زايده بجسمي مالها داعي جان قلت إي .. بس أنا لي درجة حريص إني ما آكل إلا ستيكات و سلطات ما آكل عيش و خبز و مادري شنو .. و أنا معطي نفسي يوم واحد بالإسبوع أخرب سستم الأكل يعني إلي اهو يوم الأحد آكل عيش شوي و كاكاو و جذي يعني .. بس إن جسمي الحمدلله مافيه شي بس اهو على قولتهم "يبي راسي" .. و حى لو على الفريق ضغوط ما يضغط على لاعب واحد و يهمل اللاعبين الباجين و يعاملهم كلهم معامله و أنا معامله .. معنه أنا أشوف المفروض على المستوى إلي أقدمه يعاملني العكس .. و مواجهه أنا ماراح أواجهه والسبب اهو واحد .. سبحان الله ما تدرين يمكن هذا باجر يروح حق المشرفين و يقول ترى "اهو ياني لي غرفتي و غلط علي أو عاندني أو شي فأنا مو مستعد يصيرلي كل هذا و أنا بروحي لايعه جبدي من نفسي و من جو المعسكر و من إصابتي .. فماني مواجهه و مايشوف شر .. و إلي بالجدر يطلعه الملاس و هذا الميدان يا حميدان .. خل أرد من إصابتي و راح يشوفني بالملعب أنا شنو .. و الحين أنا صاير بس أروح أتمرن و أعالج و أرجع الفندق و حتى غدى ما أتغدى معاهم عشان لا أسمع منه أو من أحد شي اهمه يتغدون اساعه 1.30 أنا أروح اساعه 2.15 .. و عدل كلامج ما باقي إلا 20 يوم و نرجع إنشالله ..
و مشكوره و ما قصرتي ..
شكراً على نصايحج لي
تقبّلي ودي و تقديري و أشد إحترامي
دمتي لي بألف خير
Seema
أحسنت على هذا الكلام .. و صدق إمامي "كرّم الله وجهه" بما قاله .. فبذلك أنا لن أجزع ..
و مثل ما قلتي إلي ما يبينه ما نبيه و فعلاً أنا مابي رضاه شدعوه عاد اهو أمي وله أبوي ؟ ما يشوف شر .. و هذي إغنية سعد الفهد " من باعنا برخيص .. بتراب ينباع" :P
والله يا Seema شلون ما أتكدّر و أنا دايماً يحطني في هالمواقف و إنتي شفتي الوضع .. يعني ترى هم أنا لاعب و حالي حال أي لاعب بالفريق .. الإداء داخل الملعب ما يعني إني أعامل شخص عن شخص بره الملعب غير .. داخل الملعب غير و بره الملعب غير ..
i never thought of it that way but its so true and really makes alot of sense
أنا سعيد على ما أنا عليه من أداء بالعكس .. ولكن حزين على هذه المعامله الي حشاج "وقحه"
أنا ما أبيه بحبني والله .. و أكيد ما أبيه يكرهني .. بس أبيه يعاملني حالي حال اللاعبين كلهم .. اهو جاف مع اللاعبين بالملعب .. بس ما يجرح و يغلط .. إلا أنا .. شدعوه هذا جزات الإحسان بالإحسان ؟
yeah also true .. but in this case if i react to their immoral behavior then i would probably risk wasting the efforts and dedication i spent for many years .. and quite honestly im not yet willing to take that chance..
unfortunately people nowadays dont know (لكل زمان دولة و رجال) and even dislike the arabic saying (لو دامت لغيرك ماتصلت إلك) .. but who knows .. if he really is jealous then that in my opinion shows how immature he is ..
i can only say that for the time being let me recover first and then i'll show him in and outside the field .. and dont worry .. i promise u i wont let him harm me in any way or even make me feel bad
finally, i wanted to tell you how much i appreciate your advise.. they are very helpful and i will do what u said, but if he doesn't die then we will have another chat :P
شكراً على اهتمامك لهذا الموضوع ..
تقبّلي ودي و تقديري و أطيب أمنياتي لك
مع إحترامي الشديد
دمتي لي بألف خير
هديـل
شسوي بعد مثل ما قلتي حاط علي و يبي راسي ..
و شدراني عنه بس ساعات الناس تصير جاهله للأسف و عبالهم قبل نفس الحين .. ما يدرون العلم دخل بالرياضه و صاروا جزئين ما يتجزؤون ..
الله كريم و أنا صج صج صج منقهر من إلي يصير ..
و أنا قاعد أسوي إلي يريحني
شكراً لمرورك المتوقّع ..
تقبّلي ودي و تقديري
و اشد إحترامي لك
دمتي لي بألف خير
قلم و مسّاحه ..
أفا عليك أنا مدوّنتي كلها لك و لو كان قاسي وله لأ أنا أسمع و كلّي آذان صاغية ..
1- تبي أقولك شي .. هذا المدرب كان وايد زين .. و أول مره أشرف على تدريبي في المنتخب و أنا كان عمري 17 سنه و كنت ألعب مع الكبار مع المنتخب و كان اهو يدرّبني و يحبني يعني و على كان في ذاك الوقت سنة 2002 يعني الكلام من زمان .. بس الحين ما أدري شفيه والله العظيم ..
2- هذا السؤال إلي أنا مو لاقيله جواب ! ليش يغار مني من شنو يعني ؟ لا أنا كبره .. ولا ألعب وياه .. يمكن لأني ألعب بمركزه و شاف إن أحسن مني ؟ بس ما أدري والله غريب يعني مستحيل يصير هالشي معاي أنا بعدين لو أشوف لاعب زين أو أحسن مني .. ما أدري والله العظيم كل ما أقرى و اشوف إن يغار مني أستغرب أقول بهالعمر و ليلحين بعد يفكّر و يحوشه إحساس الغيره ؟
3- أنا منبطّه جبدي لأن ما أستحق إن يعاملني كل هالمعامله الجافه .. على شنو ؟ على شان مستواي زين ؟ شلون بالعقل ما يصير .. و مو مسألت يتحكم فيني بس مسألت إن انا ياي المعسكر عشان نفسياً أرتاح و بدنياً أكون جاهز حق التدريب .. و أنا ادري إن مو أبوي ولا أمي ولا خالي .. بس مدرّبي بالملعب و لازم أسمع توجيهاته .. بس إلي قاهرني تدري شنو .. إنت دام إنك شفتني أنا متطوّر في مستواي .. ليش ما تجبر اللاعبين كلهم يتمرنون معاي في صالة الحديد كل يوم الصبح و بعدين تعال شوف في تغيّر بمستواهم وله لأ ؟ صح وله شرايك ؟
4- أنا بيني و بينك بتمرن كل يوم و كل يوم بعالج و إنشالله الإسبوع الياي أدش الملعب و أنا بعافيتي .. و أوريه منو أنا .. ماراح أسوي شي يدي صدّقني .. بس بضل على مفسي أنا و نفس مستواي .. و الصوره ما همّتني .. بس إلي قهرني إن جدام كل اللاعبين صارت و كل اللاعبين اعرفوا إن في بينا "تش" كبير يعني .. و أنا ماكنت أبي يصير هالشي عشان لا ينتشر الخبر حتى بين الأندية بالكويت إن والله فلان متهاوش مع المدرب ..
5- صح كلامك .. و اهو منتصر في الحقيقه في هالحرب النفسيه .. و الدليل إن أنا كله بغرفتي و ملي خلق أطلع .. و حتى التمرين مو قاعد أروح العصر أشوفه لأن أنا أصلاً سالفة أشوف التمرين و أنا على مدرج أتضايق .. هالمره بعد يقط علي جم كلمه ؟ لا يبا مالي خلق هالسوالف خلني قاعد بالفندق شزيني شابك و أشوف تلفزيون و مرتاح ..
6- أكيد سامع بهالمثل .. شوف أنا والله بطبعي هادي يعني وقت إلي تشوفني من بره و مالي شغل بأحد .. مو معناته إني ما أقعد ويا ربعي بالمنتخب لا بالعكس أقعد و استانس و أنا ساعات الي أسوي جو يعني .. بس إذا طلعت بره الفندق و جدام الناس لا هادي .. بس إذا إنفجرت !! أخاف لا تصير مشكله والله ما يسكرها إلا رئيس إتحادنا !! و بروحنا إتحادنا بعد الله بالخير .. بس خلها على الله .. و جدام المدرب بالتمرين دايماً أوّريه إني أعطي التمرين %100 كل مره و وقت الجد جد .. و حتى بو ياني و كلمني و قالي أي شي أنا دايماً ردي يكون إنشالله .. بس مسألت إني ما أتمرن ما يشوف شر كل يوم أتمرين و اقوّي جسمي و يبي يبي ما يبي ناديي موجود إذا يبي يشيلني من المنتخب .. ولو إن هالشي بعيد عليه إن يشيلني من المنتخب ..
7- لا لا لا مالك أمل أروحله غرفته .. أنا إذا الشخص عفته و كرهته ما عندي مجال بيني و بين نفسي إني أجامل نفسي و أروح و أوّريه إن أنا أبيك تصير معاي زين و إن أنا أحبك أو جذي .. خلاص أهو ما بيّنلي و بيّن حل الكل إن أنا ما يشتهيني ؟ ما همني .. أنا بتعامل معاه مثل الشغل .. تبيني أتمرن صح ؟ أيي التمرين أعطيك %100 و أطلع من التمرين .. تبيني أعالج ؟ أنا إساعه 12 بالعياده أعالج و أطلع .. بس إني أروحله بالغرفه و أتكلم ما يشوف شر .. و إذا اهو ياني "طبعاً هاذي بالأحلام" هذا شي ثاني عاد ..
8- إي أنا ليلحين قاعد أكلمه باحترام .. بس أنا قاعد أحاول إني أتحاشاه و ما أشوفه عشان لا أتضايق أكثر و عشان لا يصير بيني و بينه أي شي .. بس قتلك ماراح أكلمه ولا أبي أكلمه و ما يشوف شر .. مترى ماصارت ريلي زينه راح أروح حق الإخصائي مال العلاج الطبيعي و يقوله ترى جاهز يدش الملعب ..
لا إحنا تصير معانا وايد هالأشياء بالمعسكرات .. و إذا الواحد بيوصل لازم يعاني .. صج إني عانيت وايد و وايد ناس اوقفوا جدامي و بطريجي .. بس الحمدلله دايم الله موفّقني .. و ماراح أسوي إلي قلت عليه أكيد لأني إن سويته بنفضح بالكويت :P
و رسمي أول ما أرد الكويت راح أشتري الفلم و أشوفه .. و ترى إذا مسكت غلاف الشريط و قريته راح تقرى إن أنا إلي مألف الفلم :P لا أتغشمر :P
الله يسلمك يا قلم و مسّاحه
مشكور على هالنصايح
تقبّل ودي و تقديري
أشد إحترامي لك
دمت لي بألف خير
الجودي
و عليكم السلام و رحمة الله و بركاته .. هلا والله الجودي
مشكوره على كلامج الطيب و الله كريم بعد شسوي هذا نصيبي ..
إنشالله من عيوني إنتي قولي و كلّي آذان صاغية ..
1- عدل كلامج بس أنا مو القصد إني أكسر عينه .. اهو اًصلاً يدري إن مستواي أفضل من اللاعبين و كل شي واضح من قبل لا نيي اهني و يبين بالموسم كل شي يعني و جدام عيون الناس .. فاهو إلي كسر كلمته بنفسه يوم قالي بنشوف باجر شنو بتسوي بالملعب انا ما قلت شي ..
2- خل أقولج شغله يا الجودي .. أول شي مؤهله التعليمي عنده دبلوم أو ما أدري والله بس اهو متقاعد .. و ثاني شي اللاعب لازم يكون كل شي في جسمه يشتغل .. كل عضله بالجسم لازم تشتغل .. و أنا درست تربية بدنية و درست فسيولوجيا و درست تشريح و درست علم الحركه و كنت مثل ما تقولين وايد ملقوف في المحاضرات و أحب أعرف كل شي عن الجسم .. و الدكتور نفسه يقولي إنت راح تطلع مدرّب زين لأنك تعرف شلون توضّف الأشياء إلي تاخذها نضري بالملعب .. و أكبر دليل الفرق في المستوى في الملعب .. و انا عضمي مو كبير و عادي يعني حالي حال أي واحد رياضي عادي .. و أنا مو قصدي إن أنا نفس جسم إلي عندي بالصور بس إلي بقولج إياه إن هذيله شوفي الكم العضلات و قاعد يركضون سرعه خياليه .. و أنا العضلات إلي فيني و الكم ما يوصل لي هذي الدرجه و مستواي فارق فرق كبير عن باجي اللاعبين .. فإنت يا المدرب ليش ما تجرب تمشي على النهج إلي أنا ماشي عليه .. يمكن تشوف فرق وايد في مستوى اللاعبين .. صح وله لا ؟
3- لا المدرب مو حاط اباله جذي .. المدرب حاط في باله إن مبدأ إني أتمرن الصبح ما يبيه نهائياً و مبدأ الثقل و الخرابيط هذي و الكلام الفاضي .. و يحمد ربه إني أقعد الصبح أنا أصلاً أقدر أنام لي اساعه 12 و اقوم اروح العلاج و أرد لا شغل ولا مشغله .. بس إهي السالفة سالفة إعناد و بالعكس ترى التمارين إلي أتمرنها الصبح تحرك الدوره الدمويه في الجسم أسرع من السرعه الطبيعيه و بالتالي راح يوصل الدم للعضله المصابه اسرع و تتم عملية إلتآم التمزق بشكل أسرع ..
4- فالبداية يا الجودي كنت اروح أكلمه بأشياء خارج عن التمرين و جذي .. بس يوم شفت إن يكلمني بنفسيه و من ورى خشمه و يكلّم الباجي بوجه ثاني قلت على شنو يسوي فيني جذي ؟ والمواقف إلي يسويها فيني أنا و متعمّد عشان شنو ؟؟ أنا والله متعقّد و والله ربعي كلهم يقولون والله هالمدرب مو صاحي تصدّق ؟ الناس يستانسون إذا عندهم لاعب فلته .. و هذا لأن عنده لاعب فلته بدال لا يقول تعلّموا منه يعاندك و يناجرك و يحط دوبه و دوبك ؟ فأنا قررت إني ما أروحله و قلت إني بعامله مثل شغل .. متى ما يبيني أتدرب راح أتدرب و أعطي %100 بالملعب و العلاج أنا مواضب فيه و الحمدلله ..
قتلج الجودي أنا ماراح أكلم أحد مو عشان الغررو أو إني ما أبي .. بس ما ابي باجر يقول والله ترى شوفوا لو اهو مو غلطان ما إيي يكلمني .. و ما تدرين بعد يمكن باجر يتبلّى و يقول ترى اهو قال جذي و جذي و جذي و ياني لي غرفتي و صرّخ علي و علّه صوته علي .. انا مثل ما تقولين كافي خيري شي .. أسوي كل شي ينفعني .. و ماراح أتناجر وياه ولا راح أقول برجع الكويت ولا شي .. و صدقيني حتى ربعي بالنادي ماراح أقولهم شنو صار ماصار .. معني متأكد إذا ردّيني راح تنتشر السالفه بالكويت و العلاقه بيني و بينه من اللاعبين إلي معانا اهني ..
و بالعكس أنا قلبي على الفريق والله .. و دايماً أمر على الربع و اشوف إذا فيهم شي ولا ميبون شي و أحب أحمّسهم قبل التمرين عشان نعطي من نفسنا و اللاعبين كلهم يحبّوني يعني و الكل يقولي مكانك فاضي بالملعب .. هالشي حلو و صدقيني لو أنا قلبي مو على الفريق جان أنا رحت حق اللاعبين و قتلهم يبا عاندوه بالتمرين و خل يولي و كل ما يطلب شي سووا العكس ..
و إنشالله راح أسوي إلي قلتي عليه و أدعي ربّي إن يصفّي قلبه علي ..
بس ماراح أكلمه و مشكوره على هالنصيحه ...
مشكوره مره ثانية و ما قصّرتي يا الجودي .. و إنشالله و انا بالأساس اهو ماراح أعطيه أكبر من حجمه :P
و والله والله والله أحرجيتي و فعلاً إنتي إنسانه أصيله و عسى ربي يخليج حق كل اللي تحبينهم و يحبونج و أمج و أبوي و أهلج .. والله ونستيني لأنج ذاكره موعد الغرز .. أنا كلمتهم أمس بليل قالتلي باجر بروح حق الدكتور و يشوف إذا التأم و إذا ما إلتأم راح يشيله تاريخ 24 ..
مشكوره مره ثانية و إنشالله راح أطمنج ..
تقبّلي ودي و تقديري و اشد إحترامي
يا الرائعه الجودي
مع أطيب أمنياتي لك
دمتي لي بالف خير
Girls And Kuwait City
صباح النور هلا والله .. والله المزاج عادي يعني بس مو ذاك الزود ..
عدل كلامج و أنا أسوي دايماً إلي تقولينه .. و كلامج فيه نوع من الصحه بخصوص عقله شوي .. و هم عدل كلامج .. والله يا إختي إن نفسيتي صايره صفر .. لي درجة إن الصبح لين أروح التدريب بالصاله و أتمرن أحس إني فيني خمول و مالي خلق و أحس إني مو قاعد أستفيد معنّي نفس التمرين كل يوم يعني أسويه و نفس كل شي بس من بعد السالفه أحس إني مو قاعد أستفيد شوفي لي أي درجه وصلت .. و هذا إلي أنا قاعد أسويه .. قاعد أقوم كل يوم الصبح .. أتريّق .. اروح الصاله .. أتمرن و أخلص و أعالج .. أنطرهم يخلصون غدى بعدين أنا أروح .. لأن الغدى عندنا اساعه 1.30 .. فأنا عشان لا أشوفه و اتحاشاه أروح اساعه 2.15 .. و المسأله مو مسألت حسّاس .. المسأله مسألة تشجيع .. إذا انا ما القى التشجيع من مدربي إلي يدرّبي من منو بلقاه ؟ من الخصم إلي العب ضده ؟ و مشكوره و ما قصّرتي و إنشالله الله يسمع منج
مشكوره وايد على هالنصايح
تقبّلي ودّي و تقديري و أشد إحترامي لك
دمتي لي بألف خير ..
فدك المطيري
مسّاج الله بالنور اختي .. والله أصبحت و أمسيت مثل كاليوم عادي والمزاج صفر .. و الحمدلله على كل حال ..
أنا لو مو مطوّل بالي يا فدك جان شفتيني راد الكويت و متهاوش و يمكن صايره بعد بالجرايد .. و دايماً أنا أقول و أسأل نفسي ؟ ليش يغار من شنو ؟ انا لاعب و اهو مدرب .. أنا مو قاعد أنافسه على إني أكون مدرب .. أنا قاعد أتمرن و شاد حليلي عشان نفسي و عشان ابي أنفع فريقي .. يغار منّي ليش ؟؟؟؟
و أنا مو قاعد أتمرن تمرين كمال أجسام أنشف و مادري شنو .. يعني واحد مهتم بجسمه .. و ما ياكل مثل ما ياكلون الفريق كله .. الفريق كله عيش و بطاط و مادري شنو و بليل يمكن يطلبون من مطاعم فاست فود .. أنا والهل ما يطب بحلجي غير الستيكات و السلطات و العصير .. و فوق هذا مستواي الأفشل بين اللاعبين .. شنو تبي أكثر ؟ و لو أنا باهتم بشكلي الضاهري جان قعدت بالكويت و البس احسن لبس و أتمشّى بالمجمعات و بلا رياضه بلا عوار راس ..
بس الله كريم
و مشكوره و ما قصّرتي على كلامج الطيّب ..
تقبّلي ودي و تقديري لك
مع أشد إحترامي
دمتي لي بألف خير
هـا البسينوا شلونك اخيي اليوم ..
ان شاء الله بخيـر وشلون المدرب وياك ..
الصراحة هذي ثالث مرة اقرى الموضوع و هم الردود ..
ما شاء الله الاعضاء ماقصروا كفوا ووفوا ..
ما حاولت تاخذة ع صوب وتتفاهم معاة .؟ ..
او تغشمر وياه وانت مثلا بالتدريب .. او مجرد ابتسامة لعل وعسى يطيح اللي براسة ..
تدري عمرك ما راح ترتاح وانت تدرب دام المدرب يعاملك هالمعاملة ..
لابد تعرف الاسباب .. تتوقع يغار ..!؟ وهالسبب ماله علاج لانة مرض نفسي ..
لا تضايق روحك ولا تفكر وايد .. والله محد راح يتعب وضيق صدرة غيرك ..
الا صج شخبار الوالدة ..
فدك المطيري
هلا والله فدك شلونج إنتي شخبارج أنا الحمدلله ماشي حالي
مشكوره وايد و ما قصّرتي و هالشي وايد يونسّني إن في ناس مثلج و شروايج يقون مواضيعي أكثر من مره ..
و صاجّه والله الأعضاء ما قصّروا والله بنصايحهم لي .. عساهم على القوة ..
لا ما حاولت ولا بحاول و ما شفته اليوم خير شر .. رحت تمريني الصبح ..و بعدين رحت العياده عالجت .. رجعت تغدّيت ردّيت الغرفه قعدت ما طلعت إلا يمكن اساعه 6.30 جذي رحت السنتر شريتلي جم شغله و هم يتلي دوى حق عوار ريلي قالي استعمله الطبيب اليوم و ردّيت الفندق قبل شوي ..
و عدل كلامج والله إني متضايق و محّد حاس بضيقتي إلا أنا .. و المشكله مو جذي إن ماكو شي أسوّيه طول اليوم بس قاعد بالغرفه و إييون ربعي يقعدون معاي ..
و ما يشوف شر إذا يغار ..
الله كريم إنشالله .. و حسبي الله و نعم الوكيل على الي ظلمني ..
الحمدلله على كل حال ..
مشكوره يا فدك ..
تقبّلي ودي و تقديري و أشد إحترامي ..
دمتي لي بألف خير
السلام عليكم
اول شي ابي اقولك الله يعنيك ع الغيره و الحسد ..
مثل ما قالو اخواني و خواتي من قبلي، واضح ان المدرب يغار منك، و المشكله ماهي فيك المشكله فيه اهوا
ولا تضيق خلقك ولا شي، و مفروض كلامه ما يهز فيك شعره
ترى هذا اللي اهوا يبيه و هذا المقصد من كلامه.. انه يغثك .. ليش تخليه يفوز و يسوي اللي يبيه.. انصحك تكون ريلاكس و لا تحر روحك ولا شي بالعكس اضحك و باتسم و بجذي بيموت من القهر
و مدام انك عارف انك مو قاعد تسوي شي غلط ، ما عليك من احد و كمل و الله يوفقك .. ادري حركات اليهال اللي يسويها تحز بالخاطر بس شتسوي اهوا جذي
اهم شي لا تحسس المدرب انك مقلل من دوره او احترامه لما يقولك شوي الشي فلاني و انت ما تسمع كلامه، سايسه بالحجي و اخذه على قد عقله
و دخل الكلام من اذن و طلعة من الاذن الثانيه
و الله يعينك
و عليكم السلام هلا والله Hope
الل كريم شنسوي بعد ..
و والله شنسوي بعد هذي الدنيا صار المدرب يغار من اللاعب .. إنشالله يحل هالمشكله بينه و بين نفسه ..
و أنا عادي لا مضيّق خلقي ولا شي و ماباقي شي على المعسكر ..
و إنشالله بصير ريلاكس و ماراح أنقهر و لا تحاتين بس ساعات أتنرفز إذا كل يوم يابولي الطاري .. إي والله ساعات أفكر بيني و بين نفسي أقول الحين ريّال طق عمرك ال 50 و ليلحني جذي تفكيرك ؟
و أنا دايماً أحترم نفسي و عمري ما أحسس إلي جدامي إنه اهو غبي وله أقلل من مستوى تفكيره .. بس شنسوي مثل ما قلتي ..
طلعت الكلام من إذنب الثانية لا تحاتين ..
الله يسلمج ..
مشكوره و ما قصرّتي على مرورج و أتمنى يكون دائم ..
تقبّلي ودي و تقديري و أشد إحترامي لك ..
دمتي لي بألف خير
إرسال تعليق